ޑްރަގްގެ ބޮޑެތި ނެޓްވާރކްތަކާއި ޝިޕްމަންޓްތައް އަތުލައިގަތުން މިހާރު ވަނީ އިތުރުކުރެވިފައި: މިނިސްޓަރ
ރާއްޖެއިން ބޭރުން އެތެރެކުރޭ މަސްތުވާތަކެތީގެ ބޮޑެތި ނެޓްވާރކްތައް ދެނެގަނެ އެޝިޕްމަންޓްތައް އަތުލައިގަތުން މިހާރު އިތުރުކުރެވިފައި ވާކަމަށާއި، އެއީ ފުލުހުންގެ މަސައްކަތަށް އައިސްފައިވާ ވަރަށް ބޮޑު ކުރިއެރުމެއްކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވެއްޖެއެވެ. ދާދިފަހުން އައްޑޫ ސިޓިއަށް މަސްތުވާތަކެތި އެތެރެކުރަން އުޅުނު ބޮޑު ނެޓްވާރކެއް ފުލުހުންގެ އިންޓަލިޖެންސްއަށް ލިބުނު މަޢުލޫމާތާއި ގުޅިގެން ވަނީ އަތުލައިގަނެފައެވެ.
މަސްތުވާތަކެތީގެ ވިޔަފާރި ހުއްޓުވުމަށް ފުލުހުން ކުރާ މަސައްކަތްތަކާއި ގުޅޭގޮތުން ވާހަކަފުޅު ދައްކަވަމުން ހޯމް މިނިސްޓަރ އިމްރާން ޢަބްދުﷲ ވިދާޅުވީ، ކުރި އާއި ޚިލާފަށް މިހާރު ރާއްޖެ އެތެރެކުރެވޭ ގިނަ ޢަދަދެއްގެ މަސްތުވާތަކެއްޗާއި، ބޮޑެތި ނެޓްވޯކްތަކުގައި އުޅޭ މީހުން، އަތުލައިގަނެވެމުން ދާކަމަށެވެ. ޚާއްޞަކޮށް ބައިނަލްއަޤުވާމީ އެޖެންސީތަކާއި ރާއްޖޭގެ އެތެރޭގެ މަޢުލޫމާތުތައް ފުލުހުން ދެނެގަނެ ޑްރަގް ނެޓްވާރކްތައް އަތުލައިގަންނަމުންދާ ކަމަށާއި، މަސްތުވާތަކެތީގެ ވިޔަފާރީގެ ގިނަ ހަރަކާތްތައްވެސް ދެނެގަތުމުގެ ޤާބިލްކަން ފުލުހުންގެ ތެރޭގައި ވަރަށް ބޮޑަށް އިތުރުކުރެވިފައި ވާކަމަށެވެ. އަދި މަސްތުވާތަކެތީގެ ވިޔަފާރި ކުރާ މީހުން ދެނެގަތުމުގައިވެސް ފުލުހުން ކުރިއެރުންތަކެއް ހޯދާފައިވާކަން މިނިސްޓަރ ފާހަގަކުރެއްވިއެވެ.
"އިންޓަރނޭޝަނަލް އޭޖެންސީތަކާއި އަދި ރާއްޖޭގެ އެތެރޭގެ މަޢުލޫމާތު ހޯދައި ޑްރަގު ނެޓްވޯކްތައް ދެނެގަނެ އެމީހުން ހިންގާ ބޮޑެތި ހަރަކާތްތައް ދެނެގަތުމުގެ ގާބިލިއްޔަތުކަން ފުލުހުންގެ ކިބައިގައި އިތުރުކުރެވިފައިވާ މިންވަރު ވަރަށް ބޮޑަށް ހާމަކޮށްދޭކަމަށް އެއީ މިކަހަލަ ބޮޑެތި ޝިޕްމަންޓްތައް އަތުލައިިގަނެވި އެތަކެތީގައި އިންވޯލްވާ ފަރާތްތައް ފުލުހުންގެ ބެލުމުގެ ދަށަށް ގެނައުން އެއީ." މިނިސްޓަރ އިމްރާން ވިދާޅުވިއެވެ.
މިނިސްޓަރ ވިދާޅުވީ މަސްތުވާތަކެތީގެ ނެޓްވާކްތައް ދެނެގަނެ ހުއްޓުވުމަކީ މަސްތުވާތަކެތީގެ ވިޔަފާރިއަށް މަޑުޖެހުމެއް އަންނާނެކަމެއްކަމަށާއި، މަސްތުވާތަކެތީގެ މައްސަލަތަކަށްވެސް ބޮޑު ބަދަލެއް އަންނާނެ ކަމެއްކަމަށެވެ. މިނިސްޓަރ މިހެން ވިދާޅުވިއިރު އައްޑޫސިޓީއަށް އެތެރކުރަން އުޅުނު 100 ކިލޯ އާއި ގާތްކުރާ ޢަދަދެއްގެ މަސްތުވާތަކެތި ފުލުހުން އަތުލާ ގިނަ ބަޔަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
މަސްތުވާތަކެތީގެ މައްސަލަތައް މަދުކުރުމަށް ކުރާ މަސައްކަތްތަކާއި ގުޅޭގޮތުން ވާހަކަފުޅު ދައްކަވަމުން ހޯމް މިނިސްޓަރ ވިދާޅުވީ، މަސްތުވާތަކެއްޗާއި ބެހޭ ޤާނޫނު 2011 ވަނަ އަހަރު އައިފަހުން އެޤާނޫނުން ލާޒިމްކުރާ ގިނަ ކަންތައްތަކެއް ނުކުރެވިހުރުމުން އެކަންކަން މިސަރުކާރުން ކުރަމުން އަންނަކަމަށެވެ. ޚާއްޞަކޮށް ޑްރަގް ރިމާންޑް ސެންޓަރެއް މިހާތަނަށް ޤާއިމްކުރެވިފައި ނެތްކަން ފާހަގަކުރައްވާ މިނިސްޓަރ ވިދާޅުވީ އެސެންޓަރު ޤާއިމްކުރުމުގެ މަސައްކަތްވެސް މިހާރު ކުރަމުން އަންނަކަަމަށެވެ.
"އޭގެ ސަބަބުންވެސް އަޅުގަނޑު ހިތުން މަސްތުވާތަކެތި ބޭނުންކުރުމުގަ އަދި ޙުކުމަކާހަމައަށް ނުވަތަ ރިހިބިލިޓޭޝަން ޢަމުރާހަމައަށް ނުގޮސްތިބި ކުދިން ފުލުހުންގެ ބެލުމުގެ ދަށުގައި އެންޑީއޭއާއެކުގައި ބެލެހެއްޓޭނެ އިންތިޒާމް ހަމަޖެހުނީމަ އޭގެ އަސަރު އަޅުގަނޑުހިތުން މުޖުތަމޢުގެ ތެރެއިން ފެނިގެންދާނެ." މިނިސްޓަރ އިމްރާން ވިދާޅުވިއެވެ.
2011 ވަނަ އަހަރު އެކުލަވާލާފައިވާ މަސްތުވާތަކެއްޗާއި ބެހޭ ޤާނޫނުގައި މަސްތުވާތަކެތި ބޭނުންކުރާ މީހުންނަށް ފަރުވާދިނުމަށް ޚާއްޞަ ޑްރަގް އޮފެންޑަރ ރިމާންޑް ސެންޓަރެއް ޤާއިމްކުރުމަށް ވަނީ ލާޒިމްކޮށްފައެވެ.