ރާއްޖޭގެ ފަތުރުވެރިކަން އިޝްތިހާރުކުރުމަށް އެމްއެމްޕީއާރުސީން ކުރިއަށްގެންދާ ފެމިލިއަރައިޒޭޝަން ޓްރިޕްތައް އަލުން ފަށައިފިއެވެ.
މި ފޭމް ޓްރިޕްތައް ކުރިއަށްގެންދާނީ ބޯޑަރު އަލުން ހުޅުވާލުމާއިއެކު ކުރިއަށްގެންދާ ކެމްޕެއިން "ރީ ޑިސްކަވަރ މޯލްޑިވްސް، ދަ ސަނީ ސައިޑް އޮފް ލައިފް"ގެ ތީމްގެ ދަށުންކަމަށް އެމްއެމްޕީއާރުސީން ބުނެއެވެ.
މި ފޭމް ޓްރިޕްގެ ދަށުން އެންމެ ފުރަތަމަ އައިސްފައިވަނީ އިންޑިއާގެ ނޫސްވެރިންގެ ގްރޫޕެކެވެ. މި ނޫސްވެރިންގެ ގުރޫޕްގައި އިންޑިއާގެ 5 ނޫސްވެރިއަކު ވަނީ ރާއްޖެ އައިސްފައެވެ. މި ދަތުރުގައި ނޫސްވެރިންކުރާ ތަޖުރިބާ އިންޑިއާގެ ދަ ޕައިނިޔާ، ޓައިމްސް ޓްރެވެލް، ހިންދުސްތާން ޓްރެވެލްސް، އަދި ކޮންޑެނާސްޓް އިންޑިއާ ނޫހުގައި ޝާއިޢުކުރާނެއެވެ.
އެކި މާކެޓްތަކަށް އަމާޒުކޮށްގެން ކުރިއަށްގެންދަން ފެށި މި ފޭމް ޓްރިޕްތަކަކީ ކޯވިޑް19 އަށްފަހު އަލުން ދަތުރުތައް ފަށައި، ފަތުރުވެރިކަން ހުޅުވާލާފައިވާއިރު ރާއްޖެއަކީ ރައްކާތެރި މަންޒިލެއްކަން އަންގައިދިނުމެވެ.
ކޯވިޑް19 އަށްފަހު ރާއްޖޭގެ ފަތުރުވެރިންކަން އަލުން ހުޅުވާލާފައިވާއިރު އެމްއެމްޕީއާރުސީން ފެށި "ރީ ޑިސްކަވަރ މޯލްޑިވްސް، ދަ ސަނީ ސައިޑް އޮފް ލައިފް" ތީމްގެ ދަށުން ގިނަ ކެމްޕެއިންތަކެއް އަންނަނީ ކުރިއަށްގެންދަމުންނެވެ. މި ކެންޕެއިންގެ މަޤްސަދަކީ ދިވެހިރާއްޖޭގެ މަޤްބޫލުކަން އިތުރުކޮށް، ފަތުރުވެރިންނަށް އަލުން މަރުހަބާ ކިޔުމަށް ރާއްޖެ ތައްޔާރަށް އޮތްކަން އަންގައިދިނުންކަމަށް އެމްއެމްޕީއާރުސީން ބުނެއެވެ.
ފާއިތުވި އަހަރުތަކުގައިވެސް އެމްއެމްޕީއާރުސީން ވަނީ ދުނިޔޭގެ މަޤްބޫލް ފަތުރުވެރިކަމުގެ މަންޒިލްތަކުގެ ނޫސްވެރިންނާއި ސޯޝަލް މީޑިއާގައި ނޫފޫޒުގަދަ ބައެއް ފަރާތްތައް ރާއްޖެ ގެނެސް އެމީހުން މެދުވެރިކޮށް ރާއްޖެ އިޝްތިހާރުކޮށްފައެވެ.