މޯލްޑިވިއަނުން ބަންގްލަދޭޝްގެ ޑާކާއަށް ކުރާ ދަތުރުތައް އިތުރުކޮށްފިއެވެ.
މޯލްޑިވިއަންއިން ބުނީ އެ އެއަރލައިނުން ޑާކާއަށް ކުރާ ދަތުރުތައް ހަފްތާއަކު 3 ދަތުރަށް އިތުރުކޮށްފައިވާކަމަށެވެ. އެއީ ހަފްތާގެ އާދިއްތަ، އަންގާރަ އަދި ހުކުރު ދުވަހުއެވެ. މިހާރު އެ އެއަރލައިނުން ދަތުރުކުރަމުން އަންނަނީ ހަފްތާއަކު 1 ފަހަރުއެވެ.
ކޯވިޑް19 އަށްފަހު މޯލްޑިވިއަންގެ ބައިނަލްއަޤްވާމީ ދަތުރުތައް ހުއްޓާލާފައި އޮތުމަށްފަހު އެ ކުންފުނިން ދަތުރުތައް ފުރަތަމަ ފަށާފައިވަނީ ޑާކާއަށެވެ. ޑާކާ ދަތުރުތައް މޯލްޑިވިއަނުން ފެށީ އޮގަސްޓް 4 ވަނަ ދުވަހުއެވެ.
މޯލްޑިވިއަންގެ ޑާކާ ދަތުރުތަކުގެ އެއްކޮޅު ޓިކެޓްގެ އަގަކީ 433 ޑޮލަރެވެ. މޯލްޑިވިއަންއަށް ގުޅައިގެން ނުވަތަ މޯލްޑިވިއަންގެ ކޮންމެ އޮފީހަކުންވެސް ބުކިން ހެއްދޭނެކަމަށް އެ އެއަރލައިނުން ބުނެއެވެ.
މޯލްޑިވިއަންއިން ބުނީ ދަތުރުކުރާ ހުރިހާ ފަސިންޖަރުންވެސް ފުލައިޓް ފުރުމުގެ 72 ގަޑިއިރު ކުރިން ކޯވިޑް19 އަށް ނެގެޓިވްކަން އަންގައިދޭ ސެޓްފިކެޓެއް ގެންނަންޖެހޭނެކަމަށެވެ. އަދި މި ސެޓްފިކެޓް ވާންވާނީ ސަރުކާރުން ހުއްދަ ދީފައިވާ ހެލްތް ސެންޓަރަކުން ހައްދާފައިވާ ސެޓްފިކެޓަކަށްކަމަށްވެސް މޯލްޑިވިއަންއިން ބުނެއެވެ. އަދި ފުރަން އައުމުގެ 24 ގަޑިއިރު ކުރިން އިމިގްރޭޝަން މެދުވެރިކޮށް ރަޖިސްޓްރީވެފައިވާން ޖެހޭނެކަމަށްވެސް ޤައުމީ އެއަރލައިން މޯލްޑިވިއަންއިން ބުނެއެވެ.