ދިރާގުޕޭ މެދުވެރިކޮށް މީރާއަށް ދައްކަންޖެހޭ ފައިސާ ދެއްކުމުގެ އިންތިޒާމް ހަމަޖައްސައިފިއެވެ.
މި ޙިދުމަތް ދިނުމާއި ބެހޭ އެއްބަސްވުމުގައި މީރާގެ ފަރާތުން ސޮއިކޮށްފައިވަނީ މީރާގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އަސްމާ ޝަފީއުއެވެ. އަދި ދިރާގުގެ ފަރާތުން ސޮއެކުރައވާފައިވަނީ ޗީފް ފައިނޭންޝަލް އޮފިސަރ ރޮބިން ވޯލްއެވެ.
މީރާގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އަޝްމާ ޝަފީއު ވިދާޅުވީ، އޮންލައިންކޮށް ފައިސާގެ މުއާމަލާތްތައް ކުރުން އިތުރުވެފައިވާ ދުވަސްވަރެއްގައި ތައާރަފްކުރެވުނު މި ޙިދުމަތާއިއެކު ކަސްޓަމަރުންނަށް އިތުރު ލުއިފަސޭހަތަކެއް ލިބިގެންދާނެކަމަށެވެ. އަދި ކުރިއަތް އޮތްތަނުގައިވެސް މިފަދަ ހިދުމަތް ފޯރުކޮށްދޭ ގިނަ ފަރާތްތަކާއި ގުޅިގެން މިފަދަ ގިނަ ހިދުމަތް ތައާރަފްކުރުމުގެ މަސައްކަތް ކުރަމުންދާކަމަށް އަސްމާ ވިދާޅުވިއެވެ.
ދިރާގުގެ ޗީފް ފައިނޭންޝަލް އޮފިސަރ ރޮބިން ވޯލް ވިދާޅުވީ، މީރާގެ ޕޭމަންޓް ޕާޓްނަރެއްގެ ގޮތުގައި ފަސޭހަ ރައްކާތެރި އަދި އިތުރުބާރުހިފޭ ޙިދުމަތެއް ދިރާގުޕޭ މެދުވެރިކޮށް ފޯރުކޮށްދެވުމަކީ ލިބޭ އުފަލެއްކަމަށެވެ. އަދި މީގެ ސަބަބުން މީރާގެ ކަލެކްޝަން ސެންޓަރަށް ކަސްޓަމަރުން ދާން ނުޖެހި ފަސޭހަކަމާއިއެކު ފައިސާދެއްކުމުގެ އިތުރު އިންތިޒާމް ހަމަޖެހިގެންދާނެކަމަށް އޭނާ ވިދާޅުވިއެވެ.
ވާރުޕޭ ޙިދުމަތް މެދުވެރިކޮށް ކުންފުނިތަކުގެ އަހަރީ ފީއާއި އެއްގަމު އުޅަނދު އަދި ކަނޑު އުޅަނދުގެ އަހަރީ ފީއާއި، ޓްރެފިކާއިގުޅެ ޖޫރިމަނާއާއި، މުދަލު ޒަކާތާއި އެއަރޕޯޓް ސެކިއުރިޓީ ފާސް ޕޭމަންޓް އަދި މިނޫންވެސް ގިނަ ފައިސާ ދަނީ ބަލައިގަންނަމުންނެވެ. ވާރުޕޭ ޙިދުމަތް މީރާގެ ވެބްސައިޓް އަދި މީރާގެ މޯބައިލް އެޕް މެދުވެރިކޮށް ލިބޭނެއެވެ.