މިއަދަކީ ރާއްޖޭގެ މުއާޞަލާތީ ސިނާއަތް ފަށައިދިން ދިވެހިރާއްޖޭގެ ގުޅުން ޕަބްލިކް ލިމިޓެޑް، ދިރާގުގެ ގައުމީ ޚިދުމަތުގައި 32 ވަނަ އަހަރު ފުރުނު ދުވަހެވެ. ދިރާގުގެ 32 ވަނަ އަހަރު ފާހަގަކުރަމުން މިދަނީ މުޅި ދުނިޔޭގެ އިޤްތިޞާދަށްވެސް ހީނަރުކަން އައިސްފައިވާ ދަނޑިވަޅެއްގައެވެ. ނަމަވެސް މިއަހަރު ދިރާގުން ވަނީ ޙިދުމަތުގައި ނަމޫނާތަކެއް ދައްކާފައެވެ.
ދިރާގަކީ ރާއްޖޭގެ އެންމެ ފުރަތަމަ މުވާސަލާތީ ޙިދުމަތް ފޯރުކޮށްދޭންފެށި ކުންފުންޏެވެ. ރަސްމީ ގޮތުން ދިރާގުގެ ޙިދުމަތްދޭންފެށީ 1988 ގައެވެ. ދިރާގުގެ 99 އިންސައްތައަކީ ދިވެހި މުވައްޒަފުންނެވެ.
މިއަހަރަކީ ކޯވިޑް19 ބަލިމަޑުކަމުގެ ސަބަބުން މުޅި ދުނިޔެއަށްވެސް އިންޓަނެޓްގެ ބޭނުން އިތުރަށް ޖެހިފައިވާ އަހަރެކެވެ. ކޯވިޑް19 ގެ ބަލިމަޑިކަން ރާއްޖެއަށްވެސް އައުމާއިއެކު އިންޓަނެޓަށް ބަރޯސާވެފައިވާ މިންވަރު ކުރިއަށްވުރެ އިތުރުވެގެންދިޔައެވެ. ލޮކްޑައުންގައި ގޭގައިތިބެ އޮފީސް މަސައްކަތާއި ކިޔެވުންވެސް އޮންލައިންކޮށް ވަނީ ކުރިއަށްގެންދަން ޖެހިފައެވެ.
މި ދަނޑިވަޅުގައިވެސް ދިރާގުން ވަނީ ޤައުމީ ކުންފުނީގެ ހައިސިއްޔަތުން ނަމޫނާ ދައްކާފައެވެ. ކޯވިޑް19ގެ ހާލަތުގައި ދިރާގުން ވަނީ މުޖުތަމަޢަށް އެހީތެރިކަން ފޯރުކޮށްދީފައެވެ. އެގޮތުން ސަރުކާރުގެ އިދާރާތަކާއި ކިޔަވާ ކުދިންނާއި އަދި ކަސްޓަމަރުންނަށް ޑޭޓާގެ ލުއި ފަސޭހަތައް ދިޔައީ ފޯރުކޮށްދެމުންނެވެ.
މީގެ އިތުރުން، އިންޓަނެޓަށް ބާރޯސާވެފައިވާ މިންވަރާ އެއްވަރަށް ޚިދުމަތް ފޯރުކޮށްދިނުމުގެ ގޮތުން ދިރާގުން ވަނީ ޚިދުމަތުގެ ފެންވަރު ރަނގަޅު ކުރުމަށް ނެޓްވޯކް ކޮލިޓީ ދަމަހައްޓަން އިންވެސްޓްމެންޓްތައް އިތުރުކޮށްފައިކަމަށް އެ ކުންފުނިން ބުނެއެވެ. ޑޭޓާއަށް އޮތް ޑިމާންޑާ އެއްވަރަށް ކަސްޓަމަރުންގެ ޚިދުމަތުގެ ތަޖުރިބާއަށް ބުރޫނާރާނެހެން ކެޕޭސިޓީ އިތުރުކުރުމުގެ މަސައްކަތްތައްވެސް ކޮށްފައިވާނެކަމަށް ދިރާގުން ބުނެއެވެ.
ދިރާގުން ރާއްޖޭގައި މުވާސަލާތީ ދާއިރާއަށް ޚިދުމަތް ފޯރުކޮށްދޭތާ މިވީ 32 އަހަރު ތެރޭ ރާއްޖޭގެ އިޖުތިމާޢީ އަދި އިޤުތިޞާދީ ތަރައްޤީއަށް އިތުރު ހަލުވިކަމެއް ވަނީ ގެނެސްދީފައިއެވެ. އަމިއްލަ ފަރުދުންގެ މުއާޞަލާތީ ބޭނުންތައް ފުއްދުމަށާއި ވިޔަފާރިތަކާއި ފަތުރުވެރިކަމުގެ ސިނާއަތް ރާއްޖޭގެ އެކި ކަންކޮޅުތަކަށް ފެތުރުމުގެ އިތުރުން، ދިވެހިރާއްޖެ ދުނިޔޭގެ ޗާޓުގައި ފެވިގެން ދިއުމަށް ވަރަށް ބޮޑު ބާރަކަށް ދިރާގުން ފޯރުކޮށްދޭ މުއާޞަލާތީ ޚިދުމަތްތައް ވެގެންދިޔައެވެ.
ދިރާގުން ފޯރުކޮށްދޭ ޚިދުމަތްތަކުގެ ފެންވަރު ރަނގަޅުކުރުމަށްޓަކައި ސްރީލަންކާ އާއި ރާއްޖެއާ ދެމެދު ސަބްމެރިން ކޭބަލެއް އަޅައި، އިތުރު 1253 ކިލޯމީޓަރުގެ ސަބްމެރިން ކޭބަލް އަކުން ރާއްޖޭގެ އެއްކޮޅުން އަނެއްކޮޅު އެންމެ ފުރަތަމަ ގުޅުވާލީވެސް ދިރާގުންނެވެ. މި ކޭބަލް އެޅުމާއެކު މުއާޞަލާތީ ޚިދުމަތުގެ ފެންވަރު އެތައް ގުނައެއް ރަނގަޅުވެ، ކަސްޓަމަރުންނަށް އެތައް ޚިދުމަތެއް އެ ކުންފުނިން އަންނަނީ ފޯރުކޮށްދެމުންނެވެ.
ދިރާގުން ވަނީ ރާއްޖޭގައި މީހުން ދިރިއުޅޭ ހުރިހާ ރަށަކަށް 3ޖީ އަދި 4ޖީގެ ޚިދުމަތް ފުޅާކޮށްފައެވެ. މީގެ އިތުރުން އެންމެފަހުގެ ޓެކްނޮލޮޖީއާއެކު ފައިބަރ ޓު ދަ ހޯމް އިންޓަނެޓްގެ ޚިދުމަތް ވެސް އެންމެ ފުޅާ ދާއިރާއެއްގައި ފޯރުކޮށްދެމުން އަންނަނީ ދިރާގުންނެވެ. މި ޚިދުމަތް މިހާރު އާބާދީގެ 76 ޕަސެންޓަށް ލިބެއެވެ.
މުއާޞަލާތީ ރޮނގުން މުޅި އޭޝިއާ ސަރަޙައްދަށް ބެލި ނަމަވެސް ރާއްޖެ އަންނަނީ ކުރިއަރާފައިވާ އެހެން ގައުމުތަކާ އެއް ސަފެއްގައި ވާދަކުރަމުންނެވެ. މިކަން ސާބިތުވާ އެއް ހެއްކަކީ މިހާރު މަދު ގައުމެއްގައި ތަޢާރަފްކޮށްފައިވާ 5ޖީ ފަދަ އެންމެ ޒަމާނީ ޚިދުމަތްތައްވެސް ދިރާގުން ރާއްޖެއަށް ފޯރުކޮށްދިނުމެވެ.
ދިރާގަކީ ހަމައެކަނި މުއާޞަލާތީ އަދި ޑިޖިޓަލް ޚިދުމަތް ފޯރުކޮށްދޭ ކުންފުންޏެއް ނޫނެވެ. ދިރާގުގެ އިޖުތިމާޢީ ޒިންމާ ނުވަތަ "ސީ.އެސް.އާރް"ގެ ދަށުން ދަނީ ކުޑަކުދިންނާއި، ޒުވާނުން ބާރުވެރިކުރުމަށް ގިނަ ގުނަ މަސައްކަތްތަކެއް ކުރަމުންނެވެ.
ކުރިއަށް އޮތްތަނުގައިވެސް ސަރުކާރުން މުއާޞަލާތީ ތަރައްޤީއަށް ކަނޑައަޅާ ލަނޑުދަނޑިތައް ހާސިލުކުރުމުގައި އަދި ސަރުކާރުގެ ސިޔާސަތު ފުރިހަމަކޮށްދިނުމުގައ ދިރާގު ދެމިހުންނާނެކަމުގެ ޔަޤީންކަން އެ ކުންފުނިން ދެއެވެ.