އެމްޓީސީސީގެ ހިއްސާއަކަށް 2 ރުފިޔާ ބަހަން އަހަރީ އާންމު ޖަލްސާގައި ފާސްކޮށްފިއެވެ.
އެމްޓީސީސީގެ 2019 ވަނަ އަހަރުގެ އަހަރީ އާންމު ޖަލްސާ ބާއްވާފައިވަނީ "ފަހިވޯޓް" ވެދުވެރިކޮށެވެ. މި ޖަލްސާގައި މުޅިއެކު ތަމްސީލްކޮށްފައިވަނީ 47 ހިއްސާދާރުންނެވެ. އެއީ ޖަލްސާގައި ބައިވެރިވި 25 ހިއްސާދާރުންނާއި ޕްރޮކްސީ މެދުވެރިކޮށް ބައިވެރިވި 42 ހިއްސާދާރުންނެވެ.
މި ޖަލްސާގައި އެމްޓީސީސީގެ މިދިޔަ އަހަރުގެ ހިއްސާގެ ފައިދާއަށް، މޫނުމަތީ އަގު ފަސް ރުފިޔާގެ ހިއްސާއަކަށް ދެ ރުފިޔާ ބަހަން ވަނީ ފާސްކޮށްފަ އެވެ. މިދިޔަ އަހަރު އެމްޓީސީސީ އަށް ސާފު ފައިދާގެ ގޮތުގައި ލިބިފައިވަނީ 53.3 މިލިއަން ރުފިޔާއެވެ.
މި ޖަލްސާގައި ސަރުކާރުގެ ފަރާތުންނާއި އާންމު ހިއްސާދާރުންގެ ފަރާތުން ޑިރެކްޓަރުން ވަނީ އައްޔަންކޮށްފައެވެ. ސަރުކާރުގެ ފަރާތުން އައްޔަންކޮށްފައިވަނީ ޗެއަރމަން މުހައްމަދު ފަހީމް، ސީއީއޯ އާދަމް އާޒިމް، އެގްޒެކްޓިވް ޑިރެކްޓަރ ޝާހިދު ހުސައިން މޫސާ، ނޮން އެގްޒެކްޓިވް ޑިރެކްޓަރ މުޙައްމަދު ފަރީދު އަދި ނޮން އެގްޒެކްޓިވް ޑިރެކްޓަރ ސިނާން އަލީއެވެ.
އާންމު ހިއްސާދާރުންގެ ފަރާތުން ޑިރެކްޓަރުންގެ މަޤާމަށް އައްޔަންކޮށްފައިވަނީ ނޮން އެގްޒެކްޓިވް ޑިރެކްޓަރަކަށް ނަޝްރަތު މުޙައްމަދެވެ. 2020 ވަނަ އަހަރަށް ކުންފުނީގެ އޮޑިޓަރުންގެ ގޮތުގައި މި ޖަލްސާގައި ހޮވާފައިވަނީ ޕްރައިސް ވޯޓަރހައުސް ކޫޕާރސްއެވެ.
މި ޖަލްސާގައި 2019 ވަނަ އަހަރުގެ އޮޑިޓްކޮށްފައިވާ ބެލެންސް ޝީޓްއާއި، ފައިދާއާއި ގެއްލުމުގެ ހިސާބާއި، ޑިރެކްޓަރުންގެ ރިޕޯޓް އަދި 2018 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ވަނީ ފާސްކޮށްފައެވެ.