ކޮޗިން ކާގޯ ފެރީގެ މައުލޫމާތު ވިޔަފާރިވެރިންނަށް ދިނުމަށް އޮންލައިން ސެޝަނެއް ބާއްވަނީ

ރާއްޖެއާއި ކޮޗިންއާ ދެމެދު ފަށާފައިވާ ކާގޯ ފެރީގެ މަޢުލޫމާތު ވިޔަފާރިވެރިންނަށް ފޯރުކޮށްދިނުމަށް އޮންލައިން ސެޝަންއެއް ބޭއްވުމަށް ހަމަޖައްސައިފިއެވެ.

މިއީ ތިލަދުންމަތީ ދެކުނުބުރީ އަތޮޅު ކައުންސިލްގެ އިދާރާއާއި، މޯލްޑިވްސް ސްޓޭޓް ޝިޕިންގ ކޮމްޕެނީ ޕްރައިވެޓް ލިމިޓެޑް އަދި ބިޒްނަސް ސެންޓަރ ކޯޕަރޭޝަން ގުޅިގެން ބާއްވާ ސެޝަންއެކެވެ.

ކުޅުދުއްފުށީގައި ރަޖިސްޓްރީ ކޮށްގެން ވިޔަފާރިކުރާ ފަރާތްތަކުގެ ތެރެއިން މިފެރީން މުދާ ގެނައުމުގެ ޝައުޤުވެރިކަން ހުރިފަރާތްތަކަށް މިހާރު ވަނީ އޮންލައިން ސެޝަންގައި ބައިވެރިވުމުގެ ފުރުސަތު ހުޅުވާލާފައެވެ. ނަން ނޯޓު ކުރުމުގެ ފުރުސަތު އަންނަ ބުދަ ދުވަހުގެ 10:00 ޖެހުމާ ހަމައަށް ވަނީ ހުޅުވާލާފައެވެ.

ނަންނޯޓުކުރާ ފަރާތްތަކުން ވިޔަފާރީގެ ނަމާއި، ވެރިފަރާތުގެ ނަމާއި، އައިޑީ ކާޑު ނަންބަރާއި، ފޯނު ނަންބަރުގެ އިތުރުން މެއިލް އެޑްރެސް ހިމަނަން ޖެހެއެވެ.

އިންޑިއާގެ ކޮޗިންއިން މުދާ ހިފައިގެން ހދ.ކުޅުދުއްފުއްޓަށް އައި ފުރަތަމަ ކާގޯ ފެރީ އެރަށަށް ބަނދަރުކޮށްފައިވަނީ މިދިޔަ ހޮނިހިރު ދުވަހުގެ ހެނދުނުއެވެ. އިންޑިއާގެ ކޮޗިންއިން ކާގޯއާ އެކީ އައި، މި ފުރަތަމަ ފެރީއަކީ އެއްފަހަރާ 3000 ޓަނުގެ މުދާ އުފުލޭ ބޯޓެކެވެ. ފުރަތަމަ ދަތުރުގައި ކުޅުދުއްފުއްޓަށް 500 ޓަނުގެ ސިމެންތިއާއި، އަދި އެހެނިހެން ބާވަތްތަކުގެ މުދާ ހިމެނޭ 2 ކޮންޓެއިނަރު ގެނެސްފައިވެއެވެ.

އިންޑިއާ-ކޮޗިން ކާގޯ ފެރީގެ ރާއްޖޭގެ އެޖެންޓަކީ މޯލްޑިވްސް ސްޓޭޓް ޝިޕިންގްއެވެ. މި ފެށި ކާގޯ ފެރީގެ ސަބަބުން އަގުހެޔޮކޮށް މުދާ ގެނައުމަށް ދިވެހި ވިޔަފާރިވެރިންނަށް މަގުފަހިވެގެންދާނެކަމަށް ސަރުކާރުން ބުނެއެވެ.