ބޯޓިން އެސޯސިއޭޝަންގެ މެންބަރުންނަށް އަމާޒުކޮށްގެން އޮންލައިން ޕްރޮމޯޝަނެއް ބޭއްވުމަށް އެމްއެމްޕީއާރުސީއާއެކު މަޝްވަރާކޮށްފިއެވެ.
މި މަޝްވަރާތައް ކުރިއަށްގެންގޮސްފައި ވަނީ ނޭޝަނަލް ބޯޓިން އެސޯސިއޭޝަންގެ މެންބަރުން އެމްއެމްޕީއާރުސީގެ މެނޭޖިންގ ޑިރެކްޓަރ ތޮއްޔިބު މުޙައްމަދާއިއެކު އޮންލައިންކޮށް ބޭއްވި ބައްދަލުވުމެއްގެ ތެރެއިންނެވެ.
ޕީއެސްއެމް ނިއުސްއަށް މައުލޫމާތުދެއްވަމުން ނޭޝަނަލް ބޯޓިން އެސޯސިއޭޝަނުން ވިދާޅުވީ، ބޯޓިން އެސޯސިއޭޝަންގެ މެންބަރުންނަށް އަމާޒުކޮށްގެން ބާއްވާ މި އޮންލައިން ޕްރޮމޯޝަން ކުރިއަށްދާނީ "ގޯ ބޯޓިން"ގެ ނަމުގައިކަމަށެވެ. މި އިވެންޓް ކުރިއަށްގެންދާނީ ނޭޝަނަލް ބޯޓިން އެސޯސިއޭޝަނާއި އެމްއެމްޕީއާރުސީއާއި ގުޅިގެންނެވެ.
މި އިވެންޓް މެދުވެރިކޮށް ނޭޝަނަލް ބޯޓިން އެސޯސިއޭޝަންގެ މެންބަރުންނަށް ތަފާތު މާކެޓްތަކުގެ އެޖެންޓުންނަށް އެމީހުންގެ ސަފާރީތައް ޕްރޮމޯޓްކުރުމުގެ ފުރުސަތު ލިބިގެންދާނެއެވެ. ބޭރުގެ އެކި މާކެޓްތަކަށް ބަހާލައިގެން ވަކިވަކިން އެ މާކެޓްތަކުގައި ރާއްޖޭގެ ބޯޓިން އިންޑަސްޓްރީ ޕްރޮމޯޓްކުރުމަކީ މި އިވެންޓްގެ އެންމެ ބޮޑު އެއް ބޭނުމެވެ. އެގޮތުން އެމެރިކާ، ޔޫރަޕް، މެދު އިރުމަތި، ސައުތް އޭޝިއާ ފަދަ މާކެޓްތަކުގައި ބޯޓިން އިންޑަސްޓްރީ ޕްރޮމޯޓްކުރާނެކަމަށް ބޯޓިން އެސޯސިއޭޝަނުން ބުނެއެވެ.
މިއީ 3 ދުވަސް ނޫނީ 4 ދުވަހުގެ އިވެންޓެއްކަމަށް އެ އެސޯސިއޭޝަނުން ބުނެއެވެ. އަދި އުއްމީދުކުރަނީ އަންނަ މަހުގެ ތެރޭގައި މި އިވެންޓް ބޭއްވުމަށްކަމަށްވެސް ބޯޓިން އެސޯސިއޭޝަނުން ވަނީ ބުނެފައެވެ.
ބޯޓިން އެސޯސިއޭޝަނުން ވިދާޅުވީ، އެމްއެމްޕީއާރުސީން ރާއްޖޭގެ ފަތުރުވެރިކަން ޕްރޮމޯޓްކުރުމަށް އޮންލައިންކޮށް ގިނަ ހަރަކާތްތަކެއް ކުރިއަށްގެންދާކަމަށެވެ. ނަމަވެސް ރާއްޖޭގެ ސަފަރީ އިންޑަސްޓްރީ ޕްރޮމޯޓްކުރުމަށް ޑިޖިޓަލީ ހަރަކާތްތައް އިތުރުކުރަން މި ބައްދަލުވުމުގައި މަޝްވަރާކުރެވުނުކަމަށެވެ.