ހުޅުމާލޭގެ ދެވަނަ ފިޔަވަހީގައި ހިމެނޭ އުމްރާނީ ތަރައްގީގެ މަސައްކަތްތައް
ކުރުމަށް ސައުދީ ސަރުކާރުން ރާއްޖެއަށްދޭ 80 މިލިއަން ޑޮލަރުގެ ލޯން
އެއްބަސްވުމުގައި ރާއްޖެއާއި ސައުދީ ސަރުކާރާއި ދެމެދު މިއަދު ސޮއިކުރައްވައިފިއެވެ.
މި ލޯން އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރ އަބްދުﷲ
ޖިހާދުއެވެ. އަދި ސައުދީ ސަރުކާރުގެ ފަރާތުން ސޮއިކުރެއްވީ، ސައުދީ ފަންޑު ފޮރ
ޑިވެލޮޕްމަންޓްގެ ވައިސް ޗެއަރމަން ޔޫސެފް އަލް ބައްސާމްއެވެ.
ސައުދީ ސަރުކާރުން ރާއްޖެއަށް ދެއްވި 80 މިލިއަން ޑޮލަރު ނުވަތަ
300 މިލިއަން ރިއާލް އަކީ 25 އަހަރުދުވަހުގެ ތެރޭގައި
ދައްކާ ހަލާސްކުރާގޮތަށް ދެއްވި ލޯނެކެވެ.
މިލޯން އަނބުރާދައްކަން ފަށަންޖެހޭނީ
އެއްބަސްވުމުގައި ސޮއިކުރާތާ 5 އަހަރު ދުވަހުގެ ތެރޭގައެވެ. މިލޯން
ބޭނުންކުރުމަށް ހަމަޖެހިފައިވަނީ ހުޅުމާލޭގެ ދެވަނަފިޔަވަހީގައި ހިމެނޭ 4 ދާއިރާއަކަށެވެ.
އެއީ، ހުޅުމާލޭގެ ހިއްކި ސަރަހައްދުގެ 1200 މީޓަރުގެ ޝީޓްޕައިލް
ކުރުމަށާއި، ހިއްކާފައިވާ ޗެނަލްތައް ގުޅާލުމަށް ބޭނުންވާ ބްރިޖްތައް
ގާއިމްކުރުމަށާއި، ހުޅުމާލެ އިކޮނޮމިކް ޒޯނާއި ހުޅުމާލޭގެ ފޭސް 2 އާއި ގުޅާލުމަށް
ބްރިޖްތައް ގާއިމްކުރުމުގެ އިތުރުން ޔޮޓްމެރީނާ އާއި އިކޮނޮމިކް ޒޯން ގުޅާލުމުގެ
މަޝްރޫއެވެ.
މި ލޯން އެއްބަސްވުމުގައި ސޮއިކުރެއްވުމަށްފަހު ފިނޭންސް މިނިސްޓަރ
އަބްދުﷲ ޖިހާދު ވިދާޅުވީ، ލޯން ހަމަޖެހި، ދެތިން މަސް ދުވަހުގެ ތެރޭގައި އެއްބަސްވުމުގައި
ސޮއިކުރެވުމަކީ، ސައުދީ ސަރުކާރާއި ދިވެހި ސަރުކާރާއި އޮތް ގުޅުން ހާމަކޮށްދޭކަމެއްކަމަށެވެ.
މީގެ އިތުރުން ސައުދީ ސަރުކާރުން ރާއްޖޭގެ ތަރައްގީއަށް އަބަދުވެސް
އެހީތެރިވެދެއްވާކަން ފާހަގަކުރައްވާ މިނިސްޓަރ ޖިހާދު ވިދާޅުވީ، ރާއްޖެއަށް ކުރިމަތިވި
ސުނާމީ ކާރިސާގައިވެސް ގެއްލުން ލިބުނު ފަރާތްތަކަށް ބޯހިޔާވަހިކަމާއި ބަނދަރުތައް
ގާއިމްކުރުމަށް ސައުދީ ސަރުކާރުން އެހީތެރިވެދެއްވާފައިވާކަމަށެވެ.
ސައުދީ ފަންޑް ފޮރ ޑިވެލޮޕްމަންޓްގެ ވައިސް ޗެއަރމަން ޔޫސެފް އަލް ބައްސާމް
ދެއްކެވި ވާހަކަފުޅުގައި، އިޖްތިމާއީ އަދި އިޤްތިޞާދީ ގޮތުންނާއި އެނޫންވެސް ރާއްޖޭގެ ތަރައްގީއަށް
އެކި ގޮތްގޮތުން އެހީތެރިވުމަށް ސައުދީ ރަސްގެފާނު ޚާއްސަ އިސްކަމެއް ދެއްވާކަން
ފާހަގަކުރެއްވިއެވެ. އަދި ރާއްޖޭގެ ތަރައްގީއަށް ފުރިހަމަ އެއްބާރުލުން އަބަދުވެސް
ސައުދީ ސަރުކާރުން ދެއްވާނެކަމަށް އެމަނިކުފާނު ވިދާޅުވިއެވެ.
މިލޯން އެހީ ހޯދުމުގައި އެންމެ އިސްދައުރެއް އަދާކުރެއްވި ފިޝަރީޒް މިނިސްޓަރ ޑރ.
މުހައްމަދު ޝައިނީ ވިދާޅުވީ، އިބްރާހިމް ނާސިރު އިންޓަރނޭޝަނަލް އެއަރޕޯޓް
ތަރައްގީ ކުރުމަށް ސައުދީ ސަރުކާރުން ދެއްވަން ނިންމަވާފައިވާ ސަތޭކަ މިލިއަން
ޑޮލަރުގެ އެއްބަސްވުމެއްގައި ވަރަށް އަވަހަށް ސޮއިކުރެވޭނެކަމަށެވެ. އަދި ސައުދީ
ސަރުކާރުގެ އެހީގައި އިހަވަންދިއްޕޮޅުގައި ތަރައްގީކުރާ އައިހެވަންގެ ފީސިބިލިޓީ
ސްޓަޑީޒްގައި ސައުދީން ފޯރުކޮށްދެއްވާ އެހީތެރިކަންވެސް މިނިސްޓަރ ޝައިނީ
ފާހަގަކުރެއްވިއެވެ.
މި ރަސްމިއްޔާތުގައި ވާހަކަ ދައްކަވަމުން ހައުސިންގ ޑިވެލޮޕްމަންޓް ކޯޕަރޭޝަންގެ
މެނޭޖިންގ ޑިރެކްޓަރ މުހައްމަދު ސައިމަން ވިދާޅުވީ، މިއީ ހުޅުމާލެ ދެވަނަ
ފިޔަވަހީގެ ތަރައްގީގެ މަސައްކަތްތައް އިތުރަށް އަވަސްކުރުމަށް ލިބުނު
ފުރުސަތެއްކަމަށެވެ. އެގޮތުން ހުޅުމާލެ
ދެވަނަ ފިޔަވަހީގެ ދަށުން ކުރިއަށް ގެންދިއުމަށް ހަމަޖެހިފައިވާ ތަރައްޤީގެ އެކި
ޕްލޭންތައް ކުރިއަށްދާއިރު މި ލޯން ލިބުމުން މި މަސައްކަތްތަކަށް އިތުރު ހަލުވިކަމެއް
އަންނާނެކަން ސައިމަން ފާހަގަކުރެއްވިއެވެ.
ހުޅުމާލޭގެ ދެ ފިޔަވަހީގެ މަސައްކަތް
ނިމިގެންދާއިރު ދެލައްކަ ތިރީސް ހާސް މީހުން އާބާދުކުރެވޭނެކަމަށް ސަރުކާރުން
ލަފާކުރައްވައެވެ.