އެމްއެމްޕީއާރުސީން ކުރިއަށްގެންދާ ރީޑިސްކަވަރ މޯލްޑިވްސް ވެބިނަރގެ ފުރަތަމަ ތިން ސެޝަން ނިންމާލައިފިއެވެ.
"ރީޑިސްކަވަރ މޯލްޑިވްސް – ދަ ސަނި ސައިޑް އޮފް ލައިފް" ކެންޕެއިން އަކީ ދިވެހިރާއްޖޭގެ ބޯޑަރު ފަތުރުވެރިންނަށް އަލުން ހުޅުވާލުމާއިއެކު ފެށި ކެންޕެއިނެކެވެ. މި ކެންޕެއިންގެ ދަށުން ދިވެހިރާއްޖެއާއިމެދު ފަތުރުވެރިންގެ އިތުބާރު އިތުރުވެގެންދާނެކަމަށް އެމްއެމްޕީއާރުސީން ވިދާޅުވެއެވެ.
މި ކެންޕެއިން ފަށާފައިވަނީ މިމަހުގެ 1 ވަނަ ދުވަހުއެވެ. މި ވެބިނަރ ސީރީޒްގެ ފުރަތަމަ 3 ސެޝަން މިހާރު ވަނީ ނިންމާލާފައެވެ. ފުރަތަމަ ސެޝަން މިމަހުގެ 1 ވަނަ ދުވަހު ބާއްވާފައިވަނީ މެދުއިރުމަތީގެ މާކެޓަށް އަމާޒުކޮށްގެންނެވެ. 2 ވަނަ ސެޝަން ބާއްވާފައިވަނީ މިމަހުގެ 8 ވަނަ ދުވަހު ޔޫރަޕާއި އެމެރިކާ މާކެޓަށް އަމާޒުކޮށްގެންނެވެ. އޭޝިޔާ ސަރަހައްދުގެ ޤައުމުތަކަށް ޚާއްސަކޮށްގެން މި ސެޝަން ބާއްވާފައިވަނީ މިމަހުގެ 10ވަނަ ދުވަހުއެވެ.
މި ވެބިނަރތަކުގެ އެންމެ ބޮޑު ބޭނުމަކީ ރާއްޖެއަކީ ދަތުރުކުރަން ރައްކާތެރި މަންޒިލެއްކަން ފަތުރުވެރިންނަށް ބުނެދިނުންކަމަށް އެމްއެމްޕީއާރުސީން ވިދާޅުވެއެވެ. މި ވެބިނަރތަކުގައި އެމްއެމްޕީއާރުސީން ވަނީ ދިވެހިރާއްޖޭގައި ފަތުރުވެރިންނަށް ކުރެވެން ހުންނަ ޚާއްސަ ތަޖުރިބާތަކުގެ ކެންޕެއިނެއްވެސް ލޯންޗްކޮށްފައެވެ. "އަ ޑަޒަން މަސްޓް ޑޫ އެކްސްޕީރިއަންސަސް އިން މޯލްޑިވްސް" ގެ ނަމުގައި ލޯންޗްކުރި ކެންޕެއިނުގައި ހިމެނޭ ބައެއް ކަންކަމަކީ ފަތުރުވެރިންނަށް ހަމައެކަނި ދިވެހިރާއްޖޭގައި ތަޖުރިބާ ކުރެވޭނެ ކަންކަމެވެ.
ފަތުރުވެރިކަމުގެ ދާއިރާގެ ބައެއް ފަރާތްތަކުން ވަނީ މި ވެބިނަރ ސެޝަންތަކުގައި ބައިވެރިވެ އެ ތަންތަނުގެ ޚާއްސަ ތަޖިރިބާތައް ހިމެނޭ ވީޑިއޯތައް ބައިވެރިންނަށް ދައްކާލާފައެވެ.