ރަޝިޔާގެ އޭރޯފްލޮޓުން ރާއްޖެއަށްކުރާ ދަތުރުތައް އަލުން ފެށުމަށް ނިންމައިފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލުން ބުނީ އެއިރޯފްލޮޓުން އަންނަ ހުކުރު ދުވަހު ރާއްޖެއަށް ޝެޑިއުލް ދަތުރުތައް ފެށުމަށް މިހާރު ތާވަލްކޮށްފައިވާކަމަށެވެ.
ކޯވިޑް19 އަށްފަހު އޭރޯފްލޮޓުން ރާއްޖެއަށް ކުރަމުންދިޔަ ދަތުރުތައް މެދުކަނޑާލުމަށްފަހު އަލުން ދަތުރުތައް ފަށާއިރު، އެއަރލައިންގެ ފުރަތަމަ ފުލައިޓް ރާއްޖެ އަންނާނީ އަންނަ ހުކުރު ދުވަހުގެ ހެނދުނުގެ ވަގުތެއްގައެވެ.
އެ އެއަރލައިނުން ނެރުނު ބަޔާނެއްގައި ބުނެފައިވަނީ ދަތުރުތައް އަލުން ފަށާއިރު ރަޝިޔާއާއި ރާއްޖެއާއި ދެމެދު ހަފްތާއަކު ދެ ފްލައިޓު ބާއްވަން ނިންމާފައިވާކަމަށެވެ. މި ދަތުރުތައް ކުރާނީ ރަޝިޔާގެ ޝެރެމެޓޭވޯ އެއާޕޯޓުން ވެލާނާ އިންޓާނޭޝަނަލް އެއާޕޯޓަށެވެ. އެގޮތުން ރަޝިއާއިން ރާއްޖެއަށް ފްލައިޓް ބާއްވަން ހަމަޖެހިފައިވަނީ ހަފްތާގެ ބުރާސްފަތި އަދި އާދިއްތަ ދުވަހުއެވެ. މާލެއިން ރަޝިޔާއަށް ދަތުރުތައް ކުރާނީ ހުކުރު އަދި އާދިއްތަ ދުވަހުއެވެ.
ރަޝިޔާއިން ރާއްޖެއަށް ދަތުރު ފަށާއިރު އެ ގައުމަކީ ރާއްޖޭގެ ފަތުރުވެރިކަމުގެ މުހިންމު މާކެޓެކެވެ. ރާއްޖޭގެ ބޯޑަރު އަލުން ހުޅުވާލުމާއިއެކު އެންމެ ގިނައިން ފަތުރުވެރިން ޒިޔާރަތްކުރި 5 ޤައުމުގެ ތެރޭގައިވެސް ރަޝިއާ ހިމެނެއެވެ. ޖުލައިމަހުގެ 15 ވަނަ ދުވަހުން އޮގަސްޓް މަހުގެ ނިޔަލަށް ރަޝިއާއިން ރާއްޖެއަށް 423 ފަތުރުވެރިން ވަނީ ޒިޔާރަތްކޮށްފައެވެ.
ރަޝިއާގެ ފްލެގް ކެރިއާ އެއިރޯފްލޮޓްއިން ރާއްޖެއަށް އަލުން ދަތުރުތައް ފަށާއިރު އެ އެއަރލައިނުން ދުބާއީއާއި މިސްރުގެ ވެރިރަށް ކައިރޯއަށް ކުރަމުން އައި ދަތުރުތައްވެސް މިމަހުގެ ތެރޭގައި އަލުން ފެށުމަށް ވަނީ ނިންމާފައެވެ.