ދިވެހިރާއްޖޭގައި ޝިޕިންގ އެޖެންސީގެ ޚިދުމަތް ދިނުމާބެހޭ ގަވާއިދަށް އެޖެންޓުންގެ ޚިޔާލު ހޯދުމަށް ޓްރާންސްޕޯޓް އޮޓޯރިޓީން ހުޅުވާލައިފިއެވެ.
މޯލްޑިވްސް ޓްރާންސްޕޯޓް އޮތޯރިޓީން ވިދާޅުވީ، ދިވެހިރާއްޖޭގައި ޝިޕިންގ އެޖެންސީގެ ޚިދުމަތް ދިނުމާބެހޭ ގަވާއިދާ ގުޅޭގޮތުން ޓްރާންސްޕޯޓް އޮތޯރިޓީގެ ބޯޑު މެންބަރުން ޝިޕިންގ އެޖެންޓުންނާއި ފޯވަރޑިންގ އެޖެންޓުނާއި ބައްދަލުކޮށް މަޝްވަރާކުރުމަށް ހަމަޖެހިފައިވާކަމަށެވެ.
މި ބައްދަލުވުން އޮންނާނީ މިމަހުގެ 10 ވަނަ ދުވަހުއެވެ. އެހެންކަމުން މި ބައްދަލުވުމުގައި ބައިވެރިވުމަށް ބޭނުންވާ ޝިޕިން އެޖެންޓުންނާއި ފުރައިޓު ފޯވަރޑަރުންނަށް މިހާރު ވަނީ އެ ފުރުސަތު ހުޅުވާލާފައެވެ. މި ބައްދަލުވުމުގައި ބައިވެރިވާން ބޭނުންވާ ފަރާތްތަކުން މިމަހުގެ 9 ވަނަ ދުވަހުގެ ކުރިން ޓްރާންސްޕޯޓް އޮޓޯރިޓީއަށް މެއިލްކުރަން އެ މިނިސްޓްރީން ވަނީ އަންގާފައެވެ. މެއިލްކުރާއިރު ބައްދަލުވުމުގައި ބައިވެރިވާ ފަރާތުގެ ނަމާއި ގުޅޭނެ ނަންބަރާއި، ޝިޕިންގ އެޖެންޓެއްކަން ނުވަތަ ފޯވާޑިންގ އެޖެންޓެއްކަން ކުރާކަން ބަޔާންކުރަންޖެހޭނެއެވެ.
ޓްރާންސްޕޯޓް އޮޓޯރިޓީން ވިދާޅުވީ، މިއީ ސިލްސިލާ ބައްދަލުވުމެއްކަމަށެވެ. އެގޮތުން އިމްޕޯޓަރުންނާއި ދާއިރާއާއި ގުޅުންހުރި ވިޔަފާރި ޖަމުޢިއްޔާތަކާއި އާގު ބޯޓުފަހަރުގެ ވެރިންނާއި އާގު ބޯޓުފަހަރު އޮޕަރޭޓު ކުރައްވާ ފަރާތްތަކާއި އަދި އާގުބޯޓުފަހަރު ޗާޓަރު ކުރައްވާ ފަރާތްތަކާއި ވަކިވަކިން ބައްދަލު ކުރުމަށް ހަމަޖެހިފައިވާކަމަށް އެ މިނިސްޓްރީން ވިދާޅުވެއެވެ.
ރާއްޖޭގައި ޝިޕިންގ އެޖެންސީގެ ޚިދުމަތް ދިނުމާބެހޭ ގަވާއިދުގައި މޯލްޑިވްސް ޓްރާންސްޕޯޓް އޮތޯރިޓީގައި ރަޖިސްޓަރީނުކޮށް އެއްވެސް ފަރާތަކުން ޝިޕިންގ އޭޖެންސީގެ ޚިދުމަތް ދިނުމަކީ މަނާކަމެކެވެ. ޝިޕިން އެޖެންޓުންނާއި ފުރައިޓް ފޯވަޑަރުންގެ ގޮތުގައި ހަރަކާތްތެރިވުމަށް މިހާތަނަށް 21 ފަރާތަކަށް ހުއްދަދީފައިވާކަމަށް ޓްރާންސްޕޯޓް މިނިސްޓްރީން ބުނެއެވެ.