ޤައުމުގެ މަސްލަހަތު ގެއްލޭގޮތަށް ސިޔާސީ ޕާޓީތަކުން ހިތްވަރު ނުދިނުމަށް އިލެކްޝަންސް ކޮމިޝަނުގެ ރައީސް އަޙްމަދު ޝަރީފް އިލްތިމާސްކުރައްވައިފިއެވެ.
ޝަރީފް މި އިލްތިމާސްކުރައްވާފައި ވަނީ، ރާއްޖޭގެ ޓީވީ ޗެނެލަކުން ގެނެސްދިން ޕްރޮގްރާމެއްގައި ރައީސުލް ޖުމްހޫރިއްޔާގެ ހަށިކޮޅުގައި ހުޅުޖަހަން ގޮވާލި މައްސަލައަކާއި ގުޅިގެން ކުރެއްވި ޓްވީޓެއްގައެވެ.
ޓީވީ ޗެނެލަކުން ގެނެސްދިން ޕްރޮގްރާމެއްގައި ރައީސުލްޖުމްހޫރިއްޔާގެ ހަށިކޮޅުގައި ހުޅުޖަހަން ގޮވާލާ އެކަމަށް ހިތްވަރު ލިބޭގޮތަށް ވާހަކަދައްކާފައިވާ ވީޑިއޯއެއް ސޯޝަލް މީޑީއާގައި ދަނީ ދައުރުވަމުންނެވެ. އެވީޑިއޯ ސޯޝަލް މީޑިއާގައި ހިއްސާކޮށް އެކަމުގެ ކަންބޮޑުވުން ފާޅުކޮށްފައިވާ ޕޯސްޓަކާއި ގުޅިގެން އިލެކްޝަންސް ކޮމިޝަންގެ ރައީސް އަޙުމަދު ޝަރީފް ވިދާޅުވީ، ސިޔާސީ ޕާޓީތަކުން ޤައުމުގެ މަސްލަހަތު ގެއްލޭފަދަ ކަންކަމަށް އެއްގޮތަކަށްވެސް ހިތްވަރު ނުދިނުމަށް ގޮވާލައްވާކަމަށެވެ.
ޝަރީފް މިހެން ވިދާޅުވެފައިވާއިރު، ރާޢްޖޭގެ ޓީވީ ޗެނަލްއަކުން ގެނެސްދިން ޕްރޮގްރާމެއްގައި ރައީސުލް ޖުމްހޫރިއްޔާ އިބްރާޙިމް މުހައްމަދު ޞާލިޙްގެ ހަށިކޮޅުގައި ހުޅުޖެހުމަށް ގޮވާލާފައިވާ މައްސަލައެއް ބަލަމުން އަންނަކަމަށް ފުލުހުން ވަނީ ވިދާޅުވެފައެވެ. އަދި މޯލްޑިވްސް ބްރޯޑްކާސްޓިން ކޮމިޝަނުންވެސް އެމައްސަލަ ބަލަމުން އަންނަކަމަށް އެކޮމިޝަނުން ވަނީ ވިދާޅުވެފައެވެ.
ސިޔާސީ ޕާޓީތަކުގެ ހަރަކާތްތައް އިންސާނީ ކަރާމަތާއި ރައްކާތެރިކަމަށް އިސްކަންދީގެން ކުރިޔަށް ގެންދިޔުމަށް އިލެކްޝަންސް ކޮމިޝަނުން ވަނީ ޕާޓީތަކަށް އިލްތިމާސްކޮށްފައެވެ.