ދިވެހިރާއްޖޭގެ ކަނޑުމަހުގެ މެނޭޖްމަންޓް ޕްލޭންއަށް އާއްމުންގެ ޙިޔާލު ހުށައެޅުމުގެ ފުރުސަތު މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ހުޅުވާލައިފިއެވެ.
މަސްވެރިކަމުގެ އެކި މެނޭޖްމަންޓް ޕްލޭންތަކަށް އާންމުންގެ ޚިޔާލު ހޯދުމުގެ ފުރުސަތު އެ މިނިސްޓްރީން އަންނަނީ ހުޅުވާލަމުންނެވެ. ފިޝަރީޒް މިނިސްޓްރީން ވިދާޅުވީ، "ކަނޑުމަހުގެ މެނޭޖްމަންޓް ޕްލޭން" އަށް އާންމުންގެ ޙިޔާލު ހުށައެޅުމުގެ ފުރުސަތު މިމަހުގެ 9 ވަނަ ދުވަހުގެ ނިޔަލަށް ހުޅުވާލާފައިވާކަމަށެވެ. ޚިޔާލު ހުށައެޅުމުގެ ފުރުސަތު އެ މިނިސްޓްރީން ހުޅުވާލީ އިއްޔެއެވެ. ޙިޔާލު ހުށައެޅުމަށް ބޭނުންވާ ފަރާތްތަކުން މިނިސްޓްރީން ކަނޑައަޅާފައިވާ ފޯމެއް ފުރުމަށްފަހު މިނިސްޓްރީއަށް އީމެއިލް ކުރުމަށް އެ މިނިސްޓްރީން ވަނީ އަންގާފައެވެ.
ކަނޑުމަހުގެ މެނޭޖްމަންޓް ޕްލޭން އަށް އާންމުންގެ ޙިޔާލު ހުށައެޅުމުގެ ފުރުސަތު ހުޅުވާލާފައިވާއިރު ފިޝަރީޒް މިނިސްޓްރީން މީގެކުރިން ވަނީ އެ މިނިސްޓްރީން ހަދަމުންދާ އެހެން މެނޭޖްމަންޓް ޕްލޭންތަކަށްވެސް އާންމުންގެ ޚިޔާލަށް ހުށައަޅާލާފައެވެ. އޭގެތެރޭގައި "ދިވެހިރާއްޖޭގެ ފާނަ މެނޭޖްކުރުމާއިބެހޭ ޕްލޭން" އާއި "ދިވެހިރާއްޖޭގެ ހުއިފިލަނޑާ މެނޭޖްކުރުމާއިބެހޭ ޕްލޭން" އާއި "ދިވެހިރާއްޖޭގެ ހިބަރު މަސްވެރިކަން މެނޭޖްކުރުމާއިބެހޭ ޕްލޭން" ގެ އިތުރުން "ދިވެހިރާއްޖޭގެ ތުތި ބޯވަދިލަމަސް މެނޭޖްކުރުމާބެހޭ ޕްލޭން" އަދި "ދިވެހިރާއްޖޭގެ ދިރޭކުދިމަހުގެ މަސްވެރިކަން (އެކުއޭރިއަމް ފިޝަރީ) މެނޭޖްކުރުމާބެހޭ ޕްލޭން" ހިމެނެއެވެ. މި މެނޭޖްމަންޓް ޕްލޭންތަކަށް ޙިޔާލު ހުށައެޅުމުގެ ފުރުސަތު މިމަހުގެ 6 ވަނަ ދުވަހުގެ ނިޔަލަށް އޮންނާނެއެވެ.
ރާއްޖޭގެ މަސްވެރިކަން ކުރިއަރުވައި ޒުވާނުން މަސްވެރިކަމުގެ ސިނާއަތައް ނެރުމަށްޓަކައި ފިޝަރީޒް މިނިސްޓްރީން އަންނަނީ ގިނަ މަސައްކަތްތަކެއް ކުރަމުންނެވެ.