އިންޑިއާގެ ކުރީގެ ރައީސް ޕްރަނާބް މުކަރުޖީ އަވަހާރަވުމަކީ ދެކުނު އޭޝިއާ ސަރަޙައްދަށް ލިބުނު ބޮޑު ހިތާމައެއްގެ ގޮތުގައި ސިފަކުރައްވާ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަޢުޒިޔާ ވިދާޅުވެއްޖެއެވެ.
ޢުމުރުފުޅުން 84 އަހަރުފުޅުގެ ޕްރަނާބް މުކަރުޖީ އަހަރަވެފައިވަނީ އިންޑިއާގެ އަސްކަރީ ހޮސްޕިޓަލެއްކަމަށްވާ އާމިސް ރިސާރޗް އެންޑް ރެފެރަލް ހޮސްޕިޓަލުގައި ފަރުވާދެއްވަމުން ގެންދަވަނިކޮށެވެ. ޕްރަނާބް މުކަރްޖީ އަވަހާރަވެފައިވާކަން އޭނާގެ ދަރިކަލުން އަބިޖީތު މުކަރުޖީވަނީ ޓްވިޓަރ މެދުވެރިކޮށް ހާމަކުރައްވާފައެވެ.
ޕްރަނާބް މުކަރުބީ އަވަހާރަވުމާއި ގުޅިގެން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްކުރެއްވި ޓްވީޓެއްގައި ވަނީ ޕްރަނާބް މުކަރްޖީގެ ޢާއިލާއަށާއި، އިންޑިއާގެ ރައްޔިތުންނަށް ތަޢުޒިޔާ ވިދާޅުވެފައެވެ. ޕްރަނާބް މުކަރުޖީ އަވަހާރަވުމަކީ އިންޑިއާއަށާއި، މުޅި ދެކުނު އޭޝިއާއަށްވެސް ކުރިމަތިވި ބޮޑު ހިތާމައެއްގެ ގޮތުގައި ރައީސުލްޖުމްހޫރިއްޔާ ވަނީ ސިފަކުރައްވާފައެވެ.
އިންޑިޔާގެ ރައީސްކަން 2012ވަނަ އަހަރުން 2017ވަނަ އަހަރަށް ކުރެއްވި ޕުރަނާބު މުކަރުޖީ އަވަހާރަވީ އޮގަސްޓު މަހުގެ 10ވަނަ ދުވަހުން ފެށިގެން ހަސްފަތާލުގައި ފަރުވާދަމުން ދަނިކޮށެވެ. ހަސްފަތާލުގައި އޭނާ އެނދުމަތިކޮށްފައިވަނީ ޞިއްޙީ ޙާލުކޮޅު ވަރަށް ބޮޑަށް ގޯސްވުމާ ގުޅިގެންނެވެ. ހަސްފަތާލުގައި ކުރި ތަހުލީލުތަކުން އޭނާގެ ސިކުނޑީގައި ލޭ ގަނޑުވެފައިވާކަމަށްވަނީ ދައްކާފައެވެ. އެއަށްފަހު ކުއްލި އޮޕަރޭޝަނެއްކުރުމަށްފަހު އޭނާ އޮންނެވީ ވެންޓިލޭޓަރުގައެވެ.
ހަސްފަތާލުގައި އެނދުމަތިކުރުމުގެ ކުރިން އޭނާއަށް ކޯވިޑް-19 ޖެހިފައިވާކަމަށް ޕްރަނާބް މުކަރްޖީވަނީ ހާމަކުރައްވާފައެވެ.