މަސްވެރިކަމުގެ 3 މެނޭޖްމަންޓް ޕްލޭންއަކަށް ޢާއްމުންގެ ޙިޔާލު ހުށަހެޅުމުގެ ފުރުސަތު ހުޅުވާލައިފި
މަސްވެރިކަމުގެ މެނޭޖްމަންޓް ޕްލޭންތަކަށް އާންމުންގެ ޚިޔާލު ހުށައެޅުމުގެ ފުރުސަތު މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ހުޅުވާލައިފިއެވެ.
ފިޝަރީޒް މިނިސްޓްރީން ޚިޔާލު ހުށައެޅުމުގެ ފުރުސަތު ހުޅުވާލާފައިވަނީ މަސްވެރިކަމުގެ ޤާނޫނުގެ ދަށުން އެ މިނިސްޓްރީން ހަދަމުންދާ މެނޭޖްމަންޓް ޕްލޭންތަކުގެ ތެރެއިން 3 ޕްލޭންއަކަށެވެ. އެއީ "ދިވެހިރާއްޖޭގެ ފާނަ މެނޭޖްކުރުމާއިބެހޭ ޕްލޭން" އާއި "ދިވެހިރާއްޖޭގެ ހުއިފިލަނޑާ މެނޭޖްކުރުމާއިބެހޭ ޕްލޭން" އަދި "ދިވެހިރާއްޖޭގެ ހިބަރު މަސްވެރިކަން މެނޭޖްކުރުމާއިބެހޭ ޕްލޭން"އެވެ.
މި މެނޭޖްމަންޓް ޕްލޭންތަކާއިމެދު ޙިޔާލު ހުށައެޅުމަށް ބޭނުންވާ ފަރާތްތަކުން މިނިސްޓްރީން ކަނޑައަޅާފައިވާ ފޯމެއް ފުރުމަށްފަހު މިނިސްޓްރީއަށް އީމެއިލް ކުރަންޖެހެއެވެ. ޚިޔާލު ހުށައެޅުމުގެ ސުންގަޑިއަކީ އަންނަ މަހުގެ 6 ވާ އާދިއްތަ ދުވަހުގެ ހެނދުނު 10 ޖެހުމުގެ ކުރިންނެވެ.
ފިޝަރީޒް މިނިސްޓްރީން ބުނީ މި މެނޭޖްމަންޓް ޕްލޭންތަކުގެ އިތުރުންވެސް އެހެނިހެން ބާވަތްތަކުގެ މަސްވެރިކަމުގެ ޕްލޭންތަކާއި މެދުވެސް ޚިޔާލު ހުށައެޅުމުގެ ފުރުސަތު ހުޅުވާލާނެކަމަށެވެ. ރާއްޖޭގެ މަސްވެރިކަން ކުރިއަރުވައި ޒުވާނުން މަސްވެރިކަމުގެ ސިނާއަތައް ނެރުމަށްޓަކައި ފިޝަރީޒް މިނިސްޓްރީން އަންނަނީ ގިނަ މަސައްކަތްތަކެއް ކުރަމުންނެވެ.