މިދިޔަ އަހަރުގެ ޖުލައިމަހާއި އަޅާބަލާއިރު މިއަހަރުގެ ޖުލައިމަހު އިމްޕޯޓް އަދި އެކްސްޕޯޓުން ދައުލަތަށް ލިބުނު އާމްދަނީ 0.6 އިންސައްތަ އިތުރުވެއްޖެއެވެ.
ކަސްޓަމްސްގެ ހިސާބުތަކުން ދައްކާގޮތުން އިމްޕޯޓް އެކްސްޕޯޓުން ލިބުނު އާމްދަނީ އިތުރުވިނަމަވެސް މި މުއްދަތުގައި އިމްޕޯޓް އަދި އެކްސްޕޯޓް ކުރެވުނު މުދަލުގެ އަދަދު ވަނީ ދަށްވެފައެވެ.
މޯލްޑިވްސް ކަސްޓަމްސް ސަރވިސްގެ ތަފާސް ހިސާބުތައް ދައްކާގޮތުން މިދިޔަ އަހަރުގެ ޖުލައިމަހު 3.7 ބިލިއަން ރުފިޔާގެ މުދާ ވަނީ ރާއްޖެއަށް އިމްޕޯޓްކޮށްފައެވެ. ނަމަވެސް ނިމުނު ޖުލައިމަހު ދިވެހިރާއްޖެއަށް އިމްޕޯޓްކޮށްފައި ވަނީ 1.9 ބިލިއަން ރުފިޔާގެ މުދަލެވެ. މިއީ 49 އިންސައްތައިގެ ދަށްވުމެކެވެ.
އެކްސްޕޯޓަށް ބަލާއިރު މިދިޔަ އަހަރުގެ ޖުލައިމަހު 208 މިލިއަން ރުފިޔާގެ މުދާ އެކްސްޕޯޓްކޮށްފައިވާއިރު، ނިމުނު ޖުލައިމަހު އެކްސްޕޯޓްކޮށްފައި ވަނީ 203 މިލިއަން ރުފިޔާގެ މުދަލެވެ. މިއީ 2 އިންސައްތައިގެ ދަށްވުމެކެވެ.
ކަސްޓަމްސްގެ ތަފާސް ހިސާބުތައް ދައްކާގޮތުން އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ މި މުއްދަތުގައި ވަނީ އިތުރުވެފައެވެ. މިދިޔަ އަހަރުގެ ޖުލައިމަހު އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީއަކީ 292 މިލިއަން ރުފިޔާއެވެ. މިއަހަރުގެ ޖުލައިމަހު މިއަދަދު ވަނީ 293 މިލިއަނަށް އިތުރުވެފައެވެ.
ފާއިތުވި ޖުލައިމަހު ރާއްޖެއަށް އެންމެ ގިނައިން މުދާ ގެނެސްފައިވާ 5 ޤައުމުގެ ތެރޭގައި ހިމެނެނީ އޮމާން، އިންޑިއާ، ޗައިނާ، ސިންގަޕޫރު އަދި ޔޫއޭއީއެވެ. ރާއްޖެއިން އެންމެ ގިނައިން މުދާ ބޭރުކޮށްފައިވަނީ އިނގިރޭސިވިލާތަށެވެ. އެއީ 16 އިންސައްތައިގެ މުދަލެވެ. މީގެއިތުރުން ވިއެޓްނާމް، ޖަރުމަނުވިލާތް، ފަރަންސޭސިވިލާތް، އަދި އެމެރިކާއަށްވެސް ވަނީ ރާއްޖެއިން މުދާ އެކްސްޕޯޓްކޮށްފައެވެ.
މިދިޔަ އަހަރުގެ ޖުލައިމަހާއި އަޅާބަލާއިރު މިއަހަރުގެ ޖުލައިމަހު ރާއްޖެ އެތެރެވި އުޅަނދުފަހަރުގެ އަދަދު މަދުވިނަމަވެސް ރާއްޖެއިން ފުރާފައިވާ އުޅަނދުގެ އަދަދު ވަނީ އިތުރުވެފައެވެ. އެގޮތުން މިދިޔަ އަހަރުގެ ޖުލައިމަހު މުދާ ހިފައިގެން ރާއްޖެއަށް 79 އުޅަނދެއް އެތެރެވެފައިވާއިރު މިއަހަރުގެ ޖުލައިމަހު އެތެރެވެފައިވަނީ 72 އުޅަނދެވެ. އަދި މިދިޔަ އަހަރުގެ ޖުލައިމަހު ރާއްޖެއިން 86 އުޅަނދެއް ފުރާފައިވާއިރު، މިއަހަރުގެ ޖުލައިމަހު ފުރާފައިވަނީ 99 އުޅަނދެކެވެ.
މުދާ ކްލިއަރކުރުމަށް ޕްރޮސެސްކުރެވުނު ޑެކްލެރޭޝަންގެ އަދަދުވެސް ފާއިތުވި ޖުލައިމަހު ވަނީ ބޮޑުތަނުން ދަށްވެފައެވެ. މިދިޔަ އަހަރުގެ ޖުލައިމަހު ޕްރޮސެސްކުރެވުނު ޑެކްލެރޭޝަންގެ އަދަދު 19945 ގައި އުޅޭއިރު، މިއަހަރު ޖުލައިމަހު ޕްރޮސެސްކޮށްފައިވަނީ 8016 ޑިކްލެރޭޝަންކަމަށް ކަސްޓަމްސްގެ ތަފާސްހިސާބުތަކުން ދައްކައެވެ.