ރަޝިއާގެ 360 ޑިގްރީ ޗެނަލްގައި ރާއްޖެ އިޝްތިހާރުކުރުމުގެ ހަރަކާތްތަކެއް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމްއެމްޕީއާރުސީން ފަށައިފިއެވެ.
360 ޑިގްރީ ޗެނަލްއަކީ ރަޝިއާގެ ސެންޓްރަލް ރީޖަންއާއި މޮސްކޯގައި ވަރަށް މަޤްބޫލް ޓީވީ ޗެނަލެކެވެ.
އެމްއެމްޕީއާރުސީން ބުނީ މި ކެމްޕެއިނަކީ ރަޝިއާއިން ރާއްޖެ އަންނަން ބޭނުންވެފައިވާ ފަތުރުވެރިންނަށް "ވިޒިޓް މޯލްޑިވްސް ސޫން" މެސެޖް ފޯރުކޮށްދިނުމަށް ކުރިއަށްގެންދާ ކެމްޕެއިނެއްކަމަށެވެ. 360 ޑިގްރީ ޗެނަލްއާއިއެކު ކުރިއަށްގެންދާ މި ކެމްޕެއިންގެ ސަބަބުން ރަޝިއާގެ 3 މިލިއަނެއްހާ މީހުންނަށް މެސެޖް ލިބިގެންދާނެކަމަށް އެމްއެމްޕީއާރުސީން ބުނެއެވެ.
މި ކެމްޕެއިންގެ ދަށުން ބެލުންތެރިން އެންމެ ގިނައިން މި ޗެނަލް ބަލާ ގަޑިތައް ފާހަގަކޮށް އެގަޑިތަކުގައި ރާއްޖެ އިޝްތިހާރުކުރަމުންދާނެއެވެ. އެގޮތުން ހެނދުނާއި ރޭގަނޑުގެ ޙަބަރު ގަޑިތަކުގެ އިތުރުން ހަފްތާ ބަންދުގެ މޫސުން ކުރިއަށްލަފާކުރާގޮތް ދައްކާ ވަގުތުގައި ރާއްޖޭގެ ހިތްގައިމު ވީޑިއޯތައް ދައްކާނެއެވެ. އަދި ރާއްޖެއަށް ޒިޔާރަތްކުރަން ބޭނުންވާ ފަތުރުވެރިންނަށް ރާއްޖެ އައިސް ޗުއްޓީ ހޭދަކުރުމަށް ކުރެވިދާނެ ކަންތައްތައް ރަޝިއާ ބަހުން އަޑުއަޅާފައިވާ ވީޑިއޯ މެދުވެރިކޮށް ދައްކާނެކަމަށް އެމްއެމްޕީއާރުސީން ބުނެއެވެ.
މިއީ ދިވެހިރާއްޖޭގެ ބްރޭންޑަށް ހޭލުންތެރިކަން އިތުރުކޮށް ރަޝިއާގެ ފަތުރުވެރިންގެ މެދުގައި އެންމެ މަޤްބޫލް ފަތުރުވެރިކަމުގެ މަންޒިލެއްގެ ގޮތުގައި ރާއްޖެ ހެދުމަށް ކުރިއަށްގެންދާ ހަރަކާތުގެ ތެރެއިން އެއް ހަރަކާތެވެ.
އެމްއެމްޕީއާރުސީގެ މެނޭޖިންގ ޑިރެކްޓަރ ތޮއްޔިބު މުޙައްމަދު ވިދާޅުވީ، ރަޝިއާގެ މާކެޓަށް އަމާޒުކޮށް ޑިޖިޓަލް ޕްލެޓްފޯމްތަކުގައި ރާއްޖެ އިޝްތިހާރުކުރުން އިތުރުކޮށް، ގިނަ ހަރަކާތްތަކެއް ކުރިއަށްގެންދިއުމަށް ރާވާފައިވާކަމަށެވެ. ރަޝިއާއިން ރާއްޖެ އަންނަ ފަތުރުވެރިންގެ އަދަދު އިތުރުކުރުމަށް ޓުއަރ އޮޕަރޭޓަރުންނާއި، ޓްރެވެލް އެޖެންޓުންނާއި ގުޅިގެން ކެމްޕެއިންތަކެއްވެސް ކުރިއަށްގެންދިއުމަށް ހަމަޖެހިފައިވާކަމަށް ތޮއްޔިބު ވިދާޅުވިއެވެ.
ރަޝިއާއަކީ އަބަދުވެސް ރާއްޖެއަށް ގިނަ އަދަދަކަށް ފަތުރުވެރިން އަންނަ ޤައުމެކެވެ. އެގޮތުން މިދިޔަ އަހަރުގެ ޖެނުއަރީމަހާއި އަޅާބަލާއިރު މިއަހަރުގެ ޖެނުއަރީމަހު ރަޝިއާއިން ރާއްޖެ ޒިޔާރަތްކުރި ފަތުރުވެރިންގެ އަދަދު ވަނީ 29.6 އިންސައްތަ އިތުރުވެފައެވެ. އަދި މިދިޔަ މަހުގެ 15 ވަނަ ދުވަހު ރާއްޖޭގެ ބޯޑަރު އަލުން ހުޅުވާލުމާއިއެކުވެސް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި ޤައުމުތަކުގެ ތެރޭގައި ރަޝިޔާ ހިމެނެއެވެ.