ވެލާނާ އިންޓަނޭޝަނަލް އެއަރޕޯޓްގައި ހިންގާ "އޮތެންޓިކް މޯލްޑިވްސް" ފިހާރާގައި މިހާރުވެސް 40 އަށްވުރެ ގިނަ ވިޔަފާރިތަކަށް އެމީހުންގެ އުފެއްދުންތައް ވިއްކުމުގެ މަގު ފަހިކޮށްދީފައިވާކަމަށް ބިޒްނަސް ސެންޓަރ ކޯޕަރޭޝަން، ބީސީސީން ވިދާޅުވެއްޖެއެވެ.
ވެލާނާ އިންޓަނޭޝަނަލް އެއަރޕޯޓުގެ ޑިއުޓީ ފްރީގައި ދިވެހި އުފެއްދުންތަކަށް ޚާއްސަ ފިހާރައެއް ހުޅުވީ މިއަހަރުގެ ޖެނުއަރީމަހުއެވެ. ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަދައްކަވަމުން ބިޒްނަސް ސެންޓަރ ކޯޕަރޭޝަންގެ ޗީފް ސްޓްރެޓެޖިކް އޮފިސަރ މަރިޔަމް ނަޝާ ވިދާޅުވީ، އެސްއެމްއީތަކަށް ދިމާވެފައިވާ އެންމެ ބޮޑު ގޮންޖެހުމަކީ އެމީހުންގެ އުފެއްދުންތައް މާކެޓް ކުރެވޭނެ ގޮތްތައް ފަހިވެފައިނެތުންކަމަށެވެ.
ނަޝާ ވިދާޅުވީ، "އޮތެންޓިކް މޯލްޑިވްސް" ފިހާރަ މެދުވެރިކޮށް ދާއިމީ ގޮތެއްގައި ދިވެހި އުފެއްދުންތައް މާކެޓް ކުރެވޭނެ ގޮތްތަކެއް އެފަރާތްތަކަށް ފަހިވެގެންދިޔަކަމަށެވެ. އަދި މިހާރުވެސް މި ފިހާރަ މެދުވެރިކޮށް 40 އަށްވުރެ ގިނަ އެސްއެމްއީތަކަށް އެމީހުންގެ އުފެއްދުންތައް މާކެޓް ކުރުމުގެ ފުރުސަތު ފަހިކޮށްދީފައިވާކަމަށާއި، މި ފިހާރަ މެދުވެރިކޮށް ދިވެހިންނާއި ފަތުރުވެރިންނަށްވެސް އުފެއްދުންތައް މާކެޓް ކުރެވިގެންދާނެކަމަށް ނަޝާ ވިދާޅުވިއެވެ.
"ބީސީސީ ޤައިމްވެގެން އަޅުގަނޑުމެންގެ އެއް ޕްރޮޖެކްޓަކަށް ވެގެންދިޔަ ވެލާނާ އިންޓަނޭޝަނަލް އެއަރޕޯޓްގައި ޤާއިމްކުރެވިގެންދިޔަ އޮތެންޓިކް މޯލްޑިވްސްގެ ޑިއުޓީ ފްރީ ސޮޕް. މި އައުޓްލެޓް ހުޅުވުނު ހިސާބުން ގާތްގަނޑަކަށް 40 އަށްވުރެ ގިނަ ފަރާތްތަކަށް ވަނީ ފުރުސަތު ލިބިފައި އެބޭފުޅުންގެ ތަކެތި ދިވެހިންނާއި ރާއްޖެއިން ބޭރުގެ ފަރާތްތަކަށް ވިއްކުމުގެ. މީގެ ސަބަބުން އެބޭފުޅުންގެ ވިޔަފާރި ފުޅާކުރަންވެސް މިވަނީ ފުރުސަތުތަކެއް ލިބިގެންގޮސްފައި. އަދި އުފައްދާ ތަކެތީގެ ކޮލިޓީ ހިފެހެއްޓުމަށް މަގުފަހިވެގެންދާނެ." މަރިޔަމް ނަޝާ ވިދާޅުވިއެވެ.
ރާއްޖޭގައި ހިންގާ 90 އިންސައްތަ ވިޔަފާރިތަކަކީ ކުދި ފަންތިއާއި މެދުފަންތީގެ ވިޔަފާރިތަކެވެ. އޮތެންޓިކް މޯލްޑިވްސް ފިހާރައިގެ މައިގަނޑު ބޭނުމަކީ ދިވެހި އުފެއްދުންތައް ކުރިއަރުވައި މި އުފެއްދުންތަކަށް އެކަށީގެންވާ މާކެޓެއް ހޯދައިދިނުމެވެ. ވަކިން ޚާއްސަކޮށް އުވެމުންދާ ޘަޤާފީ އުފެއްދުންތައް ކުރިއެރުވުމަށް ހިތްވަރުދީ ދިވެހި ބްރޭންޑްތައް މާކެޓްކޮށްދިނުންކަމަށް ބީސީސީއިން ބުނެއެވެ.
މި ފިހާރައިގައި މިހާރުވެސް ރާއްޖޭގައި މަޝްހޫރު ބައެއް ބްރޭންޑްތަކުގެ އުފެއްދުންތަކާއި ބައެއް އަމިއްލަ ފަރާތްތަކުގެ އުފެއްދުންތައް ހުރެއެވެ. އެގޮތުން ޒީނަތްތެރިވުމަށް ބޭނުންކުރާ ގަހަނާއާއި، ކީ ޗެއިންސްއާއި، ދަބަސް، ހެދުން ފަދަ ތަކެތި ހުރެއެވެ. މީގެ އިތުރުން ރާއްޖޭގެ ޘަޤާފަތް ދައްކުވައިދޭ ގޮތަށް ފަރުމާކޮށްފައިވާ ކުރެހުންތަކާއި ލިޔެލާޖެހި ޓުކުރިތަކާއި ޘަޤާފީ އެކި ކަންކަން ދައްކުވައިދޭ ތަފާތު އުފެއްދުންތައް މި ފިހާރާގައި ލިބެން ހުންނައިރު ދިވެހި ބައެއް ލުއިކާނާވެސް މި ފިހާރައިން ލިބެންހުރެއެވެ.
ބީސީސީން ބުނީ ދިވެހި އުފެއްދުންތެރިންނާއި އެސްއެމްއީތަކުގެ އުފެއްދުންތައް މާކެޓްކުރުމަށް މީގެއިތުރު ފިހާރަތައްވެސް ރާއްޖޭގެ އެކި ސަރަހައްދުތަކުގައި ހުޅުވުމަށް ހަމަޖެހިފައިވާކަމަށެވެ.
ކުދި ވިޔަފާރިއާއި މެދު ފަންތީގެ ވިޔަފާރިތަކަށް ދިމާވެފައިވާ މައްސަލަތައް ހައްލުކޮށް، ދިވެހި ވިޔަފާރިވެރިންގެ އުފެއްދުންތަކަށް އެކަށީގެންވާ ނަފާއެއް ހޯދައިދިނުމަކީ ސަރުކާރުން މުހިއްމު އިސްކަމެއްދީގެން ކުރިއަށްގެންދާ ކަމެކެވެ.