ކުދި ވިޔަފާރިއާއި މެދުފަންތީގެ ވިޔަފާރިތަކަށް އެހީވުމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، އެސް.ޑީ.އެފް.ސީން މިހާތަނަށް 222.9 މިލިއަން ރުފިޔާގެ ލޯނު ދޫކޮށްފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.
ފިނޭންސް މިނިސްޓްރީން އާއްމުކޮށްފައިވާ ތަފާސް ހިސާބުތައް ދައްކާގޮތުން މިމަހުގެ 13 ވަނަ ދުވަހާއި ހަމައަށް އިޤްތިސާދީ ގޮތުން ލިބިފައިވާ ހީނަރުކަން ކުޑަކުރުމަށް އެސްއެމްއީ ބޭންކުން ވިޔަފާރިތަކަށާއި، އަމިއްލަ ފަރާތްތަކަށްވެސް ވަނީ ލޯނުއެހީ ފޯރުކޮށްދީފައެވެ. އެގޮތުން ޖުމްލަ 1479 ފަރާތަކަށް ލޯނު އެހީ ފޯރުކޮށްދީފައިވެއެވެ.
ފިނޭންސް މިނިސްޓްރީގެ ތަފާސް ހިސާބުތައް ދައްކާގޮތުން މިމަހުގެ 13 ވަނަ ދުވަހުގެ ނިޔަލަށް ޖުމްލަ 1046 ވިޔަފާރިއަކަށް 209.9 މިލިއަން ރުފިޔާ ވަނީ ފޯރުކޮށްދީފައެވެ. އަދި އަމިއްލަ މަސައްކަތްކުރާ 433 ފަރާތަކަށް 13 މިލިއަން ރުފިޔާގެ ލޯނު ވަނީ ދޫކޮށްފައެވެ.
އެސްއެމްއީ ބޭންކު މެދުވެރިކޮށް ޖުމްލަ 6 ދާއިރާއަކުން ލޯނު އަންނަނީ ފޯރުކޮށްދެމުންނެވެ. އެއީ ވިޔަފާރި ތަރައްޤީ ލޯނާއި، ހަރުމުދާ ގަތުމަށް ލޯނު ދޫކުރުމާއި، ދަނޑުވެރި ނަފާ ލޯނާއި، ވިޔަފާރި އެހީ ލޯނާއި، ރަށުފަތުރު ލޯނާއި، ފަށާ ވިޔަފާރި ލޯނު ހިމެނެއެވެ. ކޯވިޑް19 އާއި ގުޅިގެން ވަގުތީގޮތުން ފަށާވިޔަފާރި ދޫކުރުން ވަނީ މަޑުޖައްސާލާފައެވެ.
އެސްއެމްއީ ބޭންކުން ދޫކުރާ ލޯނުތައް ދޫކުރަނީ %6 އިންޓްރެސްޓް ރޭޓުގައެވެ. މި ލޯންތައް އަނބުރާ ދެއްކުމަށް 3 އަހަރު ދުވަހުގެ މުއްދަތެއް ދިނުމަށް ހަމަޖެހިފައިވާ އިރު، ގިނަވެގެން 6 މަސް ދުވަހުގެ ގްރޭސް ޕީރިއަޑެއް ލިބޭނެއެވެ.
އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، އިން ހިންގާ އެސްއެމްއީ ބޭންކަކީ ކުދި ވިޔަފާރިތަކާއި މެދު ފަންތީގެ ވިޔަފާރިތަކަށް މާލީ އެހީތެރިކަން ފޯރުކޮށްދިނުމަށް މިދިޔަ އަހަރު މާޗުމަހު ސަރުކާރުން ހުޅުވާފައިވާ އިދާރާއެކެވެ. އެސްއެމްއީ ބޭންކް މެދުވެރިކޮށް އަންހެނުންނަށާއި ޒުވާނުންގެ އިތުރުން ނުކުޅެދުންތެރިކަން ހުންނަ މީހުންނަށް ޙާއްސަ އިސްކަމެއްދީގެން އަންނަނީ ލޯނު ދޫކުރަމުންނެވެ.