އައްޑޫ ސިޓީ އާއި ލ.ގަމުގައި އުރީދޫގެ ޑިޖިޓަލް ސެންޓަރު ހުޅުވައިފިއެވެ. މި 2 ރަށުގައި އުރީދޫގެ ޑިޖިޓަލް ސެންޓަރު ހުޅުވާފައިވަނީ އިއްޔެއެވެ.
ލ.ގަމުގައި އުރީދޫން ހުޅުވި ޑިޖިޓަލް ސެންޓަރު ހުންނާނީ ގަމު ރީޖަނަލް ހޮސްޕިޓަލް ކުރިމަތީގައެވެ. މިސެންޓަރު މެދުވެރިކޮށް ސެލްފް-ސަރވިސް ކިއޮސްކްތައް މެދުވެރިކޮށް، ބޭނުން ކޮންމެ ގަޑިއެއްގައި ރީޗާޖްކޮށް، ކޭޝް އިން ޕްރޮސެސް ކުރެވޭނެއެވެ. 24 ގަޑިއިރު ހުޅުވާފައި ހުންނަ މި ޑިޖިޓަލް ސެންޓަރު މެދުވެރިކޮށް އުރީދޫ ކަސްޓަމަރުންނަށް ކޮންމެ ވަގުތަކުވެސް ޚިދުމަތްތަކުގެ ބިލު ދައްކާލެވޭނެ ކަމަށް އުރީދޫއިން ބުނެއެވެ.
އައްޑޫ ސިޓީގައި އުރީދޫއިން ހުޅުވި ޑިޖިޓަލް ސެންޓަރު ހުންނާނީ އައްޑޫ ސިޓީ ހިތަދޫގައެވެ. ގަމުގައި ހުޅުވި ޑިޖިޓަލް ސެންޓަރެކޭ އެއްފަދައިން އައްޑޫ ސެންޓަރުންވެސް ކަސްޓަމަރުންނަށް 24 ގަޑިއިރު ޙިދުމަތް ލިބޭނެއެވެ.
އުރީދޫ އިން ވަނީ ޑިޖިޓަލް ސެންޓަރުތަކުގައި ޙިދުމަތް ހޯދާއިރު އިޖުތިމާއީ ގައިދުރުކަން ބެހެއްޓުމަށް ކަސްޓަމަރުންގެ ކިބައިން އެދިފައެވެ.
އައްޑޫ ސިޓީއާއި ގަމުގެ އިތުރުން އުރީދޫ އިން އަންނަނީ މާލޭއާއި، ކުޅުދުއްފުއްޓާއި ފުވައްމުލަށް ސިޓީއާއި ގދ.ތިނަދޫގައި ވެސް އެ ކުންފުނީގެ ޑިޖިޓަލް ސެންޓަރު ހުޅުވައި ޙިދުމަތްދެމުންނެވެ.
އުރީދޫއިން ބުނީ އެ ކުންފުނިން އަބަދުވެސް މަސައްކަތްކުރަނީ ކުންފުނީގެ ހިދުމަތްތައް ޑިޖިޓަލްކޮށް ކަސްޓަމަރުންނަށް ފަސޭހަކަމާ އެކު ހިދުމަތް ލިބޭނެގޮތް ފަހިކޮށް ދިނުންކަމަށެވެ. ރާއްޖޭގެ އެކި ސަރަހައްދުތަކުގައި ހުޅުވަމުންދާ ޑިޖިޓަލް ސެންޓަރުތަކަކީ މި އަމާޒުގެ ދަށުން ކުރަމުންދާ މަސައްކަތެއްކަމަށް އެ ކުންފުނިން ބުނެއެވެ.