ބ.އަތޮޅުގައި ރިސޯޓެއް ތަރައްޤީ ކުރަމުން ދިޔަ ބޮޑުފިނޮޅުގައި، ހަމަނުޖެހުންތައް ހިންގައި ދިވެހިންގެ ބަޔަކު އެރަށުގައި ރަހީނުކުރުމާ ގުޅިގެން ހައްޔަރުކުރި ބިދޭސީން ދޫކޮށްލުމަށްފަހު އިމިގްރޭޝަންނާ ޙަވާލުކޮށްފިއެވެ.
މިދިޔަ މަހުގެ 4ވަނަ ދުވަހު ހިންގި ހަމަނުޖެހުންތަކާއި ގުޅިގެން ހައްޔަރުކޮށްފައިވަނީ 19 ބިދޭސީއެކެވެ. އަދި ދެފަހަރެއްގެ މަތިން އެމީހުންގެ ބަންދަށް 15 ދުވަސް ކޯޓުން ޖަހައިދީފައި ވެއެވެ. ފުލުހުން ވިދާޅުވީ، މިމައްސަލައިގައި ހިމެނޭ ބިދޭސީން ދޫކޮށްލުމަށްފަހު އިމިގްރޭޝަނާ ހަވާލުކޮށްފައި ވާކަމަށާ، މައްސަލަ ތަޙްޤީޤްކުރަމުން އަންނަކަމަށެވެ.
މުސާރަ ނުދީ ގިނަ ދުވަސްތަކެއްވުމުންކަމަށްބުނެ، ބޮޑުފިނޮޅުގައި މަސައްކަތް ކުރަމުންދިޔަ ބިދޭސީންގެބަޔަކު ވަނީ ދިވެހިންގެ ބަޔަކު ރަހީނުކޮށް ބޮޑެތި ހަމަނުޖެހުން ހިންގާފައެވެ. އަދި އެރަށުގައިހުރި ތަންތަނާއި މުދަލަށް ބޮޑެތި ގެއްލުންތަކެއް ދީފައިވެއެވެ. މި މައްސަލަ ހައްލުކުރުމަށް އެރަށަށް އަރަން ދިޔަ ފުލުހުންނަށް ހަމަލާދީ ދެ ފުލުހަކުވަނީ ވަނީ ޒަހަމްކޮށްލާފައެވެ.
ފުލުހުން ވަނީ މި ބިދޭސީންގެ މައްޗަށް ގިނަ ތުހުމަތުތަކެއް ކޮށްފައެވެ. އޭގެތެރޭގައި ބަޔަކު ރަހީނު ކުރުމާއި މުދަލާއި ތަކެއްޗަށް ގެއްލުންދިނުމާއި، ވައްކަންކުރުން ހިމެނެއެވެ. މިހަމަނުޖެހުންތަކާ ގުޅިގެން އެރަށުގައި މަސައްކަތް ކުރަން ގެންދިޔަ ބިދޭސީން އެރަށުން ބޭލުމަށް ދަރަވަންދޫ މެޖިސްޓްރޭޓް ކޯޓުންވަނީ އަމުރުކޮށްފައެވެ. އެހެންނަމަވެސް އެ ނިންމުން ބަލައި ނުގަންނަކަމަށް ބުނެ ބޮޑު ފިނޮޅުގައި މަސައްކަތް ކުރާ ބިދޭސީން ގެންގުޅޭ ރިޒް ކުންފުނިން ވަނީ މައްސަލަ ބެއްލެވި ގާޒީއާ ދެކޮޅަށް އެ މައްސަލަ ޖުޑީޝަލް ސާރވިސް ކޮމިޝަނަށް ހުށައަޅާފައެވެ.
ރިޒް ކުންފުންޏަކީ ރައްޔިތުންގެ މަޖިލީހުގެ މިލަންދޫ ދާއިރާގެ އެމްޑީޕީ މެމްބަރު އަލީ ރިޒާގެ ކުންފުންޏެކެވެ.
ބޮޑު ފިނޮޅަކީ ސީލް މޯލްޑިވްސް އިން ތަރައްޤީކުރަމުން އަންނަ ރިސޯޓްކެވެ. އެރަށުގެ މަސައްކަތްތައް ހަވާލުކޮށްފައިވަނީ ރިޒް ޕްރައިވެޓް ލިމިޓެޑާއިއެވެ. މުސާރައިގެ މައްސަލާގައި މުސާރަ ނުދެވުނީ ފައިސާ ނެތިގެންކަމަށް ފުރަތަމަ ބުނި ނަމަވެސް އެ ކުންފުނީގެ ވަކީލުން ނެރުނު ބަޔާނެއްގައި ބުނެފައިވަނީ މަސައްކަތް ކުރާ މުވައްޒަފުންނަނަށް މުސާރަ ދިނުމަކީ ސީލް މޯލްޑިވްސްގެ ކުރަންޖެހޭ ކަމެއްކަމަށެވެ. މި ވާހަކަތަކަށް ރައްދުދީ ސީލް މޯލްޑިވްސް އިން ނެރުނު ބަޔާނެއްގައި ބުނެފައިވަނީ ރިޒް ކުންފުންޏަށް ފައިސާ ނުދޭކަމަށް ބުނާ ބުނުމަކީ ދޮގެއްކަމަށެވެ. އަދި އެއްބަސްވުމުގެ އިތުރަށްވެސް ފައިސާދީފައިވާކަމަށް ސީލް މޯލްޑިވްސް އިން ބުނެއެވެ.