ބަންދު ތެރޭގައި އޮންލައިންކޮށް ޕާސްޕޯޓް ހެއްދުމަށް ހުށަހަޅާ ފަރާތްތަކުގެ ޕާސްޕޯޓް ދޫކުރާނީ ސަރުކާރު އަލުން ހުޅުވުމުންކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.
މިނިވަންދުވަހާއި އަޟްޙާ ޢީދާއި ދިމާކޮށް ސަރުކާރު އޮފީސްތައް ވަނީ ހަފްތާއަކަށްވުރެ ގިނަ ދުވަހަށް ބަންދުކޮށްފައެވެ.
އިމިގްރޭޝަނުން ބުނީ މި މުއްދަތުގައި އޮންލައިންކޮށް ހުށައަޅާ ޕާސްޕޯޓުތައް ލިބޭނީ އަންނަ މަހުގެ 4 ވަނަ ދުވަހު އޮފީސްތައް ހުޅުވުމުންކަމަށެވެ. ނަމަވެސް މި މުއްދަތުގައި އިމަޖެންސީ ހާލަތެއް މެދުވެރިވެގެން ޕާސްޕޯޓް ހެއްދުމަށް އިމިގްރޭޝަންގެ ޕާސްޕޯޓް ހޮޓްލައިން ނަންބަރު 9555333 އަށް ގުޅައިގެން ކުރިއަށްގެންދިއުމަށް އެ އިދާރާއިން ވަނީ އެދިފައެވެ.
އިމިޤްރޭޝަނުން މިހާރު ވަނީ އީމެއިލް މެދުވެރިކޮށް ޕާސްޕޯޓް އެޕްލިކޭޝަން ބަލައިގަތުންވެސް ހުއްޓާލާފައެވެ. އެހެންކަމުން މިހާރު ދިވެހި ޕާސްޕޯޓަށް އެދި ހުށައަޅަންޖެހެނީ މޯލްޑިވްސް އިމިގްރޭޝަންގެ އޮންލައިން ޕޯޓަލް "އިމުގާ" މެދުވެރިކޮށެވެ.
ކޯވިޑް-19ގެ މި ދަނޑިވަޅުގައި ރާއްޖެއިން ބޭރުގައި ތިބެގެން ޕާސްޕޯޓް އައުކުރާ ފަރާތްތަތަކަށް އޮންލައިންކޮށް ޕާސްޕޯޓަށް އެދުމުގެ ފުރުސަތާއި ފައިސާ ދެއްކޭނެ އިންތިޒާމްވެސް އިމިޤްރޭޝަނުން ވަނީ ހަމަޖައްސައިދީފައެވެ.
މިނިވަންދުވަހާއި އަޟްޙާ ޢީދާއި ގުޅިގެން އަންނަ ރަސްމީ ބަންދު ދުވަސްތަކުގައި އިމިގްރޭޝަނުންދޭ ޙިދުމަތްތައް ވަނީ މެދުކަނޑާލާފައެވެ. ނަމަވެސް ވިސާއާއި ގުޅޭ އެކިއެކި ކަންކަމުގައި އާދިއްތަ ދުވަހުން ބުރާސްފަތި ދުވަހުގެ ނިޔަލަށް ކޮންމެ ދުވަހެއްގެ ހެނދުނު 10 އިން މެންދުރުފަހު 2 އަށް އެ މުޢައްސަސާގެ ހޮޓްލައިން ނަންބަރުތަކަށް ގުޅޭނެކަމަށް އިމިޤްރޭޝަނުން ވިދާޅުވެއެވެ.