މޯލްޑިވްސް މަނިޓަރީ އޮތޯރިޓީގެ ޑެޕިއުޓީ ގަވަރުނަރުގެ މަގާމުގައި ހުންނެވި އައިޝަތު ޒާހިރާ މަޤާމުގެ ދައުރު ފުރިހަމަކުރެއްވުމަށްފަހު ރިޓަޔާކުރައްވައިފިއެވެ.
31 އަހަރު އެމްއެމްއޭއަށް ޚިދުމަތްކުރެއްވުމަށްފަހު އައިޝަތު ޒާހިރާ އެމްއެމްއޭއިން ރިޓަޔާ ކުރެއްވިއިރު އެކަމަނާ ވަނީ އެމްއެމްއޭގެ ޑެޕިއުޓީ ގަވަރުނަރުގެ މަޤާމު 2 ދައުރު ފުރިހަމަ ކުރައްވާފައެވެ. ޑެޕިއުޓީ ގަވަރުނަރަކީ ރައީސުލްޖުމްހޫރިއްޔާ ނަން ހުށަހަޅުއްވައި ރައްޔިތުން މަޖިލީހުން ފާސްކޮށްގެން އައްޔަން ކުރާ މަގާމެކެވެ. އެމްއެމްއޭގެ ޤާނޫނުގައިވާ ގޮތުން ޑެޕިއުޓީ ޤަވަރުނަރުގެ މަޤާމުގައި ހުރެވޭނީ 6 އަހަރުގެ 2 ދައުރެވެ.
ޑެޕިއުޓީ ޤަވަރުނަރުގެ މަޤާމުގައި 6 އަހަރުގެ 2 ދައުރު ފުރިހަމަކުރައްވާފައިވާތީ އެމްއެމްއޭއިން ވަނީ ޒާހިރާއަށް ޙިދުމަތުގެ އަގުވަޒަންކޮށް، އެކަން ފާހަގަކޮށްފައެވެ.
ޑެޕިއުޓީ ޤަވަރުނަރުގެ މަޤާމުގެ ދައުރު ޒާހިރާ ފުރިހަމަކޮށްފައިވުމުން އެ މަގާމު ވަނީ ހުސްވެފައެވެ. އެމްއެމްއޭގެ ގަވަރުނަރުގެ މަގާމުގައި މިހާރު ހުންނެވީ އަލީ ހާޝިމެވެ. އަދި އެސިސްޓެންޓް ގަވަރުނަރުގެ މަގާމުގައި ހުންނެވީ މަރިޔަމް ހުސެއިން ދީދީ އާއި އިދްހާމް ހުސެއިން އަދި މަރިޔަމް ޝިފާއެވެ.