މިއަހަރުގެ ވެކޭޝަން އެކްސްޕޯ އޮންނާނީ އޮންލައިންކޮށްކަމަށް ހައިރައިޒްއިން ބުނެފިއެވެ.
ހައިރައިޒުން މިހާރު ވަނީ ބީޓުބީ މޯލްޑިވްސްއާއިއެކު ވެކޭޝަން އެކްސްޕޯ އޮންލައިންކޮށް ބޭއްވުމަށް އެއްބަސްވުމެއްގައިވެސް ސޮއިކޮށްފައެވެ.
މި އެއްބަސްވުމުގެ ދަށުން ބީޓުބީ މޯލްޑިވްސްއިން ވެކޭޝަން އެކްސްޕޯ އޮންލައިންކޮށް ބޭއްވުމަށް ހައިރައިޒްއަށް އެހީތެރިވެދޭނެއެވެ. އެގޮތުން ވެކޭޝަން އެކްސްޕޯގެ ވެބްސައިޓް ތައްޔާރުކުރުމާއި، ޓެކްނިކަލް އެހީތެރިކަން ފޯރުކޮށްދޭނެއެވެ.
މިއަހަރުގެ ވެކޭޝަން އެކްސްޕޯ އޮންލައިންކޮށް ބާއްވަން ނިންމިނަމަވެސް އަދި އެކްސްޕޯ ބާއްވާނެ ތާރީހެއް ހައިރައިޒުން ކަނޑައެއްނާޅައެވެ. މިއީ ވެކޭޝަން އެކްސްޕޯ ބާއްވާ 5 ވަނަ އަހަރެވެ.
ވެކޭޝަން އެކްސްޕޯއަކީ ޗުއްޓީއާ ދިމާކޮށް ރާއްޖެއާއި ރާއްޖޭން ބޭރުގެ މަންޒިލްތަކަށް ދަތުރުކުރަން ބޭނުންވާ ދިވެހިންނަށް އެމަންޒިލްތަކާ ބެހޭގޮތުން މަޢުލޫމާތު ދިނުމަށް ބާއްވާ އެކްސްޕޯއެކެވެ. އެގޮތުން މިއެކްސްޕޯގެ ތެރެއިން ރާއްޖެއާއި ރާއްޖެއިން ބޭރުގެ ފަތުރުވެރިކަމުގެ ދާއިރާއާއި އެއަރލައިން އިންޑަސްޓްރީގައި މަސައްކަތްކުރާ ފަރާތްތަކުން ކޮންމެ އަހަރަކުވެސް ބައިވެރިވެއެވެ.
މިއަހަރުގެ އެކްސްޕޯގައިވެސް ބައިނަލްއަޤްވާމީ އެއަރލައިންތަކާއި، ޓްރެވެލް އެޖެންޓުންނާއި ޓުއަރ އޮޕަރޭޓަރުންނާއި، ރިސޯޓްތަކާއި ގެސްޓްހައުސްތަކުން ބައިވެރިވުމަށް ވަނީ ހަމަޖެހިފައެވެ. މިއީ ވެކޭޝަން އެކްސްޕޯ އޮންލައިންކޮށް ބާއްވާ ފުރަތަމަ ފަހަރެވެ.
މިއަހަރުގެ އެކްސްޕޯ އޮންލައިންކޮށް ބޭއްވި ނަމަވެސް ޓާގެޓް މާކެޓްއަށް ވާސިލްވުމަށް ހައިރައިޒްއިން އަންނަނީ މަސައްކަތްކުރަމުންނެވެ.
ކޯވިޑް19އާ ގުޅިގެން ބައިނަލްއަޤްވާމީ ފަތުރުވެރިކަމުގެ ގިނަ ފެއަރތައްވެސް މިހާރު ބާއްވަމުން އަންނަނީ އޮންލައިން އެކިއެކި ވަސީލަތްތައް ބޭނުންކޮށްގެންނެވެ.