މޯލްޑިވްސް އިންލެންޑް ރެވެނިއު އޮޓޯރިޓީ، މީރާގެ އޮންލައިން ސިސްޓަމްގެ ތެރެއިން ޓެކްސްގެ އަދަދު ބަހާލައިގެން ދައްކާލެވޭނެ އިންތިޒާމް ހަމަޖައްސައިފިއެވެ.
މީރާގެ އެސިސްޓަންޓް ކޮމިޝަނަރ ޖެނެރަލް ރެވެނިއު ސަރވިސް އަޙްމަދު ޝަރީފް ވިދާޅުވީ، ކުރިން އޮންނަނީ އޮންލައިން ސިސްޓަމްގެ ތެރެއިން ޓެކުހުގެ ގޮތުގައި ދައްކަންޖެހޭ ފައިސާގެ ޖުމްލަ އަދަދު އެއްކޮށް ދައްކަންޖެހޭ ގޮތަށްކަމަށެވެ. ނަމަވެސް މިހެން އޮތުމުގެ ސަބަބުން މީރާއަށް އޮންލައިންކޮށް ފައިސާ ދައްކާއިރު ބައެއް ފަރާތްތަކަށް ދަތިވާކަން އެ އޮތޯރިޓީއަށް ފާހަގަވެފައިވާކަމަށެވެ. އެހެންކަމުން އަލަށް ގެނައި ބަދަލާއެކު ޓެކްސް ބަޔާނުގައި ދައްކަންޖެހޭ ޓެކުހުގެ އަދަދު އޮންލައިން ސިސްޓަމްގެ ތެރެއިން ބަހާލައިގެން މިހާރު ދައްކާލެވޭނެކަމަށް ޝަރީފް ވިދާޅުވިއެވެ.
"މިހާރު އޮންލައިންކޮށް ޓެކްސް ބަޔާން ހުށައެޅުއްވުމަށްފަހު އެ ދައްކަވަން ޖެހިވަޑައިގަންނަވާ އަދަދެއް އެއްކޮށް އެއްފަހަރާ ދައްކަން ދަތިވާކަމުގައިވާނަމަ އެބޭފުޅަކަށް އެވަގުތު ދެއްކެންއޮތް އަދަދެއް ޖައްސަވާފަ އެ އަދަދެއް އޮންލައިންކޮށް ފައިސާދެއްކެވޭގޮތައް ހަމަޖެހިފައި މިހާރު މިވަނީ. މިހާރު އޮންލައިންކޮށް ޕޭމަންޓް ދައްކަވާއިރު ފުލް ޕޭމަންޓްގެ ބަދަލުގައި ޕާޓް ޕޭމަންޓް ހެދުމުގެ ފުރުސަތު އޮންނާނެ." އަޙްމަދު ޝަރީފް ވިދާޅުވިއެވެ.
މީރާއިން ބަލައިގަންނަ ހުރިހާ ޓެކުހާއި ފައިސާ އޮންލައިންކޮށް ދެއްކޭނެ އިންތިޒާމްވެސް މީރާއިން ވަނީ ހަމަޖައްސާފައެވެ. ޓެކުހުގެ އިތުރުން މީރާއަށް ބަލައިގަންނަމުންދާ އެހެނިހެން ފައިސާގެ ތެރެއިން އޮންލައިންކޮށް ބަލައިގަތުމުގެ އިންތިޒާމް ހަމަޖެހިފައިނުވާ ފައިސާވެސް މިހާރު އޮންލައިންކޮށް ދައްކާލެވޭނެއެވެ. މިފަދަ ފައިސާ ބަލައިގަތުމަށް ހަމަޖެހިފައިވަނީ ޓެކްސް ފިޔަވައި އެހެނިހެން ފައިސާ ބަލައިގަތުމަށް ޙާއްސަކޮށްފައިވާ މީރާގެ "ވާރުޕޭ" މެދުވެރިކޮށެވެ.
ވާރުޕޭގެ ޙިދުމަތް މީރާގެ ވެބްސައިޓް އަދި މީރާ މޯބައިލް އެޕްލިކޭޝަން މެދުވެރިކޮށް ލިބޭނެއެވެ. މީރާއިން ބަލައިގަންނަ ހުރިހާ ޓެކުހާއި ފައިސާ އޮންލައިންކޮށް ދެއްކޭނެ އިންތިޒާމް ހަމަޖެއްސުމާއި ގުޅިގެން އިޖްތިމާއީ ގައިދުރުކަން އިސްކޮށް މީރާގެ ޙިދުމަތްތައް އޮންލައިންކޮށް ހޯދުމަށް މީރާއިން އިލްތިމާސްކުރެއެވެ.