ޓޫރިޒަމް މިނިސްޓްރީ ހިންގެވުން ވަގުތީގޮތުން އިކޮނޮމިކް މިނިސްޓަރ ފައްޔާޟާއި ހަވާލުކުރައްވައިފި
ޓޫރިޒަމް މިނިސްޓްރީ ހިންގުން ވަގުތީ ގޮތުން އިކޮނޮމިކް މިނިސްޓަރ ފައްޔާޟް އިސްމާޢީލާއި ހަވާލުކުރައްވައިފިއެވެ.
ޓޫރިޒަމް މިނިސްޓަރުގެ މަގާމުގައި ހުންނެވި ޢަލީ ވަޙީދު، އެ މަގާމުން އިސްތިޢުފާދެއްވުމަށް ރައީސުލްޖުމްހޫރިއްޔާ އަންގަވާފައިވީ ނަމަވެސް، އޭނާ މަގާމުން އިސްތިޢުފާ ދެއްވާފައި ނުވާތީ، ޢަލީ ވަޙީދު މަޤާމުން ވަކިކުރައްވާފައި ވަނީ މިއަދުއެވެ.
މިނިސްޓްރީ އޮފް ޓޫރިޒަމް ހިންގެވުން މިއަދުން ފެށިގެން ވަގުތީގޮތުން މިނިސްޓަރ އޮފް އިކޮނޮމިކް ޑިވެލޮޕްމަންޓް އަލްއުސްތާޛު ފައްޔާޟް އިސްމާޢީލާ ރައީސުލްޖުމްހޫރިއްޔާ ވަނީ ހަވާލުކުރައްވާފައިކަމުގައި ރައީސުލްޖުމްހޫރިއްޔާގެ އޮފީހުން ވަނީ ވިދާޅުވެފައެވެ.
އަލީ ވަޙީދު މަޤާމުން ވަކިކުރައްވާފައި މިވަނީ މަސައްކަތުގެ މާޙައުލުގައި ހިނގައިގެން ނުވާނެފަދަ އަޚްލާގީ މައްސަލަތަކެއް ޓުއަރިޒަމް މިނިސްޓްރީގައި ޢަލީ ވަޙީދު ހިންގާފައި ވާކަމުގެ ޝަކުވާތަކެއް އެމިނިސްޓްރީގެ މުވައްޒަފުންތަކެއް ރައީސުލްޖުމްހޫރިއްޔާއަށް ހުށައެޅުއްވުމުންނެވެ.