މިނިސްޓަރ އޮފް ޓޫރިޒަމްގެ މަގާމުގައި ހުންނެވި ޢަލީ ވަޙީދު، އެ މަގާމުން އިސްތިޢުފާދެއްވުމަށް ރައީސުލްޖުމްހޫރިއްޔާ އަންގަވާފައިވީ ނަމަވެސް، އެ މަގާމުން އިސްތިޢުފާ ދެއްވާފައިނުވާތީ، މިނިސްޓަރ އޮފް ޓޫރިޒަމްގެ މަގާމުން ޢަލީ ވަޙީދު މިއަދު ވަކިކުރައްވައިފިއެވެ.
މަސައްކަތުގެ މާޙައުލުގައި ހިނގައިގެން ނުވާނެފަދަ އަޚްލާގީ މައްސަލަތަކެއް ޓުއަރިޒަމް މިނިސްޓްރީގައި ޢަލީ ވަޙީދު ހިންގާފައި ވާކަމުގެ ޝަކުވާ އެމިނިސްޓްރީގެ މުވައްޒަފުންތަކެއް ވަނީ ރައީސުލްޖުމްހޫރިއްޔާ އަށާއި ޖެންޑަރ މިނިސްޓްރީއަށް ހުހަޅާފައެވެ. އަދި އެކަމާ ގުޅިގެން މިނިސްޓަރ އޮފް ޓުއަރިޒަމް ޢަލީ ވަޙީދު މަޤާމުން ޢިސްތިއުފާ ދެއްވުމަށް ރައީސުލްޖުމްހޫރިއްޔާ އޭނާއަށް އަންގަވާފައިވަނީ ރޭގެ ވަގުތެއްގައެވެ.
ޢަލީ ވަޙިދުގެ މައްޗަށް ތުހުމަތުކުރެވެނީ އެ މިނިސްޓްރިގެ އަންހެން މުވައްޒަފުންތަކަކަށް ޖިންސީ ފުރައްސާރަކުރުމާއި ޖިންސީ ގޯނާ ކުރުމުގެ ތުހުމަތެވެ. މި މައްސަލަ ފުލުހުންވެސް އަދި ޖެންޑަރ މިނިސްޓްރީން ވެސް އަންނަނީ ބަލަމުންނެވެ.
އަލީ ވަޙީދާ ގުޅޭ މިބާވަތުގެ މައްސަލައެއް މީގެ ދުވަސްކޮޅެއް ކުރިންވެސް ވަނީ މީޑިއާއަށް ފެންމަތިވެފައެވެ. އެއީ ޓުވިޓާގައި މީހަކު ޢާއްމުކުރި އޯޑިއޯ ކްލިޕްތަކުގައި މިނިސްޓަރ ޢަލީވަޙީދު ކަމަށް ބެލެވޭ މީހަކު ހަޑިހުތުރު ބަހުން ބަދުއަޚުލާޤީ ވާހަކަތަކެއް ދައްކަވާ މައްސަލައެވެ.
މިއޯޑިއޯގައި ޢަލީވަޙީދުކަމަށް ބެލެވޭ މީހާ ނަހަމަގޮތުގައި ޖިންސީގުޅުން ހިންގާ ވާހަކައާއި ޓްރާންސްޕޯޓް މިނިސްޓަރ ޢާއިޝަތު ނަހުލާ އާއި ބެހޭގޮތުން ބޭއަދަބީ ބަހުން ވާހަކަދައްކަވާފައި ވެއެވެ.
ޢަލީވަޙީދަކީ ޖުމްހޫރީ ޕާޓީގެ ސްލޮޓެއްގައި މިނިސްޓަރުކަމުގެ މަޤާމަށް ވަޑައިގެންނެވި ބޭފުޅެކެވެ. އޭނާ އިސްތިއުފާދެއްވަން ރައީސް އެންގެވިއިރު، މިއީ މިބާވަތުގެ މައްސަލައެއްގައި ރާއްޖޭގައި ވަޒީރަކު އިސްތިއުފާދެއްވަން ރައީސުލްޖުމްހޫރިއްޔާ އެންގެވި ފުރަތަމަ ފަހަރުކަމަށް މަޢުލޫމާތު ލިބެއެވެ.
ޖިންސީ ފުރައްސާރައާއި ޖިންސީ އަނިޔާގެ މައްސަލަތަކުގައި ސަރުކާރުން ގެންގުޅުއްވަނީ "ޒީރޯ ޓޮލަރެންސް"ކަމަށް ސަރުކާރުން ވަނީ ކުރިންވެސް ޙާމަކުރައްވާފައެވެ.