ޓޫރިޒަމް މިނިސްޓަރ ޢަލީ ވަޙީދުގެ މައްޗަށް ކުރެވޭ ޖިންސީ ގޯނާގެ ތުހުމަތުތަކާއި ގުޅިގެން ރައީސް އިބުރާހީމް މުޙައްމަދު ޞާލިޙު ވަގުތުން އެޅުއްވި އަވަސް ފިޔަވަޅުތަކަށް ކޯލިޝަންގެ އިސްބޭފުޅުންނާއި ދައުލަތުގެ އިސްމަޤާމުތަކުގައި ތިއްބެވި ބޭފުޅުން ތައުރީފު ކުރައްވައފިއެވެ.
ޖިންސީ ފުރައްސާރަ އާއި ގޯނާގެ މައްސަލަތަކުގައި ރައީސް އިބްރާހީމް މުޙައްމަދު ޞާލިޙް ގެންގުޅުއްވަނީ "ޒީރޯ ޓޮލަރެންސް" ސިޔާސަތެއް ކަމުގައި މީގެ ކުރިންވެސް ތަކުރާރުކޮށް އެމަނިކުފާނު ވަނީ ވިދާޅުވެފައެވެ.
މަސައްކަތުގެ މާޙައުލުގައި ހިނގައިގެން ނުވާނެފަދަ އަޚުލާގީ މައްސަލަތަކެއް ޓުއަރިޒަމް މިނިސްޓްރީގައި ހިނގާފައި ވާކަމުގެ ޝަކުވާ އެމިނިސްޓްރީގެ މުވައްޒަފުންތަކެއް ވަނީ ރައީސުލްޖުމްހޫރިއްޔާ އަށް ހުށައަޅުއްވާފައެވެ. އެ މިނިސްޓްރީގެ މުވައްޒަފުންގެ ޝަކުވާތަކާއި ގުޅިގެން ރައީސް ވަނީ ރޭ ޢަލީ ވަޙިދު މަޤާމުން އިސްތިއުފާދެއްވުމަށް އަންގަވާފައެވެ. އަދި އަލީ ވަހީދު މަޤާމުން އިސްތިއުފާ ނުދެއްވުމުން މިއަދު ވަނީ މަޤާމުން ވަކިކުރައްވާފައެވެ.
ރައީސްގެ މި ފިޔަވަޅާއި ގުޅިގެން ކުރީގެ ރައީސް މައުމޫން ޢަބްދުލް ޤައްޔޫމް ކުރެއްވި ޓްވީޓެއްގައި ވިދާޅުވީ، ޖިންސީ އަނިޔާގެ މިފަދަ މައްސަލަތަކުގައި އަވަސް ފިޔަވަޅުތަކެއް އެޅުއްވުމަކީ ވަރަށް މުހިންމު ކަމެއްކަމަށާއި، އެފަދަ މައްސަލަތަކަކީ މުޖުތަޢުން ބަލައިގަންނާނެ ކަމެއްނޫންކަމަށެވެ. ރައީސް މައުމޫން ވަނީ ރައީސް އިބްރާހީމް މުޙައްމަދު ޞާލިޙް އަވަސް ފިޔަވަޅުތަކެއް އެޅުއްވި ކަމަށްޓަކައި ޝުކުރު އަދާކުރައްވާފައެވެ.
ޓޫރިޒަމް މިނިސްޓްރީގެ ސްޓޭޓް މިނިސްޓަރ ނަޢުޝާދު މުޙައްމަދު ވިދާޅުވީ، ޖިންސީ ގޯނާއާއި ފުރައްސާރައަށް ރައީސް ގެންގުޅުއްވާ ޒީރޯ ޓޮލަރެންސްގައި ރައީސް އެޅުއްވި ހަރުދަނާ ފިޔަވަޅުގެ ސަބަބުން ޓޫރިޒަމް މިނިސްޓްރީގައި މަސައްކަތްކުރާ މުވައްޒަފުންނަށް ރައްކާތެރި މާހައުލެއް ލިބިގެންދާނެކަމަށެވެ.
މި މައްސަލައާއި ގުޅޭގޮތުން ވާހަކަފުޅު ދައްކަވަމުން ހެރިޓޭޖް މިނިސްޓަރ ޔުމްނާ މައުމޫން ވިދާޅުވީ، މަސައްކަތުގެ މާހައުލު ވާންވާނީ ރައްކާތެރި އަބުރުވެރި ތަނަކަށްކަމަށާއި، ފެނިގެން މިދިޔައީ އެކަން ކަށަވަރު ކޮށްދެއްވުމަށް ރައީސް އިބްރާހީމް މުޙައްމަދު ޞާލިޙް ގެންގުޅުއްވާ ޒީރޯޓޮލަރެންސް ގެ ސޔާސަތުކަމަށެވެ. މިފަދަ މައްސަލަތަކުގެ ތަހުގީގު އަވަސްކޮށްދެއްވުމަށް މިނިސްޓަރ ގޮވާލެއްވިއެވެ. މި ވަގުތަކީ އެންމެން އެއްބައިވެރިވެ ޤައުމީ މަސްލަޙަތު އިސްކުރަންވީ ވަޤުތުކަަށާއި، ރައްޔތުންގެ ސަލާމަތާއި ރައްކާތެރިކަން އިސްކުރަންވީ ވަގުތުކަމަށްވެސް މިނިސްޓަރ ޔުމްނާ ވިދާޅުވިއެވެ.
ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވީ، ކުރީ ސަރުކާރުގެ އިސް މަޤާމެއްގައި ހުންނެވި ބޭފުލެއްގެ މައްޗަށް މިފަދަ ތުހުމަތުތަކެއް ކުރެވުނު ކަމަށާއި، އޭނަގެ އިތުބާރު ނެތްކަމުގެ ވޯޓުވެސް ނެގުނުކަމަށެވެ. ނަމަވެސް އޭނާގެ މައްސަލަ ބަލައި ތަޙްޤީޤުކޮށް ނިމެންދެން އޭނާ މަޤާމުގައި ބެހެއްޓެވިކަމަށާއި، ނަމަވެސް ރައީސް އިބްރާހީމް މުޙައްމަދު ޞާލިޙް މިފަދަ ކަންކަމާއި ގެންގުޅުއްވާ ސިޔާސަތައް ޝުކުރު އަދާކުރައްވާކަމަށެވެ.
ޓޫރިޒަމް މިނިސްޓަރ އަލީ ވަހީދުގެ މައްޗަށް ކުރެވޭ ޖިންސީ ގޯނާ އާއި ފުރައްސާރައިގެ އަމަލުގެ ތުހުމަތުތަކާއި ޝަކުވާތައް ރައީސްއަށް ދެންނެވި އެ މިނިސްޓްރިގެ މުވައްޒަފަކު ބުނެފައި ވަނީ، ރައީސް އިބްރާހީމް މުޙައްމަދު ޞާލިޙްއާއި ޖެންޑަރ މިނިސްޓަރާއި، ރައިސް އޮފީހުގެ ޗީފް އޮފް ސްޓާފް މިވާހަކަތައް އަޑުއެއްސެވުމަށް ވަގުތު ހުސްކޮށްދެވިކަމަށެވެ. ޖިންސީ ގޯނާގެ އަމަލުތަކަށް ރައީސް ގެންގުޅުއްވަނީ ޒީރޯ ޓޮލަރެންސްކަން އެމަނިކުފާނު އަމަލުންވެސް ސާބިތުކޮށްދެއްވާފައިވާ ކަމުގައި އެމުވައްޒަފުން ވަނީ ބުނެފައެވެ.
ޓުއަރިމް މިނިސްޓަރ އަލީވަހީދުގެ މައްޗަށް ކުރެވިފައިވާ ޖިންސީ ގޯނާ އާއި ފުރައްސާރައިގެ މައްސަލަތައް ފުލުހުންނާއި ޖެންޑަރ މިނިސްޓްރީންވެސް މިހާރު ގެންދަނީ ބަލަމުންނެވެ.
މިއީ ދައުލަތުގެ ވަޒީރަކު މިފަދަ މައްސަލައެއްގައި މަޤާމު ވަކިކުރެއްވި ފުރަތަމަ ފަހަރެވެ.