ރާއްޖޭގެ މީޑިއާއަށް އޮތް އެންމެ ބޮޑު ގޮންޖެހުމަކީ ނޫސްވެރިކަމުގެ ދާއިރައިން ތަމްރީނާއި ތަޢުލީމް ލިބިފައިވާ މީހުން އެކަށީގެންވާ މިންވަރަށް ނުނިކުތުންކަމަށް ރާއްޖޭގެ މީޑިއާތަކުގެ ވެރިން ވިދާޅުވެއްޖެއެވެ.
މީޑިއާތަކުން މިކަމުގެ ކަންބޮޑުވުން ފާޅުކޮށްފައިވަނީ، މޯލްޑިވްސް މީޑިއާ ކައުންސިލުން އިންތިޒާމްކޮށްގެން ބޭއްވި އެޑިޓަރުންގެ މަހާސިންތާގައި ވާހަކަ ދައްކަވަމުންނެވެ.
މޯލްޑިވްސް މީޑިއާ ކައުންސިލުން ބޭއްވި މިމަހާސިންތާއަކީ ރާއްޖޭގެ މީޑިއާތަކަށް ދިމާވާ މައްސަލަތަކާއި، އެކަންކަން ހައްލުކުރުމަށް މީޑިއާތަކުގެ އެންމެ އިސްވެރިން ބައްދަލުކޮށް މަޝްވަރާކޮށް ޚިޔާލު ހޯދުމައެކު މީޑިއާ ކައުންސިލަށް އަދާކުރެވިދާނެ ދައުރަކީ ކޮބައިކަން ދެނެގަތުމެވެ. އަދި ކޯވިޑް-19ގެ ބަލިމަޑުކަމުގެ ޙާލަތުގައި މީޑިއާތަކަށް އޮތް މާލީ ދަތިތައް ދެނެގަތުމައި، މިދައިރާއިން މީހުން ތަމްރީން ކުރުމަށް ކުރެވޭނެ މަސައްކަތްތަކާ ގުޅޭގޮތުންވެސް މި މަހާސިންތާގައި ޚިޔާލު ހޯދާފައިވެއެވެ.
ރާއްޖޭގެ އެކި މީޑިއާތަކުގެ އެންމެ އިސްވެރިން ހިމެނޭހެން 20 ބޭފުޅުން މިމަހާސިންތާގައި ބައިވެރިވިއެވެ. އޭގެ ތެރޭގައި ރާއްޖޭގެ ގިނަ މީޑިއާތައް ހިމެނޭހެން އެތަންތަނުގެ މެނޭޖިންގ ޑިރެކްޓަރުންނާއި ސީއީއޯއިންނާއި، އެޑިޓަރުން ބައިވެރިވެވަޑައިގެންނެވިއެވެ.
މި މަހާސިންތާގެ ބައިވެރިން ޚިޔާލު ހުށައެޅި ކަންކަމުގެ ތެރޭގައި މީޑިއާގެ އެތިކްސް އާއި ނޫސްވެރިން ތަމްރީންކުރުމުގެ މުހިންމުކަމާއި، މެއިންސްޓްރީމް މީޑިއާތަކާއި ކޮމިއުނިޓީ ނޫސްތަކުގެ ދައުރުގެ ތަފާތާއި މުހިންމުކަމާއި، ދައުލަތުގެ ސިޔާސީ ފަރާތްތަކުން މީޑިއާތަކަށް ކުރިމަތިވާ ހުރަސްތަކާއި ގުޅޭގޮތުން ވަނީ މަޝްވަރާކޮށް ޚިޔާލު ހުށައަޅާފައެވެ. އަދި މާލީ ގޮތުން ދެމެހެއްޓެނިވި މޮޑެލެއް މީޑިއާ ހިންގުމުގައި ހޯދުންފަދަ ދާއިރާތަކުންވެސް މަހާސިންތާގެ ބައިވެރިން މަޝްވަރާކުރެއްވިއެވެ.
ބައިވެރިންގެ ޚިޔާލުތަކުގެ ތެރޭގައި މީޑިއާ ދާއިރާއަކީ ބިދޭސީންނަށް މަސައްކަތް ނުކުރެވޭނެ ދާއިރާއަކަށްވާއިރު މިދާއިރާއިން ދިވެހިން ތަމްރީން ކުރުމުގެ މުހިންމުކަން ފާހަގަކުރެއްވިއެވެ. އެގޮތުން އެއްވެސް ތަންރީނެއް އަދި ދާއިރާގެ ތަޖުރިބާއެއް ނެތި ނޫސްވެރިންގެ ގޮތުގައި ދާއިރާއަށް މީހުން ނުކުންނަކަން ފާހަގަކުރެއްވިއެވެ. އަދި މިދާއިރާއިން ކިޔަވައިދޭ ތަންތަނުގައި ކިޔަވައިދިނުމުގައި ހަރަކާތްތެރިވާ ލެކްޗަރާއިންގެ ގޮތުގައި ނޫސްވެރިކަމުގެ ދާއިރާގެ އެއްވެސް ތަޖުރިބާއެއް ތަމްރިނެއް ނެތް ބޭފުޅުން ކިޔަވައިދިނުމުގައި ހަރަކަތްތެރިވުމަކީވެސް މިދާއިރާ ކުރިއަރުވަން ހުރި ގޮންޖެހުމެއްގެ ގޮތުގައި ބައިވެރިން ފާހަގަކުރެއްވިއެވެ.
މި މަހާސިންތާގެ ބައިވެރިންވަނީ ނޫސްވެރިން ތަމްރީން ކުރުމުގައި މޯލްޑިވްސް މީޑިއާ ކައުންސިލުން އިސްނަގައިގެން ތަމްރީންނާއި ތަޢުލީމް ފޯރުކޯށްދިނުން ކުރިއަށް ގެންދިއުމަށްވެސް ޚިޔާލު ހުށައަޅާފައެވެ. އެކަމުގެ ސަބަބުން މީޑިއާތަކުގެ ފެންވަރު ރަނގަޅުވެ ނަތީޖާވެސް ރަނގަޅުވެގެންދާނެކަމަށް ގިނަ ބައިވެރިން ވަނީ ވިދާޅުވެފައެވެ.
މީގެއިތުރުން މޯލްޑިވްސް މީޑިއާ ކައުންސިލްއާއި މޯލްޑިވްސް ބްރޯޑްކާސްޓިންގ ކޮމިޝަން އެއްކޮށްލައިގެން މީޑިއާގެ ދައުރު ފުޅާކޮށް ކުރިއެރުވުމުގެ މުހިންމުކަންވެސް މަހާސިންތާގެ ބައިވެރިން ވަނީ ފާހަގަކުރައްވާފައެވެ.
މި މަހާސިންތާގައި ބައިވެރިން ހުށައެޅި ޚިޔާލުތައް ހިމަނާ ރިޕޯޓެއް އެކުލަވާލުމަށް މީޑިއާކައުންސިލުން ވަނީ ނިންމާފައެވެ. އަދި އެރިޕޯޓް ރައްޔިތުންގެ މަޖިލީހަށާއި، ކަމާގުޅުންހުރި މުއައްސަސާތަކަށް ހުށައެޅުމަށްވެސް ނިންމާފައިވާކަމަށް މޯލްޑިވްސް މީޑިއާ ކައުންސިލުން ވިދަޅުވެއެވެ.