ރާއްޖޭގައި ޤަވާއިދާ ޚިލާފަށް ދިރިއުޅޭ ބިދޭސީންގެ މައްސަލަ ޙައްލުކުރުމަށް ކުރާ މަސައްކަތުގެދަށުން އަންނަ ޖުލައިމަހުގެ ތެރޭގައި ކޮންމެ ހަފްތާއަކު 2 ފްލައިޓްގައި ބިދޭސީން އަނބުރާ އެމީހުންގެ ޤައުމުތަކަށް ފޮނުވާލާނެކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން މިނިސްޓަރ ޝާހިދު ވިދާޅުވީ، ކޯވިޑް-19އާ ރާއްޖެއިން ކުރިމަތިލީއިރު އެންމެ ބޮޑު ގޮންޖެހުމަކަށް ދިމާވި އެއްކަމަކީ ޤަވާޢިދާ ޚިލާފަށް ރާއްޖޭގައި އުޅޭ ބިދޭސީންގެ ތެރޭގައި ބަލި ފެތުރިގެން ހިނގައިދާނެތީއައި އޭގެ ސަބަބުން ކުރިމަތިވެދާނެ ބޮޑު ނުލައްކަލަކުން ޤައުމު ސަލާމަތްކުރުންކަމަށެވެ.
ރާއްޖޭގައި ޤަވާޢިދާ ޚިލާފަށް ބިދޭސީން އުޅޭ މައްސަލއަކީ ކުރީގެ ސަރުކާރުތަކުން ގަސްތުގައި ހިންގާފައިވާ ބޮޑު ޖަރީމާއެއްކަމަށް ތުހުމަތުކުރައްވައި މިނިސްޓަރ ވިދާޅުވީ، މި މައްސަލައަކީ މިހާތަނަށް އެއްވެސް ސަރުކާރަކަށް ޙާއްލުނުކުރެވުނު މައްސަލައެއްކަމަށެވެ.
ނަމަވެސް މި ސަރުކާރުން މިމައްސަލަ ހައްލުކުރައްވުމުގެ މަސައްކަތްޕުޅު ފެށްޓެވީ ވަރަށް ކެރިވަޑައިގެންކަން ފާހަގަކުރައްވައި މިނިސްޓަރ ޝާހިދު ވަނީ އިކޮނޮމިކް މިނިސްޓަރ ފައްޔާޟް އިސްމާޢީލް ކުރައްވާ މަސައްކަތްޕުޅުތަކަށްޓަކައި ޝުކުރުއަދާކުރައްވާފައެވެ.
"ދިވެހިރާއްޖޭގައި އަދި މިހާތަނަކަށް އެއްވެސް ސަރުކާރަކުން ޤަވާއިދާ ޚިލާފަށް މިތާއުޅޭ މީހުން އަނބުރާ ފޮނުވާލުމުގައި އިސްނަގައިގެން މަސައްކަތްތަކެއް ކުރެވިފައެއް ނެތް. އެހިތްވަރެއްނެތް. އެ ހޮތްވަރެއް ނޯންނާނެނޫންތޯ އެކަންކުރުމުގަ އެސަރުކާރުގެ މީހުން ބައިވެރިވެފައޮތީމަ. އެހެންނަމަވެސް މިސަރުކާރުން، ރައީސް އިބްރާހީމް މުޙައްމަދު ޞާލިޙްގެ ސަރުކާރުން ދިވެހިރާއްޖޭގެ ސަލާމަތާއި ރައްކާތެރިކަމަށް މިކަން ހައްލުކުރެއްވުމަށް ނިންމެވީ." ފޮރިން މިނިސްޓަރ ވިދާޅުވިއެވެ.
ޤަވާއިދާ ޚިލާފަށް ރާއްޖޭގައި އުޅުނު 2689 މީހުން މިހާތަނަށް އަނބުރާ ޤައުމަށް ފޮނުވާލާފައިވާކަމަށާ، މިހަފުތާގައިވެސް އިތުރު ބަޔަކު ޤައުމަށް އަނބުރާ ފޮނުވާލައްވާނެކަމަށް މިނިސްޓަރ ވިދާޅުވިއެވެ. ރާއްޖޭގައި ޤަވާޢިދާ ޚިލާފަށް އުޅޭ ބަންގްލަދޭޝް މީހުންގެ މައްސަލާގައި، އެޤައުމުގެ ޚާރިޖީވަޒީރާ ވާހަކަފުޅުދައްކަވާ މަޝްވަރާކުރައްވަމުން ގެންދަވާކަން ފާހަގަކުރައްވައި ފޮރިން މިނިސްޓަރ ވިދާޅުވީ، ބަންގްލަދޭޝްގެ ބަޔަކު ޤާނޫނާ ޚިލާފަށް ރާއްޖެ ގެނެސްގެން އެމީހުން ނިކަމެތި ޙާލެއްގައި ގެންގުޅޭކަން ބަންގްލަދޭޝްގެ ޚާއްރިޖީވަޒީރުވެސް ޤަބޫލުފުޅުކުރައްވާކަމަށެވެ. އެހެންކަމުން އެކަން ޙައްލުކުރުމަށް ދިވެހި ސަރުކާރަށް ހުރިހާ އެހީތެރިކަމެއް ދެއްވާނެކަމަށް ބަންގްލަދޭޝްގެ ޚާރިޖީވަޒީރު ޔަޤީންކަން ދެއްވާފައިވާކަމަށްވެސް މިނިސްޓަރ ވިދާޅުވިއެވެ.
ޤަވާއިދާއި ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަކީ ފަސޭހަކަމެއް ނޫންކަން ފާހަގަކުރައްވައި މިނިސްޓަރ ވިދާޅުވީ، މިސަރުކާރުން މިކަން ހައްލުކުރާނީ އިންސާނީ ހައްޤުތައްވެސް ރައްކާތެރިކުރެވޭގޮތްތަކަށް ބައްލވައިގެން ރާއްޖެއަށް ސަލާމަތާއި ރައްކާތެރިކަން ކަށަވަރުކުރުމަށްކަމަށެވެ.
"އިއްޔެވެސް ބަންގަލަދޭޝްގެ ޚާރިޖީވަޒީރު އަޅުގަނޑަށް ގުޅުވާފަ އެބައޮތް ވިދާޅުވެފަ ޖުލައި މަހުވެސް ކޮންމެ ހަފްތާއަކު 2 ފްލައިޓް އެކޮޅަށް ބޭއްވޭނެ އިންތިޒާމް ހަމަޖައްސއިދެއްވާނެކަމަށް. އެހެންކަމުން މި އަންނަ ޖުލައިމަހުވެސް ހަމަ ކޮންމެ ހަފްތާއަކު 400 މީހުން ފޮނުވަމުން ގެންދާނަން. އިކޮނޮމިކް މިނިސްޓްރީން މިފަދަ ހިތްވަރުގަދަ މަސައްކަތެއްކުރާކަން އެއީ އަޅުގަނޑުމެން ދިވެހި ސަރުކާރުން މިއަދު އިކޮނޮމިކް މިނިސްޓަރަށްވެސް ޝުކުރު ދަންނަވަންޖެހޭ ކަމެއް." މިނިސްޓަރ ޝާހިދު ވިދާޅުވިއެވެ.
ރާއްޖޭގައި ވޯކް ޕާމިޓާ ނުލާ މަސައްކަތް ކުރާ 5000 ބިދޭސީން ކުރިއަށްއޮތް ތިން މަސްދުވަހުގެ ތެރޭގައި އަނބުރާ ޤައުމުތަކަށް ފޮނުވާލާނެކަން ސަރުކާރުން ވަނީ ހާމަކުރައްވާފައެވެ.