ކޯވިޑް-19އަށް މިއަދު ރާއްޖެއިން ޕޮޒިޓިވްވީ 16 މީހެއްކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން ހާމަކޮށްފިއެވެ. މިއަދު ބައްޔަށް ޕޮޒިޓިވްވެފައިވަނީ 8 ދިވެހިންނާއި، ބަންގްލަދޭޝްގެ 7 މީހަކާއި އިންޑިއާގެ މީހެކެވެ. މިއާއެކު ރާއްޖެއިން މިބަލި ޖެހުނު މީހުންގެ ޢަދަދު ވަނީ 2203އަށް އަރާފައެވެ.
ކޯވިޑް-19އަށް ޓެސްޓްކުރުމަށް ރާއްޖޭގައި 41،554 ސާޅީސް އެއްހާސް ފަސްސަތޭކަ ފަންސާސް ހަތަރު ސާމްޕަލެއް ވަނީ ނަގާފައެވެ. ކޯވިޑަށް ޓެސްޓްކުރުމަށް ނަގާ ސާމްޕަލްތަކުގެ ޢަދަދު އެޗްޕީއޭއިން މިހާރު ވަނީ ކުރިއަށްވުރެ އިތުރުކޮށްފައެވެ. އެގޮތުން މިހާރު ދުވާލެއްގެ މައްޗަށް ކޯވިޑަށް ޓެސްޓްކުރުމަށް އެއްހާހަށްވުރެ ގިނަ ސާމްޕަލް ނަގާކަމަށް ތަފާސް ހިސާބުތަކުން ދައްކައެވެ. ޖޫން މަހުގެ ކުރިން މި ޢަދަދުތައް ހުރީ ހަތް ސަތޭކައިން ދަށުގައެވެ. ކޯވިޑް-19އިން އަރައިގަތުމަށް ބަލި މުޖުތަމަޢުގައި އޮތް މިންވަރު ދެނެގަތުމަށް ޓެސްޓްކުރާ އަދަދު އިތުރުކުރުމަކީ މުހިންމުކަމެއްކަމަށް ސިއްޙީ ތަޖުރިބާކާރުންދެކެއެވެ.
މިހާތަނަށް ރާއްޖެއިން ކޯވިޑް-19އަށް އެންމެ ގިނައިން ޕޮޒިޓިވްވެފައިވަނީ ޒުވާން ޢުމުރުފުރައިގެ މީހުންނެވެ. އެގޮތުން އެންމެ ގިނައިން ޕޮޒިޓިވްވެފައިވަނީ ޢުމުރުން 21 އަހަރާއި 40 އަހަރާއި ދެމެދުގެ މީހުންނެވެ. އަދި މީގެތެރޭގައި ގިނައީ ރާއްޖޭގައި މަސައްކަތްކުރާ ބިދޭސީ މަސައްކަތްތެރިންނެވެ.