އަލަށް ޢަމަލުކުރަންފެށި މަސްވެރިކަމުގެ ޤާނޫނުގެ ދަށުން ފިޝަރީޒް މިނިސްޓަރ ޒަހާ ވަޙީދު އަދާކުރައްވަން ޖެހިވަޑައިގަންނަވާ ޒިންމާ އަދާކުރައްވާފައިނުވާތީކަމަށް ވިދާޅުވެ މަޖިލީހުގެ ޤަވާއިދު ކޮމިޓިން އެކަމަނާ މަޤާމުން ވަކިކުރުމަށް ނިންމާފައިވާ ނިންމުން އަލުން ދިރާސާކުރުމަށް ކޮމިޓީއަށް ފޮނުވާލައިފިއެވެ.
މިދިޔަ އަހަރުގެ ސެޕްޓެމްބަރު މަހުގެ 16 ވަނަ ދުވަހު ރައީސުލްޖުމްހޫރިއްޔާ ތަސްދީޤްކުރެއްވި މަސްވެރިކަމާއި ބެހޭ ޤާނޫނުގައި ބަޔާންކުރާ، ގިނަ ޤަވާއިދުތަކެއް ފިޝަރީޒް މިނިސްޓަރ ނިންމަވާފައި ނުވާކަމަށް ޤަވާއިދު ކޮމިޓިން ވަނީ ފާސްކޮށްފައެވެ. އަދި ކޮމިޓީގެ ރިޕޯޓަށް މެންބަރުން ބަހުސްކުރުމަށްފަހު މިރޭ ވޯޓަށް އަހާފައިވަނީ އެ ރިޕޯޓް އަލުން ދިރާސާކުރުމަށް ކޮމިޓީއަށް ފޮނުވުމަށެވެ. މިގޮތަށް ފާސްވީ ވޯޓްގައި ބައިވެރިވެވަޑައިގެންނެވި 69 މެންބަރުންގެ އިއްތިފާޤުންނެވެ.
ކޮމިޓީގެ މި ނިންމެވުމާއި، މަޖިލީހުގެ ޖަލްސާގައި މެންބަރުންދެއްކެވި ވާހަކަފުޅުތަކަށް ރިޔާޢަތްކޮށް ފިޝަރީޒް މިނިސްޓަރ ވަނީ މަޖިލީހުގެ ރައީސް މުޙައްމަދު ނަޝީދަށް ސިޓީފުޅެއް ފޮނުވާފައެވެ. މި ސިޓީފުޅު ވަނީ މަޖިލީހުގެ ޖަލްސާއަށް އިއްވާފައެވެ.
ފިޝަރިޒް މިނިސްޓަރ ޒަހާ ވަހީދު މަޖިލީހަށް ފޮނުވާފައިވާ ސިޓީފުޅުގައިވަނީ މަސްވެރިކަމުގެ ޤާނޫނުގެ ދަށުން ހަދަންޖެހޭ 6 ޤަވާއިދެއް އެކުލަވާލާ ބަންޑާރަ ނާއިބުގެ އޮފީހަށް މިހާރު ފޮނުވާފައިވާކަމަށެވެ. އަދި މަސްވެރިކަމުގެ ޤާނޫނުގެ ދަށުން ހަދަންޖެހޭ މެނޭޖްމަންޓް ޕްލޭންތައް ހެދުމަށް ޤާނޫނަށް ޢަމަލުކުރަންފަށާ ތާރީޚުން ފެށިގެން އެއް އަހަރު ދުވަހުގެ މުއްދަތެއް ލިބިދޭއިރު އެ މުއްދަތު ހަމަވާނީ މިއަހަރުގެ ސެޕްޓެމްބަރު މަހުގެ 16 ގައި ކަމަށްވެސް މި ސިޓީފުޅުގައި ބަޔާންކުރައްވާފައިވެއެވެ.
މިހާރު ޢަމަލުކުރަމުންދާ އައު މަސްވެރިކަމުގެ ޤާނޫނަށް އަމަލުކުރަން ފަށަފައިވަނީ މިދިޔަ އަހަރުގެ ސެޕްޓެމްބަރު މަހުގެ 16 ވަނަ ދުވަހުން ފެށިގެންނެވެ. މިނިސްޓަރ ވަނީ މިމުއްދަތު ހަމަވުމުގެ ކުރިން މެނޭޖްމަންޓް ޕްލޭންތައް ފުރިހަމަކޮށް ނިންމަންޖެހޭ މުއްދަތުގައި ފުރިހަމަކުރުމަށް އެ މިނިސްޓްރީގެފަންނީ މުވައްޒަފުން މަސައްކަތްކުރައްވަމުން ގެންދަވާކަމަށްވެސް ވިދާޅުވެފައެވެ. އަދި ޤާނޫނުގެ ދަށުން އައްޔަންކުރަންޖެހޭ ރޭންޖަރުން ޢައްޔަންކުރުމަށް އެލްޖީއޭއާއެކު އެއްބަސްވުމެއްގައި ސޮއިކުރުމަށް މިހާރު ތައްޔާރުވެފައިވާކަމަށެވެ. ނަމަވެސް މިމަސައްކަތް ފުރިހަމަ ކުރެވިފައިނުވަނީ ކޯވިޑް-19 ފެތުރެން ފެށުމުންކަމަށާއި، ނަމަވެސް އަދިވެސް ރޭންޖަރުން ހޮވާ ތަމްރީން ކުރުމުގެ މަސައްކަތް ފެށުމަށް ތައްރުވަމުން އަންނަކަމަށްވެސް މިނިސްޓަރުގެ ސިޓީފުޅުގައި ވަނީ ވިދާޅުވެފައެވެ.
މި ޤާނޫނުގެ ދަށުން މިނިސްޓަރ ހައްދަވަންޖެހޭ ޤަވާއިދުތައް އެކުލަވާލާފައިނުވާކަމަށް ބުނެ މަޖިލީހުގެ ޤަވައިދު ކޮމިޓީން އެކުލަވާލި ރިޕޯޓްގައިވަނީ ޤާނޫނެއްގައި ވަކި ގޮތަކަށް ޢަމަލުކުރުމަށް ބަޔާންކޮށްފައިވާނަމަ އެއީ ބަރީޢަވެވެން ނެތްކަމެއްކަމަށެވެ. އަދި ޤާނޫނުގެ ދަށުން އެކުލަވާލަންޖެހޭ ޤަވާއިދުތައް ނިންމުމުގައި ސިޔާސީ ބޭފުޅުންގެ ފަރާތުން އެއްވެސް ނުފޫޒެއް ފޯރާތޯވެސް ކޮމިޓީގެ މެންބަރުން ސުވާލު އުފައްދާފައިވެއެވެ. ނަމަވެސް އެފަދަ އެއްވެސް ނުފޫޒެއް ނެތްކަމަށް ކޮމިޓީއާއި ހިއްސާކޮށްފައިވާ މަޢުލޫމާތުގައި މިނިސްޓްރީގެ ފަރާތުން ވިދާޅުވެފައިވެއެވެ.
މި މައްސަލައަށް މަޖިލީހުގެ ތަޅުމުގައި ބަހުސްކުރި ސަރުކާރަށް ތާޢީދުކުރާ ގިނަ މެންބަރުން ވަނީ މަސްވެރިކަމުގެ ސިޔާސަތުތައް ތަންފީޒްކުރުމަކީ ސަރުކާރުގެ މުހިންމު ވަޢުދަކަށް ވީހިނދު އެ ވަޢުދު ފުއްދުމަށް މިނިސްޓަރ ނުކުޅެދިފައިވާކަމަށް ވިދާޅުވެފައެވެ. އަދި ގިނަ މެންބަރުން ވަނީ މިނިސްޓަރ ޒަހާގެ އިސްތިއުފާއަށްވެސް ގޮވާލައްވާފައެވެ.
ޤާނޫނު އަސާސީގެ 101 ވަނަ މާއްދާގައި ބަޔާންކޮށްފައިވަނީ ވަޒީރުންގެ މަޖިލީހުގެ މެންބަރެއްގެ އިތުބާރު ނެތްކަމަށް ރައްޔިތުންގެ މަޖިލީހުން ފާސްވެއްޖެކަމަށް ބެލޭނީ، މަޖިލީހުގެ ޖުމްލަ މެންބަރުންގެ އަޣުލަބިއްޔަތު، އެ މެންބަރެއްގެ އިތުބާރު ނެތްކަމުގެ ހުށަހެޅުމަށް ލިބިއްޖެނަމައެވެ. ރައްޔިތުންގެ މަޖިލީހުން ވަޒީރުންގެ މަޖިލީހުގެ މެންބަރެއްގެ އިތުބާރު ނެތްކަމަށް ފާސްކޮށްފިނަމަ އެ މެންބަރަކު އޭނާގެ މަޤާމުން ވަކިވީކަމަށްވެސް ބަޔާންކޮށްފައިވެއެވެ.