ސުޕްރީމް ކޯޓްގެ ޝަރީޢަތްތައް އޮންލައިންކޮށް ކުރިއަށް ގެންގޮސް، އެ ޝަރީޢަތްތައް ވަގުތުން ޓްވިޓާ އަދި ޔޫޓިއުބް މެދުވެރިކޮށް ދެއްކުމަކީ އިންޞާފު ލިބޭކަމުގެ އިޙުސާސް ރައްޔިތުންނަށް ކުރެވޭނެކަމެއްކަމަށް ބަންޑާރަ ނާއިބު އިބްރާހީމް ރިފްޢަތު ވިދާޅުވެއްޖެއެވެ.
ބަންޑާރަ ނާއިބު މިހެން ވިދަޅުވީ، މިއަދުން ފެށިގެން ސުޕްރީމް ކޯޓުގެ ޝަރީޢަތްތައް މުއާސަލާތީ ވަސީލަތްތައް ބޭނުންކޮށްގެން ދުރުން ކުރިއަށް ގެންދިއުމުގައި ޢަމަލުކުރާނެ ގޮތުގެ ގަވާއިދެއް ޢާންމުކުރުން އެކަމާއި ގުޅިގެން ކުރއެއްވި ޓްވީޓެއްގައެވެ.
ބަންޑާރަ ނާއިބު ވިދާޅުވީ، ފުރަތަމަ ފަހަރަށް ސުޕްރީމް ކޯޓުގެ ޝަރީޢަތްތައް އޮންލައިންކޮށް ކުރިއަށް ގެންދިއުމަކީ ބޭނުންބޮޑު ތާރީޚީ ބަދަލެއްްކަމަށެވެ. ޓެކްނޮލޮޖީ ބޭނުންކުރުމުން ޚަރަދާއި ވަގުތު ސަލާމަތްވާނެކަމަށާއި، ޝަރީޢަތް އަވަސްވެ، އިންޞާފު ހޯދަން ހިނގަންޖެހޭ ދިގު މަގު ކުރުވެގެންދާނެކަމަށްވެސް ބަންޑާރަ ނާއިބު ވިދާޅުވެފައިވެއެވެ. އަދި ކޯޓުތަކުގެ އަބުއިކަން މާޒީވެ، ޝަރީޢަތުގެ އަޑާއި މަންޒަރު ދުރާއި ގާތުން ފެނިދެނިވުމުން އިންޞާފް ލިބޭކަން އިޙުސާސްކުރެވޭނެކަމަށްވެސް އެމަނިކުފާނު ވިދާޅުވެފައިވެއެވެ.
މިހާރު އިޢުލާންކޮށްފައިވާ ސިއްޙީ ކުއްލި ނުރައްކަލުގެ ޙާލަތުގައި ސުޕްރީމް ކޯޓުގެ ޝާރިޢަތްތައް މެދިކެނޑިފައި އޮތުމަށްފަހު، އަލަށް ޢަމަލުކުރަންފެށި ޤަވާއިދާއެކު، ސުޕްރީމް ކޯޓަށް ހުށަހެޅޭ މައްސަލަތަކުގެ ޝަރީޢަތްތައް މެދުކެނޑުމެއްނެތި ކުރިއަށް ގެންދިއުމުގެ އިންތިޒާމު ހަމަޖެހިގެންދާނެކަމަށް އެކޯޓުން ވަނީ ވިދާޅުވެފައެވެ.