ޢައްޑޫސިޓީއަށް މިހާރުކުރަމުންދާ ވިއްސާރައއި ގުޅިގެން ލިބެމުންދާ ގެއްލުން ކުޑަކުރުމަށް ވީހާވެސް އަވަހަށް ފިޔަވޅުތައް އަޅައި މާލީ އެހީތެރިކަން ދިނުމަށް ގޮވާލާ ކުއްލި މައްސަލައެއް ރައްޔިތުންގެ މަޖިލީހަށް ހުށައަޅައިފިއެވެ. މި މައްސަލަ ހުށަހެޅުއްވީ ފޭދޫ ދާއިރާގެ މެންބަރު މުޙައްމަދު ނިހާދެވެ.
ފޭދޫ ދާއިރާގެ މެންބަރު މުޙައްމަދު ނިހާދު ހުށަހެޅުއްވި ކުއްލި މައްސަލާގައި ވަނީ، އައްޑޫސިޓީއަށް ކުރަމުންދާ ވިއްސާރައިގެ ސަބަބުން ރަށްރަށަށާއި ގެދޮރަށް އަދި މީހުންގެ މުދަލަށް ލިބެމުންދާ ގެއްލުން ކުޑަކުރުމަށް މިހާރުން މިހާރަށް ފިޔަވަޅު އެޅުމަށާއި، ލިބޭ ގެއްލުން ފޫބެއްދުމަށް ވީހާވެސް އަވަހަށް މާލީ އެހީ ފޯރުކޮށްދިނުމަށް ގޮވާލާކަމަށެވެ.
މި މައްސަލަ ހުށަހެޅުއްވުމަށްފަހު ވާހަކަފުޅު ދައްކަވަމުން ނިހާދު ވިދާޅުވީ، އައްޑޫ ސިޓީގެ ހުރިހާ ރަށެއްގައި، ޑިޒާސްޓަ މެނޭޖްމަންޓް ޕްލޭނެއް އެކުލަވާލައި މޫސުމަށް އަންނަ ބަދަލުތަކުން އަރައިގަތުމަށް، ޚާއްޞަކޮށް ވިއްސާރަ ކުރުމުގެކުރިން އެކަމުން ލިބިދާނެ ގެއްލުންތައް ކުޑަކުރުމަށް މަސައްކަކަތްކުރަންޖެހޭކަމަށެވެ. ނިހާދު ވަނީ ރައްޔިތުންގެމަޖިލީހުން ފާސްކުރި ކްލައިމެޓް އެމެޖެންސީއާއި އެއްގޮތަށް ހުރިހާ އިދާރާއަކުން ޢަމަލުކުރުމަށްވެސް ގޮވާލައްވާފައެވެ.
"ކްލައިމެޓް އެމެޖެންސީއެއް އިޢުލާންކޮށް އެއަށްކުރަންޖެހޭ ކަންކަން އަދި ނުކުރެވިފައިވުމުން ވަރަށް ގިނަ ގޮންޖެހުން އެބަހުރި. އެހންކަމުން އަޅުގަނޑު ގޮވާލަން ކްލައިމެޓް އެމެޖެންސީއަކީ ޖޯކެއްކަމަށް ނުދެކި މޫސުމަށް އަންނަ ބަދަލުގެ ސަބަބުން ރާއްޖޭގެ ރަށްތަކާއި، ރާއްޖޭގެ ރައްޔިތުންގެ ގެދޮރާއި މުދާ ހިމާޔަތްކުރުމަށް ކުރަންޖެހޭ މަސައްކަތްތައް މިހާރުން މިހާރަށް ފެށުމަށް." ނިހާދު ވިދާޅުވިއެވެ.
މި މައްސަލައަށް ބަހުސްކުރެއްވި އައްޑޫސިޓީއަށް ނިސްބަތްވެވަޑައިގަންނަވާ ހުރިހާ މެންބަރުންވެސް ވަނީ މާލީ އެހީތެރިކަން އަވަސްކުރުމަށް ގޮވާލައްވާފައެވެ. އަދި ފެނބޮޑުވުމުގެ މައްސަލައަކީ ޒަމާންވީ އަދި ހައްލެއް ލިބިފައިނުވާ މައްސަލައެއްކަމަށާއި، ސަރުކާރުގެ ކަމާގުޅުންހުރި އިދާރާތަކާއި ކައުންސިލުން އެހީ ހަމަޖެއްސުމުގެ ކަންކަން ކުރިއަށްދާކަމަށް މެންބަރުން ވިދާޅުވިއެވެ. އައްޑޫ ފެންބޮޑުވުމުގެ މައްސަލައަށް ދާއިމީ ހައްލެއްގެ މުހިންމުކަންވެސް މެންބަރުން ފާހަގަކުރެއްވިއެވެ.
އައްޑޫ ސިޓީއަށް ކުރަމުންދާ ވިއްސާރާގައި 600 އަށްވުރެ ގިނަ ގެއަށް ވަނީ ފެންވަދެ ގެއްލުންވެފައެވެ. މިގޮތުން ހިތަދޫ 28 ގެއަކަށް، މަރަދޫ 20 ގެއަކަށް، މަރަދޫ ފޭދޫ 44 ގެއަކަށް އަދި ފޭދޫ 544 ގެއަކަށް ގެއްލުންވެ އާއިލާތަކަށް ދަތިވެފައިވާކަމަށް މެންބަރުން ވިދާޅުވިއެވެ.