ހިއުމަން ރައިޓްސް ކޮމިޝަންގެ މެންބަރުން މަޤާމުން ވަކިކުރުމުގެ މައްސަލަ ރައްޔިތުންގެ މަޖިލީހުގެ މާދަމާގެ ޖަލްސާއަށް އެޖެންޑާކޮށްފިއެވެ.
މާދަމާ ހެނދުނު 11:00ގައި ފަށާ ޖަލްސާގައި ވަނީ މަޖިލީހުގެ ރައީސްގެ މޭޒުން ހުށައަޅާ ކަންކަމުގެ ތެރެއިން ހިއުމަން ރައިޓްސް އެންޑް ޖެންޑަރ ކޮމިޓީން ދިރާސާކޮށް އެޗްއާރުސީއެމްގެ މެންބަރުންމަޤާމުން މަކިކުރުމަށް ނިންމާ ހުށައަޅާފައިވާ މައްސަލަ ތަޅުމުގައި އިޢުލާންކުރުމަށް އެޖެންޑާ ކޮށްފައެވެ.
މަޖިލީހުގެ އައު ޤަވާއިދު ބުނާގޮތުން މުސްތަޤިއްލު މުއައްސަސާތަކުން މެމްބަރުންނާއި، މުސްތަޤިއްލު މަޤާމުގައި ތިއްބަވާ ބޭފުޅުން، އެ މަޤާމުތަކުން ވަކިކުރުމުގެ މައްސަލައެއް މަޖިލީހަށް ހުށަހެޅުމުން، މަޖިލީހުގެ ރިޔާސަތުން އިޢުލާންކުރަން ޖެހިވަޑައިގަންނަވާނެއެވެ. އެއަށްފަހު ބަހުސްކުރުމެއްނެތި އެ މައްސަލަ ދިރާސާކުރުމަށް ކަމާގުޅުންހުރި ކޮމިޓީއަށް ފޮނުވަންވާނެކަމަށްވެސް މަޖިލީހުގެ ޤަވާއިދުގައި ބުނެފައިވެއެވެ.
އެޗްއާރުސީއެމްގެ މެންބަރުންމަޤާމުން ވަކިކުރުމަށް ނިންމާ ކޮމިޓީން ނިންމި ރިޕޯޓްގައި ވަނީ، މަޖިލީހުން މަޢުލޫމާތު ސާފުކުރުމަށް ސިޓީ ފޮނުވުމުގެކުރިން، ދައުލަތުގެ ބެލުމުގެ ދަށުގައި މީހުން ތިބޭ ތަންތަނުގެ ޙާލަތު ބެލުމަށް އެޗްއާރުސީއެމުން އެއްވެސް ޒިޔާރަތެއް ކޮށްފައިނުވާކަމަށެވެ. އަދި އިޤްތިޞާދީ ލޮޅުންތަކާއި ގުޅިގެން އެތައްބައެއްގެ ވަޒީފާގެ ހައްޤު ކުއްލިއަކަށް ގެއްލި އާމްދަނީ ލިބުމުން މަހުރޫމުވެގެން ދިޔައިރުވެސް، މިކަމުގައި އެކޮމިޝަނުން ދެކޭގޮތް އަދި އަޅާފައިވާ ފިޔަވަޅުތައް ހާމަކޮށްފައި ނުވާކަމަށެވެ. މީގެ އިތުރުން ޢާންމު އުސޫލުން ޖަލުތަކުގައި ކުރެވޭ މުއާމަލާތްތައް މިވަގުތު ބަންދުވެފައިވާއިރު، އަދި އެޗްއާރުސީއެމްއަށް މައްސަލަ ހުށަހެޅެން އޮންނަ އިންތިޒާމުވެސް ބަދަލުވެފައިވާއިރު ޖަލުގައި ތިބޭ މީހުން ކޮމިޝަނަށް މައްސަލަ ހުށަހެޅޭނެ ގޮތެއް ހަމަޖައްސާފައިނުވާކަމަށްވެސް ހިއުމަން ރައިޓްސް އެންޑް ޖެންޑަރ ކޮމިޓީގެ ރިޕޯޓްގައިވެއެވެ.
ފަސް މެންބަރުންގެ މައްޗަށް އެކުލެވޭ އެޗްއާރުސީއެމްގެ ރައީސްއަކީ، އައިމިނަތު އީނާސްއެވެ. އަދި ނައިބު ރައީސް އަކީ މުޙައްމަދު ޒާހިދެވެ. ދެން ތިއްބެވި މެންބަރުންނަކީ މޫސާ އަލީ ކަލޭފާނާއި، ނައިވީން ޢަބްދުﷲ އާއި އައިޝަތު އަފްރީން މުޙައްމަދެވެ.