ހުޅުމާލޭގައި ތިން ފަތުރުވެރިއަކަށް ތޫނު އެއްޗަކުން ހަމަލާދިން މައްސަލައިގައި ހައްޔަރުކުރި މީހުންގެ މައްސަލަ ދައުވާކުރުމަށް ފޮނުވުމުން ހެއްކާއި ޤަރީނާ ނެތުމުން އެމީހުން ދޫކޮށްލައިފިއެވެ.
ފުލުހުން ވިދާޅުވީ، ހުޅުމާލޭގައި ތިން ބިދޭސީންނަށް ވަޅިން ހަމަލާދިން މައްސަލާގައި ބަންދުކުރި މީހުންގެ ތަޙްޤީޤް ފުރިހަމަކުރުމަށްފަހު ދައުވާކުރުމަށް ޤާނޫނުގައި ބުނެފައިވާ މުއްދަތުގެ ތެރޭގައި ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާކަމަށެވެ. ނަމަވެސް މިމައްސަލާގައި ފުލުހުންގެ ތަޙްޤީޤަށް ހޯދިފައިވާ ހެއްކާއި ޤަރިނާތަކުގެ މައްޗަށް ދައުވާކުރެވެން ނެތްކަމަށް ޕީޖީން ނިންމުމާއިގުޅިގެން މިމައްސަލާގައި ބަންދުކޮށްފައިތިބި މީހުން މިހާރު ބަންދުން ދޫކޮށްލާފައިވާކަމަށެވެ.
ފުލުހުން ވިދާޅުވީ، މި މައްސަލައާއި ގުޅިގެން އިތުރަށް އަޅަންޖެހޭ ފިޔަވަޅުތައް އަޅަމުންގެންދާނެކަމަށެވެ.
ފެބުރުއަރީމަހުގެ 5 ވަނަ ދުވަހުގެ ރޭގެ ވަގުތެއްގައި ހުޅުމާލޭގައި ހެލްމެޓް އަޅައިގެން ސައިކަލެއްގައި ދިޔަ ދެމީހަކު ވަނީ ތޫނު އެއްޗަކުން ހަމަލާދީ، ރާއްޖޭގައި ޗުއްޓީ ހޭދަކުރަމުން އައި ޗައިނާގެ ފަތުރުވެރިއަކާއި، ރާއްޖޭގައި މަސައްކަތްކުރާ ޗައިނާގެ ދެމީހަކާއި އޮސްޓްރޭލިއާ މީހަކު ޒަޚަމްކޮށްލާފައެވެ. އެމީހުންނަށް ހޮސްޕިޓަލުގައި ފަރުވާދީފައިވާއިރު ހާލު ސީރިއަސް ނޫން ކަމަށް އެއިރު ފުލުހުން ވިދާޅުވެފައިވެއެވެ.
މި ހަމަލާއަކީ ރ. މަޑުއްވަރީގައި ފުލުހުން ހިންގި ޚާއްޞަ އޮޕަރޭޝަންގެ ބަދަލުހިފުމަށް ދިން ޙަމަލާއެއް ކަމަށްވެސް ފުލުހުން ކުރިން ވިދާޅުވެފައިވެއެވެ.
ފަތުރުވެރިންނަށް އަމާޒުކޮށްގެން ހުޅުމާލޭގައި ހަމަލާދީފައި ވާއިރު، އެހަމަލާގެ ޒިންމާ އުފުލާކަމަށް ބުނެ މީހަކު ސޯޝަލްމީޑިއާގައި ދައްކާފައިވާ ވާހަކަތަކެއްވެސް ފުލުހުން ގެންދަވަނީ ތަހުޤީޤުކުރައްވަމުންނެވެ.
މިމައްސަލައާއި ގުޅިގެން ހޯމް މިނިސްޓަރ އިމްރާން ޢަބްދުﷲ ވިދާޅުވެފައިވަނީ، ފަހަކަށް އައިސް ރާއްޖޭގައި ހިނގައިދިޔަ ބޮޑެތި ޙާދިސާތަކާއި މަރުތަކާއި، ދީނީގޮތުން ހަރުކަށި ފިކުރާ ގުޅިލާމެހިފައިވާކަމަށެވެ.