ރާއްޖެއިން ކޯވިޑް-19އަށް ޕޮޒިޓިވްވި އިތުރު ދެމީހަކު ބަލިން ރަނގަޅުވެ، މިބަލީގައި ފަރުވާދީ ރަނގަޅުވި މީހުންގެ ޢަދަދު 20އަށް އަރައިފިއެވެ.
ނޭޝަނަލް އެމަޖެންސީ އޮޕަރޭޝަން ސެންޓަރުގައި ބޭއްވި ޕްރެސްކޮންފަރެންސްގައި އެ ސެންޓަރުގެ ތަރުޖަމާނު މުޙައްމަދު މަބްރޫކް ޢަޒީޒް ވިދާޅުވީ ބަލިން ރަނގަޅުވެގެން މިއަދު ދެމީހަކު ދޫކޮށްލާފައިވާކަމަށެވެ. ނަމަވެސް ރަނގަޅުވެ ދޫކޮށްލި މީހުންގެ ތަފްސީލް ހާމަނުކުރައްވައެވެ.
މީގެ ކުރިން 18 މީހުން ބަލިން ރަނގަޅުވެ ދޫކޮށްލާފައިވާއިރު، އޭގެ ތެރޭގައި ގިނައީ ރާއްޖެއިން ބޭރުން އައިސް ކަރަންޓީން ފެސިލިޓީގައި ތިއްބާ ޕޮޒިޓިވްވި ގިނަ މީހުން ހިމެނެއެވެ. މީގެކުރިން ބޭއްވި ޕްރެސް ކޮންފަރެންސްގައި ޑޮކްޓަރުން ވިދާޅުވެފައިވަނީ ދަރުމަވަންތަ ހޮސްޕިޓަލުގައި ފަރުވާދެމުންދިޔަ ޢުމުރުން ދުވަސްވީ މީހެއްގެ ހާލުރަނގަޅުވެ ފުރަތަމަ ހެދި ޓެސްތް ނެގެޓިވްވެފައިވާކަމަށާއި، ދެވަނަ ޓެސްޓްގެ ނަތީޖާއަށް އިންތިޒާރު ކުރަމުންދާކަމަށެވެ.
ކޯވިޑް-19އިން ރަނގަޅުވިކަން ކަށަވަރުކުރަނީ ފަރުވާދިނުމަށްފަހު ބަލިހުރިތޯ ބަލަން ދެފަހަރު ޓެސްޓް ހެދުމަށްފަހު އޭގެ ނަތީޖާ ނެގެޓިވްވުމުންނެވެ. ރާއްޖެއިން މިހާތަނަށް ވަނީ 573 މީހަކު ޕޮޒިޓިވްވެފައެވެ.
މިހާތަނަށް 9863 ސާމްޕަލެއް ނަގާފައިވާއިރު ނަތީޖާ ނުލިބޭ 477 ސާމްޕަލް އެބައޮތްކަމަށް މަބްރޫކް ވިދާޅުވިއެވެ. މިހާތަނަށް ކޮންޓެކްޓް ޓްރޭސްގެ ތެރެއިން 441 މީހަކު ދެނެގަނެވިފައިވާކަމަށްވެސް މަބްރޫކް ވިދާޅުވިއެވެ.