ދިވެހިންގެތެރެއިން ކޯވިޑް-19އަށް ޕޮޒިޓިވްވި ފުރަތަމަ މީހާ އެބަލިން ރަނގަޅުވެ ޤައުމީ ޚިދުމަތަށް ނިކުންނަވައިފިއެވެ. ޤައުމީ ދިފާޢު ބާރުގައި މަސައްކަތްކުރައްވާ ވޮރަންޓް އޮފިސަރު މުޢައްމަރު މުޙައްމަދު ބަލިން ރަނގަޅުވެ ޤައުމީ ޚިދުމަތަށް ނުކުންނަވާފައިވަނީ މިއަދުއެވެ.
އޭނާއަކީ މާރޗްމަހު އިނގިރޭސިވިލާތުން ރާއްޖެއައިސް ކަރަންޓިން ފެސިލިޓީގައި ހުންނަވަނިކޮށް ނެގި ސާމްޕަލްއަކުން ކޯވިޑް-19އަށް ޕޮޒިޓިވްވި މީހެކެވެ. ހޮލިޑޭ އައިލެންޑް ރިސޯޓްގެ ކަރަންޓީން ފެސިލިޓީގައި ހުންނަވަނިކޮށް ކޯވިޑް-19އަށް ޕޮޒިޓިވްވެފައިވާކަން ހާމަކުރައްވާފައިވަނީ މާރޗް 27ވަނަ ދުވަހުއެވެ.
މުޢައްމަރު ކޯވިޑް-19އިން ރަނގަޅުވިކަމަށް ނޭޝަނަލް އެމެޖެންސީ އޮޕަރޭޝަން ސެންޓަރުން ހާމަކުރައްވާފައިވަނީ އޭޕްރީލް މަހުގެ 12ވަނަ ދުވަހުއެވެ. ކޯވިޑް19އިން ސަލާމަތްވެ ޤައުމީ ޚިދުމަތަށް ނިކުންނަވާ މުޢައްމަރު ކުރެއްވި ޓްވީޓެއްގައި ވިދާޅުވެފައިވަނީ ބަލިން ރަނގަޅުވެ ޤައުމީ ޚިދުމަތަށް ނިކުތުމުގެ ފުރުޞަތު ލިބިގެންދިއުމަކީ ފަޚްރުވެރިވެވަޑައިގަންނަވާ ކަމެއްކަމަށެވެ. އޭނާ ވަނީ ޑިފެންސް މިނިސްޓަރ މާރިޔާ އަޙްމަދު ދީދީއަށާއި، ސިފައިންގެ ލީޑާރޝިޕަށް އަދި މުޅި މުއައްސަސާއިން ލިބިވަޑައިގެންނެވި އެހީތެރިކަމާއި އެއްބާރުލުމާއި ހިތްވަރަށް ޝުކުރު އަދާކުރައްވާފައެވެ.
އޭނާ ވަނީ ފެސިލިޓީސްތަކުގައި ހުންނަވަނިކޮށް ޑޮކްޓަރުންނާއި ނަރުހުން އަދި ވެލިދޫ އައިސޮލޭޝަން ފެސިލިޓީސްގައި ހުންނެވިއިރު އެހީތެރިކަން ފޯރުކޮށްދެއްވި ހުރިހާ އެންމެނަށް ޝުކުރު ދަންނަވާފައެވެ.
މުޢައްމަރު ޤައުމީ ޚިދުމަތަށް ނިކުންނެވުމުން ޑިފެންސް މިނިސްޓަރ މާރިޔާއަޙްމަދު ދީދީއާއި ޗީފް އޮފް ޑިފެންސް ފޮސްވެސް ވަނީ އޭނާއަށް މަރުޙަބާ ދަންނަވާ ޝުކުރު ދަންނަވާފައެވެ.
މުޢައްމަރުގެ އިތުރުންވެސް ސިފައިންގެ ބައެއް މީހުންވަނީ ކޯވިޑް-19އަށް ޕޮޒިޓިވްވެފައެވެ. އެމީހުންނަށްދަނީ އައިސޮލޭޝަން ފެސިލިޓީތަކުގައި ފަރުވާދެމުންނެވެ.