މަޢުލޫމާތުގެ ޞައްޙަކަން ކަށަވަރުކުރުމަށްފަހު ނޫނީ ޢާންމުނުކުރުމަށް ބްރޯޑްކާސްޓިން ކޮމިޝަނުން ގޮވާލައިފި

ކޯވިޑް-19ގެ ޚަބަރާއި މަޢުލޫމާތު ފެތުރުމުގެ ފުރުޞަތު ތަނަވަސްވެފައި ވީނަމަވެސް، ޞައްޙަ މައުލޫމަތު ކަމާބެހޭ އިދާރާތަކުން ކަށަވަރުކުރުމަށް ފަހު ނޫނީ މަޢޫލޫމާތު ނުފެތުރުމަށް އެންމެހާ ނޫސްވެރިންނަށް ބްރޯޑްކާސްޓިންގ ކޮމިޝަނުން ގޮވާލައިފިއެވެ.

ބައިނަލްއަޤްވާމީ ނޫސްވެރިކަމުގެ ދުވަހުގެ ތަޙްނިޔާވިދާޅުވެ މޯލްޑިވްސް ބްރީޑްކާސްޓިންގ ކޮމިޝަނުން ޢާންމުކުރި މެސެޖުގައި ރާއްޖޭގެ މީޑިއާތަކުގައި މަސައްކަތްކުރާ ހުރިހާ ފަރާތްތަކަށް ވަނީ ދުވަހުގެ ތަޙްނިޔާ ފޮނުއްވާފައެވެ. މި އަހަރުގެ ނޫސްވެރިކަމުގެ މިނިވަންކަމުގެ ޝިޢާރެއްގެ ގޮތުގައި ޔުނެސްކޯއިން ކަނޑައަޅުއްވާފައިވަނީ “ޖާނަލިޒަމް ވިދައުޓް ފިއަރ އޯ ފޭވަރ” ނުވަތަ “ބިރުވެރިކަމެއް ނުވަތަ ވަކި ފަރާތަކަށް ބުރަވުމެއް ނެތި ކުރެވޭ ނޫސްވެރިކަން” މިޝިޔާރުކަން ފާހަގަކުރައްވާ ބްރޯޑްކޮމް އިން ވިދާޅުވީ، މި އަހަރުގެ މިދުވަހާ ކުރިމަތިލާން ޖެހިފައިވަނީ އިންސާނީ ޙަޔާތުގައިވެސް މީގެ ކުރީން ކުރިމަތިވެފައި ނުވާ ފަދަ ބޮޑު ބަލިމަޑުކަމެއް މުޅި ދުނިޔެ ތަހައްމަލުކުރަމުންދާ ނާޒުކު ދަނޑިވަޅެއްގައިކަމަށެވެ. އެހެންކަމުން، ނޫސްވެރީންގެ މަސައްކަތްތައް ވެސް މި ދުވަސްވަރު ބައްޓަންކުރަންޖެހިފައި ވަނީ މި ވަބާއިން އިންސާނިއްޔަތު ސަލާމަތްކުރުމަށް ކުރެވޭ މަސައްކަތްތަކާ އެއް މިސްރާބަކަށްކަމަށް ބްރޯޑްކޮމްގެ މެސެޖުގައިވެއެވެ.

ރާއްޖޭގައިވެސް ކޯވިޑް-19ގެ ބަލިމަޑުކަން ފެތުރެމުންދާއިރު ނޫސްވެރިންނަށް މިނިވަންކަމާއެކު މި ކަމުގެ ޚަބަރާއި މައުލޫމާތު ފެތުރުމަށް ފަހި ފުރުޞަތުތަކެއް ތަނަވަސްވެފައިވީ ނަމަވެސް، އެ ފުރުޞަތުގެ ބޭނުން ކުރަންވާނީ މި ކަމުގެ ޞައްޙަ މައުލޫމަތު ކަމާބެހޭ އިދާރާތަކުން ކަށަވަރުކުރުމަށް ފަހުގައިކަން ބްރޯޑްކޮމްގެ މެސެޖުގައި ވަނީ ފާހަގަކުރައްވާފައެވެ. އަދި ދުނިޔޭގެ ސައެންޓިފިކް ކޮމިއުނިޓީއިން ރިސާޗްކޮށް ހާމަކުރާ މި ބަލީގެ އެންމެ ފަހުގެ މައުލޫމާތަށް ބުރަވެ ނޫސްވެރިކަން މި ދާއިރާގައި ފުޅާކުރުމަކީ މުހިއްމުކަމެއްކަމަށް އެ ކޮމިޝަނުން ދެކޭކަމަށްވެސް ވިދާޅުވެފައިވެއެވެ.

މިހާރު ދުނިޔޭގައި އެކި މީޑިއާގެ ވަސީލަތްތަކުން އަދި ޚާއްޞަކޮށް މީސްމީޑިއާއިން ފެތުރެމުންދާ މައުލޫމާތުގެ ޞައްޙަކަން، ޔުނެސްކޯއިން ތައްޔަރުކޮށްފައިވާ ކޯވިޑް-19 ގެ އޮންލައިން ރިސޯސް ސެންޓަރ މެދުވެރިކޮށް ކަށަވަރުކުރެވޭނެ ނިޒާމެއް މިހާރު ޤާއިމުކޮށްފައިވުމާއެކު، އެ ނިޒާމުގެ ބޭނުން ހުރިހާ ނޫސްވެރިންވެސް ކުރުމަށް އެ ކޮމިޝަނުން ވަނީ ގޮވާލައްވާފައެވެ.

ކޯވިޑް-19 ގެ ބަލިމަޑުކަމާ ގުޅިގެން ރާއްޖެއަށް އައިސްފައިވާ އިޤްތިސާދީ ހީނަރުކަމުގެ ނުރަނގަޅު އަސަރު މީޑިއާތަކަށް ވެސް ކޮށްފައިވާ މިދަނޑިވަޅުގައި، މީޑިއާތަކަށް މާލީ އެހީތެރިކަން ފޯރުވައިދިނުމަށް ސަރުކާރުން ކުރައްވާ މަސައްކަތްތަކަށް އެ ކޮމިޝަނުން ވަނީ ޝުކުރު ދަންނަވާފައެވެ.

ނޫސްވެރިކަމުގެ މިނިވަންކަމުގެ ދުވަސް މިއަދު ފާހަގަކުރާއިރު، ޒުވާން ނޫސްވެރިންގެ ތެރެއިން ގެއްލުވާލައިފައިވާ ނޫސްވެރިޔާ، އަޙްމަދު ރިލްވާނާއި މަރާލައިފައިވާ ނޫސްވެރިޔާ، ޔާމީން ރަޝީދުގެ މަތީން ހަނދުމަކޮށް، އެ ފަރާތްތަކުގެ ޢާއިލާތަކަށް އިންސާފު އަދިވެސް ލިބިފައިނުވާކަން އެ ކޮމިޝަންގެ މެސެޖުގައި ވަނީ ފާހަގަކުރައްވާފައެވެ.