ކޯވިޑް ޖެހިގެން ފުރަތަމަ ފަހަރަށް ރާއްޖޭގައި މީހަކު މަރުވެއްޖެއެވެ. މަރުވެފައިވަނީ ޢުމުރުން 83 އަހަރުގެ ދިވެހި އަންހެނެއް ކަމަށްވާ އާމިނަތު އާދަމެވެ. މިމީހާއަކީ ކޯވިޑް-19އާ ގުޅިގެން މޮނިޓަރިންގެ ޙާލަތަށް ގެންގޮސްފައިވާ ތަނެގައި ދިރިއުޅެމުން އައި މިީހެކެވެ.
ނޭޝަނަލް އެމެޖެންސީ އޮޕަރޭޝަން ސެންޓަރުގައި ރޭ ކުއްލިގޮތަކަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ހެލްތު މިނިސްޓަރ ޢަބްދުﷲ އަމީން ވިދާޅުވީ، އާމިނަތު އާދަމް މަރުވީ ރޭ 7:10 ގައި ކަމަށެވެ. އަދި ރޭ އިރުއޮއްސުނުއިރު ނޭވާލާން އުނދަގޫވެގެން އޭނާ ހޮސްޕިޓަލަށް ގެންދިޔައިރުވެސް މަރުވެފައިވާކަމަށް މިނިސްޓަރ ވިދާޅުވިއެވެ. މިނިސްޓަރ އަމީން ވަނީ އާމިނަތު އާދަމްގެ ޢާއިލާއަށާއި ރަޙްމަތްތެރިންނަށް ތަޢުޒިޔާވިދާޅުވެފައެވެ. އަދި އެ ހިތާމާގައި ދިވެހި ސަރުކާރުން ބައިވެރިވާކަންވެސް މިނިސްޓަރ ވަނީ ހާމަކުރައްވާފައެވެ.
އާމިނަތު އާދަމަކީ މިބައްޔަށް ޕޮޒިޓިވްވި ކޭސް ނަންބަރު 126އާ ސީދާ ގުޅުންހުރި މީހެއެއްކަމަށާ، އެންމެ ފުރަތަމަ ޕޮޒިޓިވްވީ އެޢާއިލާގެ މެންބަރުންކަމަށްވެސް މިނިސްޓަރ އަމީން ވިދާޅުވިއެވެ. އާމިނަތު އާދަމްގެ ސާމްޕަލް ނަގާފައިވަނީ މިމަހުގެ 27ވަނަ ދުވަހުގެ ދަންވަރުކަމަށާ، ސާމްޕަލްގެ ނަތީޖާ ލިބުނީ އޭނާ މަރުވި ފަހުން ކަމަށްވެސް މިނިސްޓަރ ވިދާޅުވިއެވެ.
އާމިނަތު އާދަމްގެ ބަލި ބޮޑުވެގެން ހޮސްޕިޓަލަށް ގެންދިޔުން ލަސްވުމާއި އެހެނިހެން ބައެއް ކަންކަމުގައި އެޗްޕީއޭގެ އިހްމާލުވުވޭތޯ ނޫސްވެރިންން ކުރި ސުވާލުތަކަށް ޖަވާބު ދެއްވަމުން މިނިސްޓަރ އަމީން ވިދާޅުވީ ރޭގެ ޕްރެސްއަށް އައި އިރު އެފަދަ މައުލޫމާތެއް ލިބިފައިނުވާކަމަށައި އެކަން ބަލާ އިހްމާލެއްވާނަމަ އެކަމާއި މެދު ފިޔަވަޅު އަޅުއްވާނެކަމަށެވެ.
ކޯވިޑް-19އާ ގުޅިގެން ހުރިހާ ޤައުމަކުންވެސް ތަޖުރިބާކުރަމުންދާ ހިތާމަވެރި މަރުހަލާއަށް ރާއްޖެވެސް ދަތުރުކުރަން ފަށާފައިވާކަން ފާހަގަކުރައްވައި މިނިސްޓަރ ވަނީ ރާއްޖޭގައި އައިސީޔޫގައި ކޯވިޑް-19 ޖެހިފައިވާ 5 މީހަކަށް މިހާރުވެސް ފަރުވާދެމުން އަންނަކަން ފާހަގަކުރައްވާފައެވެ. އެއީ 4 ދިވެހިންނާއި ޕާކިސްތާން މީހެކެވެ.
އާމިނަތު އާދަމްގެ ޖަނާޒާ ރޭ ވަނީ ބާއްވާފައެވެ. ކަށުކަމާ ކެމީގެ ކަންކަކަން ކުރިޔަށް ގެންދިޔައީ ދީނީ ޢިލްމުވެރިންގެ މަޝްވަރާގެ މަތިން އެކަމުގެ ތަމްރީން ލިބިފައިވާ ސިފައިންނެވެ. އެ ސިފައިން ތިބީ ރައްކާތެރި ކަމުގެ ސޫޓް ލައިގެންނެވެ. ރާއްޖެއިން ކޯވިޑް-19އަށް ޕޮޒިޓިވްވި މީހުންގެ ޢަދަދު މިހާރުވަނީ 280 އަށް އިތުރުވެފައެވެ.