މިއަހަރުގެ ޖަނަވަރީ މަހު ދައުލަތައް ލިބުނު އާމްދަނީ 23 އިންސައްތަ ދަށްވެއްޖެއެވެ.
މޯލްޑިވްސް މަނިޓަރީ އޮޓޯރިޓީ އެމްއެމްއޭއިން އާންމުކޮށްފައިވާ ތަފާސްހިސާބުތައް ދައްކާގޮތުން މިދިޔަ އަހަރުގެ ޖަނަވަރީ މަހާއި އަޅާބަލާއިރު މިއަހަރުގެ ޖަނަވަރީ މަހު ހިލޭ އެހީ ނުހިމަނައި ދައުލަށް ލިބުނު އާމްދަނީ ވަނީ 586.2 (ފައްސަތޭކަ އަށްޑިހަ ހައެއް ޕޮއިންޓް ދޭއް) މިލިއަން ރުފިޔާ ދަށްވެފައެވެ. މިއީ 2019 ވަނަ އަހަރުގެ ޖަނަވަރީ މަހާއި އަޅާބަލާއިރު 23 އިންސައްތައިގެ ދަށްވުމެކެވެ.
މިއަހަރުގެ ޖަނަވަރީ މަހު ދައުލަތައް ލިބުނު އާމްދަނީ ދަށްވެފައި ވަނީ ޓެކްސްގެ ގޮތުގައި އަދި ޓެކްސް ނޫންގޮތުން ލިބުނު އާމްދަނީވެސް ދަށްވުމާއި ގުޅިގެންނެވެ. މި މުއްދަތުގެ ތެރޭގައި ޓެކްސްގެ ގޮތުގައި ދައުލަތައް ލިބުނު އާމްދަނީ ވަނީ 341.4 މިލިއަން ރުފިޔާ ދަށްވެފައެވެ. އަދި ޓެކްސް ނޫން ގޮތްގޮތުން ލިބުނު އާމްދަނީ ވަނީ 269.2 މިލިއަން ރުފިޔާ އުނިވެފައެވެ.
މިއަހަރުގެ ޖަނަވަރީ މަހު ދައުލަތުގެ ހަރަދުތައް ވަނީ 90.9 މިލިއަނަށް ދަށްކޮށްފައެވެ. މިއީ 2019 ވަނަ އަހަރުގެ ޖަނަވަރީ މަހާއި އަޅާބަލާއިރު 6 އިންސައްތައިގެ ދަށްވުމެކެވެ.
ކޯވިޑް19 ގެ ސަބަބުން ރާއްޖޭގެ އިޤްތިޞާދަށް ބޮޑު ހީނަރުކަމެއް އަންނަމުންދާއިރު މިއަހަރުގެ ތެރޭގައި ދައުލަތުގެ އާމްދަނީ ދަށްވާނެކަމަށް ސަރުކާރުން ވަނީ ވިދާޅުވެފައެވެ. އަދި ހަރަދުތައް ކުޑަކޮށް އިޤްތިޞާދު ހީނަރުވިޔަނުދިނުމަށް ގިނަ ފިޔަވަޅުތަކެއްވެސް ސަރުކާރުން އަންނަނީ އަޅުއްވަމުންނެވެ.