ދިވެހި ދަނޑުވެރިންގެ އުފެއްދުންތައް ވިއްކާ، މާކެޓު ކުރުމަށް ހާއްސަ ޕްލެޓްފޯމެއް ގާއިމްކުރުމުގެ މަސައްކަތް ގިމިކް ސްޓޫޑިއޯއިން ފަށައިފިއެވެ.
ގިމިކް ސްޓޫޑިއޯއިން ވިދާޅުވީ "ދަނޑުވެރިޔާ"ގެ ނަމުގައި ލޯނޗްކުރާ މި މޯބައިލްފޯން އެޕްލިކޭޝަނަކީ ދިވެހި ދަނޑުވެރިން ހައްދާ އުފެއްދުންތައް ވިއްކުމަށް ފަސޭހަވާނެހެން ތަރައްގީކުރާ އޮންލައިން ޕްލެޓްފޯމެކެވެ.
މި ޕްލެޓްފޯމާއިއެކު ރާއްޖޭގެ ދަނޑުވެރިކަމުގެ އުފެއްދުންތައް ގަނެވިއްކުމަށް ޓެކްނޮލޮޖީގެ ހިޔާވަހިކަންލިބި ދަނޑުވެރިކަމުގެ މަސައްކަތްތަކަށް އިންޤިލާބީ ބަދަލުތަކެއް އަންނާނެކަމަށް ގިމިކް ސްޓޫޑިއޯއިން ބުނެއެވެ.
މި އެޕްލިކޭޝަން މެދުވެރިކޮށް ދަނޑުވެރިޔާއަށް އިތުރު މީހަކު މެދުވެރިނުކޮށް އުފެއްދުންތައް އޮންލައިންކޮށް ވިއްކާލެވޭނެއެވެ. އަދި ނާލު ދޯނިފަހަރަށްލުމުން ބާޒާރުގައި ތަކެތި ތާށިނުވެ ސީދާ ގަންނަ މީހާއަށް ތަކެތި ލިބޭނެއެވެ.
މި އެޕްލިކޭޝަންގެ ބޭނުމަކީ ދަނޑުވެރިންނަށް ތަކެތި މާކެޓްކުރުމުގައި ދިމާވާ ދަތިތައް ނައްތާލުމެވެ. ދަނޑުވެރިންނަށް ތަކެތި މާކެޓްކުރުމުގައި ދަތިތަކެއް ކުރިމަތިވާނަމަ ދިވެހި އުފެއްދުންތަކުގެ މާކެޓް ރާއްޖެއިން ގެއްލި ބޭރުގެ އުފެއްދުންތަކަށް ބަރޯސާވާން މަޖުބޫރުވާނެއެވެ.
މި އެޕްލިކޭޝަން މެދުވެރިކޮށް ދަނޑުވެރިން ހައްދާ ތަކެތި ވިއްކުމުގެ އިތުރުން ދަނޑުވެރިކަމުގައި ބޭނުންކުރާނެ އުކުޅުތަކުގެ ޓިއުޓޯރިއަލްތައް ވެސް ދަނޑުވެރިންނަށް ބަލައިލެވޭނެއެވެ. އަދި ދަނޑުވެރިކަމުގައި ބޭނުންކުރާ ބޭސްވެސް އޮންލައިންކޮށް ގަތުމުގެ ފުރުސަތު ލިބިގެންދާނެއެވެ.
އެ ސްޓޫޑިއޯގެ އަމާޒަކީ އަވަސް މުސްތަޤްބަލެއްގެ ތެރޭގައި މި އެޕްލިކޭޝަން ލޯންޗްކުރުމެވެ. ކޯވިޑް19 ގެ ސަބަބުން ރާއްޖެއަށް ކާބޯތަކެތި އެތެރެކުރުމަށް ދަތިތަކެއް ހުރުމާއިއެކު އެތައް ބަޔަކު މިވަނީ ދަނޑުވެރިކަމާއި ދިމާލަށް މިސްރާބުޖަހާފައެވެ. އެހެންކަމުން މިފަދަ ދަނޑިވަޅެއްގައި މިފަދަ އެޕްލިކޭޝަނެއްގެ ބޭނުން މިވަނީ ބޮޑުވެފައެވެ.