މިދުވަސްވަރަކީ ކޯވިޑް 19އާއި ގުޅިގެން މުހިންމު ގިނަ ފިޔަވަޅުތަކެއް އަޅަމުން އަންނަ ދުވަސްތަކެވެ. ޚާއްސަކޮށް މީހުން އެއްވެ ނޫޅޫމާއި، އެއްވެގަން ކުރިއަށްގެންދާ ހަރަކާތްތައް އެއްކޮށްހެން ހުއްޓާލުމަށް ކަމާއި ބެހޭ ފަރާތްތަކުން ދަނީ އިރުޝާދު ދެމުންނެވެ. ކޮންމެހެން ބޭއްވުން މަޖުބޫރު ބައްދަލުވުންތައް ނޫން ބައްދަލުވުންތައް، ކުރިއަށް ނުގެންދިއުމަށް އަންނަނީ އަންގަމުންނެވެ. މިއިން ކޮންމެ ކަމަކީވެސް ތިމާ އާއި މުޅި މުޖުތަމަޢުގެ ސަލާމަތާއި ރައްކާތެރިކަމަށްޓަކައި ކަމާއި ބެހޭ ފަރާތްތަކުން އަޅަމުން އަންނަ ފިޔަވަޅުތަކެކެވެ.
ނަމަވެސް މިފަދަ ދަނޑިވަޅުގައިވެސް އަހަރަމެންނަށް ހުއްޓާލެވެން ނެތް ޚިދުމަތްތައް އެބަހުއްޓެވެ. ރާއްޖޭގައި ތިބި ތެލަސީމިއާ ކުދިންނަކީ، އެފަދަ ކުދިންނަށް މުޖުތަމަޢުން ފޯރުކޮށްދޭ ލޭ ހަދިޔާކުރުމުގެ އެހީތެރިކަމަށް އަބަދުވެސް ބޭނުންޖެހިފައި ތިބި ކުދިންތަކެކެވެ.
ތެލަސީމިއާ ސެންޓަރުން ބުނާގޮތުގައި މިފަދަ ކުދިންނަށް ލޭ ހޯދަނީ އާއްމުގޮތެއްގައި ދެގޮތަކަށެވެ. އެއީ ތެލަސީމިއާ ކުދިންގެ އާއިލާތަކުން ހޯދާ ޑޯނަރުންނާއި، އަދި ކުންފުނިންތަކުގެ އިޖްތިމާޢީ ޒިންމާގެ ދަށުން ކުރިއަށްގެންދާ ލޭ ހަދިޔާކުރުމުގެ ކޭމްތަކުގައި ހަދިޔާ ކުރާ ލެއެވެ. މީގެތެރެއިންވެސް ބޮޑު ބައެއް ޙިއްސާކުރަނީ ލޭ ހަދިޔާކުރުމުގެ ކޭމްޕްތަކެވެ.
އަމިއްލަ އިސްނެގުމުގެމަތިން ދަރުމައަށްއެދި ލޭ ހަދިޔާކުރާ އިންސައްތައަކީ ރާއްޖޭގައި އަބަދުވެސް ކުޑަ އިންސައްތައެކެވެ.
ތެލަސީމިއާ ސެންޓަރުން ބުނާގޮތުގައި ލޭ ހަދިޔާކުރުމަށް ހިންގާ ކޭމްޕަތަކުގެ ބޮޑު އިންސައްތައަކީ ރިސޯޓްތަކުން މޯލްޑިވެސް ބްލަޑް ބޭންކަށް ހަދިޔާކުރާ ލެއެވެ.
އެގޮތުން ވޭތުވެދިޔަ 3އަހަރުވެސްވަނީ ކޮންމެ އަހަރަކު ލޭ ހަދިޔާކުރުމުގެ 45 ކޭމްޕް ކުރިއަށްގެންގޮސްފައެވެ. ނަމަވެސް މިއަދުގެ މި ޙާލަތުގައި ތެލަސީމިއާ ކުދިންތިބީ ލޭ ލިބޭނެ ގޮތެއް ނެތިފައެވެ.
މުޅި ރާއްޖޭގެ ތެލަސީމިއާ ކުދިންގެ ނިސްބަތަށް ބަލާއިރު މިހާރުވެސް ގަވައިދުން ލޭ އަޅަންޖެހޭ 635 ކުދިން ރާއްޖޭގައި އެބަތިއްބެވެ. މީގެތެރެއިން 300 އަށްވުރެ ގިނަ ކުދިން ޚިދުމަތް ހޯދަނީ މާލޭގައި ހުންނަ ނޭޝަނަލް ތެލަސީމިއާ ސެންޓަރުންނެވެ.
ކޯވިޑް 19 އާއި ގުޅިގެން ރައްކާތެރިކަމުގެ ފިޔަވަޅު އެޅުމުގެ ގޮތުންވަނީ ގިނަ މީހުން އެއްވެގެން ކުރިއަށްގެންދާ ހުރިހާ ހަރަކާތްތައް ހުއްޓާލާފައެވެ. އަދި ކޯވިޑް 19 އާއި ގުޅިގެން ރިޒޯޓުތައްވެސް ބަންދުކޮށްފައި ވުމުން ރިޒޯޓުތަކުން ހިންގާ ލޭހަދިޔާކުރުމުގެ ޕްރޮގްރާމްތައްވެސް ވަނީ މެދުކެނޑިފައެވެ.
ލޭ ލިބުމުގެ ދަތިކަން ތެލަސީމިއާ ކޮންމެ ކުއްޖަކު މިހާރު އެގެންދަނީ ތަޙައްމަލު ކުރަމުންނެވެ.
މިއީ މިފަދަ ކުދިންނަށް ފަރުދީގޮތުން، ނުވަތަ ދަރުމައަށް އެދިގެން ލޭ ހަދިޔާކުރުމަށް މުޖުތަމަޢު އަތުކުރި އޮޅާލަންވީ ވަގުތެވެ. އެއްވެގެން ކުރިއަށްގެންދާ ކޭމްޕްތައް މެދުކަނޑާލިނަމަވެސް، ވަކިން ގޮސް ލޭ ހަދިޔާ ކުރުމުގެ ފުރުސަތު ކޮންމެ މީހަކަށްވެސް ވަނީ ހުޅުވިފައެވެ.
ލޭ ހަދިޔާކުރަން ބޭނުންވާ އާއްމު ފަރުދުން ތެލަސީމިއާ ސެންޓަރަށް ވަޑައިގެންނެވުމުން އެތަނުން ލޭ ނެގުމުގެ ފުރުސަތު ފަހިކޮށްދޭނެއެވެ. އެގޮތުން ހުކުރު ހޮނިހިރު ފިޔަވައި ކޮންމެ ދުވަހެއްގެ ހެންދުނު 8އިން މެންދުރު ފަހު 3ޖެހުމާއި ހަމައަށް ލޭ ހަދިޔާކުރުމުގެ ފުރުސަތު ހުޅުވާލާފައި ހުންނާނެއެވެ.
ހުމާއި ރޯގަފަދަ ބަލިތައް، ނުވަތަ މިނޫންވެސް ބައްޔެއް ނެތް މީހެއްނަމަ އެމީހަކަށް ލޭ ހަދިޔާ ކުރެވޭނެއެވެ.
މިފަދަ ކުދިންނަށް ލޭ ލިބުން ދަތިވެ، ސޯޝަލް މީޑިއާގައި ވެސްދަނީ ލޭ ހަދިޔާކުރުމަށް މީހުންގެ މަދަދަށް އެދި ޕޯސްޓްތައް ކުރަމުންނެވެ. އެހެންކަމުން މިފަދަ ވަގުތެއްގައި، ތެލަސީމިއާކުދިން އެ ކުރާ އާދޭހުގެ އަޑުއަހައި، އެހީތެރިކަމުގެ އަތެއް ފޯރުކޮށްދިނުމަކީވެސް ފަރުދީ ޒިންމާއެކެވެ.
އެހެންކަމުން މިފަދަ ވަގުތެއްގައި ތެލަސީމިއާ ކުދިންނަށް ބޭނުންވާ ލޭ ހަދިޔާކުރުމަކީވެސް ފަރުދީ ޒިންމާއެއްގެ ގޮތުގައި ދެކިގެން، ކޮންމެ ފަރުދަކުވެސް އެ ޒިންމާ އަދާކުރަމާތޯއެވެ. ކޮންމެ ލޭތިއްކަކީވެސް އަގުމާތް ހަދިޔާއެކެވެ.