ކޯވިޑް 19 އާއި ގުޅިގެން ރިޒޯޓުތަކުން އާއްމުން ދިރިއުޅޭ ރަށްތަކަށް އެރުން މަނާކޮށްފައިވަނިކޮށް ރިޒޯޓަކުން މީހަކު ފަތާފައި ގޮސް މީހުން ދިރިއުޅޭ ރަށަކަށް އަރައިފިއެވެ.
ފުލުހުން ބުނެފައިވަނީ އައްޑޫ މީދޫއަށް ފަތާފައި ދިޔަ މީހާއަކީ އެ އަތޮޅު ސައުތު ޕާމް ރިޒޯޓްގެ މުއައްޒަފެއްކަމަށެވެ. މި މައްސަލައިގައި އެމީހާ މިހާރުވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
މިޙާދިސާ ހިނގާފައިވަނީ އިއްޔެ މެންދުރު ދޭއްޖަހާއެހާކަށްހާއިރު ކަމަށް ފުލުހުން ބުނެއެވެ.
މި މީހާ ފުލުހުން ހައްޔަރުކޮށްފައިވަނީ އެރަށުގެ ހެލްތު ސެންޓަރަށް ގެންގޮސް، ޑޮކްޓަރަށް ދެއްކުމަށްފަހު ސިއްޙީ އެއްްވެސް ނުރައްކަލެއް ނެތްކަން ކަށަވަރުކުރުމަށް ފަހުގައެވެ.
ކޯވިޑް 19އާއި ގުޅިގެން، އާއްމުުން ދިރިއުޅޭ ރަށްތަކަށް މީގެ އަސަރު ވީހާވެސް ކުޑަކުރުމަށް އެޗްޕީއޭއިންވަނީ ނިންމުންތަކެއް ނިންމާފައެވެ. އެގޮތުން ރިޒޯޓްތަކުން އާއްމު މީހުން ދިރިއުޅޭ ރަށްތަކަށް ދަތުރުކުރުމާއި، އަދި މީހުން ދިރިއުޅޭ ރަށްތަކުން ރިޒޯޓްތަކަށް ދަތުރުކުރުންވަނީ ވަގުތީ ގޮތުން މެދުކަނޑާލަން އަންގާފައެވެ.
އަދި ސިއްޙީ ނުރައްކަލުގެ މި ޙާލަތުގައި، އެންގުންތަކާއި ޚިލާފުވާ ފަރާތްތަކާމެދު ފިޔަވަޅުއަޅާނެކަން ވަނީ އަންގާފައެވެ.