މިލަދުންމަޑުލު އުތުރުބުރީ މިލަންދޫ ސްކޫލްގެ އާއިމާރާތް އެޅުމަށްޓަކައި ބިން ހުސްކުރުމުގެ މަސައްކަތް ފަށާފައިވާކަމަށް ށ.މިލަންދޫ ކައުންސިލް އިދާރައިން ބުނެފިއެވެ.ހަތަރުބުރީގެ މި އާ އިމާރާތް އެޅުމަށްޓަކައި މިހާރު ބޭނުން ކުރަމުންދާ އޮފީސް އިމާރަތާއި 5 ކުލާސް ރޫމް އެކުގައި ނެގުމަށް ހަމަޖެހިފައިވާއިރު ކިޔަވައިދިނުމަށް ދިމާވާނެ ޖާގައިގެ ދަތިކަން ހައްލުކުރުމަށް ވަގުތީ ކުލާސް ރޫމް ތަކެއް ހެދުމުގެ މަސައްކަތް ފަށާފައިވާކަމަށްވެސް މިލަންދޫ ކައުންސިލުން ބުނެއެވެ.ޖޭއެސް ކޮންސްޓްރަކްޝަނާއި ހަވަލުކޮށް އެއް އަހަރުތެރޭ ހެދުމަށް ހަމަޖެހިފައިވާ މި އިމާރާތުގައި 29 ކުލާސް ރޫމް، ލެބޯޓަރީ، ލައިބްރަރީ، ކޮމްޕިއުޓަރ ލެބް، މީޓިން ރޫމް އަދި އޮފީހުގެ އިތުރުން ބޭންޑް އަދި ކެޑޭޓަށް ހާއްޞަ ބަޔަކާއި، ޓިވެޓް އަދި ޓީއާރުސީގެ ހަރަކާތްތައް ކުރިއަށްގެންދާނެ ބައެއް ހިމެނޭކަމަށް މިލަންދޫ ކައުންސިލުން ބުނެއެވެ.މިހާރުވެސް އެއްދަންފަޅިއަށް ކިޔަވައިދެމުން ގެންދާ މިލަންދޫ ސްކޫލްގެ މި އިމާރާތް ނިމި ބޭނުން ކުރަން ފެށުމުން ނުކުޅެދުންތެރިކަން ހުންނަ ކުދިންނަށް ކިޔަވައިދިނުމަށް ބޮޑު ފަސޭހައެއް ލިބުގެން ދާނެކަމަށް މިލަންދޫ ކައުންސިލުން މަޢުލޫމާތުދެއެވެ. މިއިމާރާތަކީ ދިވެހި ސަރުކާރުގެ ބަޖެޓުން 49.8 މިލަންރުފިޔާ ޚަރަދުކޮށްގެން ހަދާ އިމާރާތެކެވެ.