ކޯވިޑް-19ގެ ނުރައްކާ ކުޑަކުރުމަށް ސަރުކާރުން އަޅުއްވަމުންގެންދަވާ ފިޔަވަޅުތަކަށް އިޙުމާލުވާ ފަރާތްތަކާމެދު ފިޔަވަޅު އަޅާނެކަމަށް ނޭޝަނަލް އެމެޖެންސީ އޮޕަރޭޝަން ސެންޓަރުން ވިދާޅުވެއްޖެއެވެ.
ނެޝެނަލް އެމެޖެންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޯވިޑް-19ގެ މަޢުލޫމާތު ދިނުމަށް ސަރުކާރުން ކަނޑައަޅުއްވާފައިވާ ތަރުޖަމާން މުޙައްމަދު މަބްރޫކް ޢަޒީޒު ވިދާޅުވީ، ރާއްޖޭގައި ކޯވިޑް-19ގެ ހާލަތު އިތުރަށް ގޯސްވިޔަނުދީ، ބަލަންޖެހޭ ކަންކަން ބަލާ، އަޅަންޖެހޭ ފިޔަވަޅުތައް ސަރުކާރުން އަޅުއްވަމުން ގެންދަވާކަމަށެވެ.
އެގޮތުން މަބްރޫކް ވަނީ މިއީ މިހާރު މުޅި ދުނިޔެއަށް ފެތުރިފައިވާ ބަލިމަޑުކަމެއްގެގޮތުގައި ދުނިޔޭގެ ޞިއްޙަތު ޖަމްޢިއްޔާއިން އިޢުލާންކޮށްފައިވާތީ، ރައްކާތެރިކަމުގެ ފިޔަވަޅެއްގެގޮތުން ރާއްޖޭގައި މިހާރު އާއްމު ޞިއްހަތުގެ ކުއްލި ނުރައްކަލުގެ ހާލަތު އިޢުލާންކޮށްފައިވާކަން ފާހަގަކުރައްވާ، މި ހާލަތުގައި ޤާނޫނު އަސާސީން ހެލްތް ޕްރޮޓެކްޝަން އެޖެންސީއަށް ލިބިދޭ ބާރުތަކާއެކު، ތަންފީޒުކުރަންޖެހޭ ކަންކަން ތަންފީޒުކުރަމުންދާނެ ކަމަށެވެ.
މަބްރޫކް ވިދާޅުވީ، ކޯވިޑް-19 އިން ރައްކާތެރިވުމަށްޓަކާ، މުޅި މުޖުތަމައުގެ ސަލާމަތާއި ރައްކާތެރިކަން ކަށަވަރުކުރުމަށް ސަރުކާރުން އަޅުއްވަމުން ގެންދަވާ ފިޔަވަޅުތަކާމެދު އިހުމާލުވާ ފަރާތްތަކާމެދު ފިޔަވަޅު އަޅާނެކަމަށެވެ.
އާއްމު ސިއްހަތުގެ ކުއްލި ނުރައްކަލުގެ ހާލަތު ރާއްޖޭގައި މިހާރު މިވަނީ އިޢުލާންކޮށްފައި. އޭގެ މާނައަކީ އެޗް.ޕީ.އޭއަށް ލިބިދޭ އިތުރު ބާރުތަކާއެކު މިކަން ތަންފީޒުކުރަމުންދާނެކަން. އަދި ތިބޭފުޅުންނަށް އަޅުގަނޑު ކުރިންސުރެއް ދެމުންއައި ޔަޤީންކަމަކީ މި ސަރުކާރުން ދިވެހިރާއްޖޭގެ ރައްޔިތުންގެ ސަލާމަތަށްޓަކާ ނާޅާނެ އެއްވެސް ފިޔަވަޅެއް ނޯންނާނެކަން. އެއްވެސް ބަޔަކު އިހުމާލެއްވެއްޖެއްޔާ އެބަޔަކާމެދު އަޅަންޖެހޭ ފުރިހަމަ ފިޔަވަޅު އަޅަމުންދާނެކަން" މަބްރޫކް ވިދާޅުވިއެވެ.
މަބްރޫކް ޢަޒީޒު ވިދާޅުވީ، ކޯވިޑް-19ގެ ނުރައްކާ މުޅި ދުނިޔެއަށް ބޮޑުވެފައިވާއިރު، މިކަމުން ރައްކާތެރިވުމަށް ދުނިޔޭގެ ހުރިހާ ޤައުމުތަކުން އަޅަމުންދާ ފިޔަވަޅުތައް އިތުރަށް ހަރުދަނާކުރުމަށް ޑަބްލިއު.އެޗް.އޯއިން އިލްތިމާސްކުރައްވާފައިވާކަމަށެވެ. އަދި ދުނިޔޭގެ ޤައުމުތަކުގެ ސަރުކާރުތަކާއި، ރައްތިރުން މިކަމުގައި ގުޅިގެން މަސައްކަތްކޮށްފިނަމަ، މިބަލި ކޮންޓްރޯލްކުރެވިދާނެކަން އެ ޖަމިއްޔާއިންވެސް ފާހަގަކުރައްވާފައިވާކަމަށެވެ.
އެހެންކަމުން މި ހާލަތުން އަރައިގަތުމަށް ދިވެހި ސަރުކާރުން ކުރައްވަމުން ގެންދަވާ މަސައްކަތްތަކަށް ވިޔަފާރިވެރިންނާއި އާއްމު ރައްޔިތުންގެ ފުރިހަމަ އެއްބާރުލުމާއި އެހީތެރިކަން ދެއްވުމަށް މަބްރޫކް ވަނީ އިލްތިމާސްކުރައްވާފައެވެ.
"މިކަމުގައި އެންމެ މުހިއްމު އެއް ކަމަކީ ކޮންމެ ބޭފުޅެއްވެސް، ކޮންމެ ވިޔަފާރިއެއްވެސް އެ ބައެއްގެ ފަރުދީ ޒިންމާ އަދާކޮށް، އެމީހަކު އަމިއްލައަށް މިކަމުގައި ތެދުވުން. އައިސޮލޭޝަންގައި ތިބެން އަންގާ މީހުން އައިސޮލޭޝަންގައި ތިބެ ދިނުން. އެ ނޫންވެސް ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އަޅަމުން ކުރިއަށްދިއުން" މަބްރޫކް ވިދާޅުވިއެވެ.
ކޯވިޑް-19ގެ ސަބަބުން ދުނިޔޭގެ އެހެން ޤައުމުތަކެކޭ އެއްފަދައިން ރާއްޖޭގެ އިޤްތިޞާދަށްވެސް މިކަމުގެ ނޭދެވޭ އަސަރު ވަރަށް ބޮޑަށް ކުރާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވަނީ ވިދާޅުވެފައެވެ. އެހެންނަމަވެސް ސަރުކާރުން މުވައްޒަފުންގެ މުސާރަ ކުޑަކޮށް، ތަރައްޤީގެ މަޝްރޫޢުތައް މަޑުޖައްސާލުމުގެ އެއްވެސް ވިސްނުމެއް ސަރުކާރުން ނުގެންގުޅުއްވާކަމަށް އެމަނިކުފާނު ވިދާޅުވެފައިވެއެވެ. އަދި ރާއްޖެއަށް ބޭނުންވާ ބޭހާ ކާޑުގެ ސްޓޮކް އެބަހުރިކަމަށާއި، މިކަމުން އަރައިގަތުމުގައި ޤައުމުތަކުގެ އެހީތެރިކަން ހޯދަމުންދާކަން ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ.