ކޯވިޑް19: ދައުރުވަނީ ފޭކު ލިސްޓެއް، މީހުން އަރާފޭބުން ވަގުތީގޮތުން ހުއްޓާލާފައިވަނީ ކުރެއްދޫއާއި ބަތަލާއަށް
ރާއްޖޭގައި މީހުން އަރާ ފޭބުން ވަގުތީގޮތުން ހުއްޓާލާފައިވަނީ 2 ރިސޯޓަކަށްކަމަށާއި، އިތުރު ރަށަކަށް އަރާ ފޭބުން ހުއްޓާލުމަށް އަންގާފައިނުވާކަމަށް ހެލްތް ޕްރޮޓެކްޝަން އެޖެންސީ، އެޗް.ޕީ.އޭއިން ވިދާޅުވެއްޖެއެވެ.
އެޗް.ޕީ.އޭއިން މިކަން ހާމަކުރައްވާފައިވަނީ ދަތުރުކުރުމުގައި ޚާއްސަ ސަމާލުކަމެއްދޭންވީ ރަށްތަކެއްކަމަށްބުނެ ރާއްޖޭގެ 14 ރަށެއް ހިމެނޭ ލިސްޓެއް ސޯޝަލް މީޑިއާގައި ދައުރުވާން ފެށުމާގުޅިގެންނެވެ. އެޗް.ޕީ.އޭއިން ކޮށްފައިވާ ޓުވީޓެއްގައި ވިދާޅުވެފައިވަނީ ރާއްޖޭގައި އަރާ ފޭބުން ވަގުތީގޮތުން ހުއްޓާލެވިފައިވަނީ ޅ. ކުރެއްދޫ އައިލަންޑް ރިސޯޓާއި އއ. ސޭންޑީސް ބަތަލާގައިކަމަށެވެ. އަދި އެނޫން އެއްވެސް ރަށަކަށް އަރާ ފޭބުން ހުއްޓާލުމަށް އަންގާފައިނުވާކަމަށްވެސް އެޗް.ޕީ.އިން ވަނީ ވިދާޅުވެފައެވެ.
އެޗް.ޕީ.އެއިން އެންމެފަހުން އާއްމުކޮށްފައިވާ މަޢުލޫމާތުތަކަށް ބަލާއިރު، ރާއްޖޭން މިހާތަނަށް ކޯވިޑް-19އަށް 6 މީހަކު ޕޮސިޓިވްވެފައިވާއިރު މި އެންމެންނަކީވެސް ބިދޭސީންނެވެ. އަދި މި މީހުންގެ ތެރެއިން 2 މީހަކަށް ފަރުކޮޅުފުށީގައި ޤާއިމުކޮށްފައިވާ ކަރަންޓީނު ފެސިލިޓީގައި ފަރުވާދެމުންދާކަމަށް އެޗް.ޕީ.އޭއިން ވިދާޅުވެފައިވެއެވެ. މީގެ އިތުރުން މި ބައްޔަށް ޝައްކުކުރެވޭފަދަ އަލާމާތްތައް ހުރުމުގެ ސަބަބުން ފަރުކޮޅުފުށީގައި ޤާއިމުކޮށްފައިވާ އައިސޮލޭޝަން ފެސިލިޓީގައި މިވަގުތު 9 މީހަކު ބަހައްޓާފައިވާކަމަށްވެސް އެޗް.ޕީ.އިން ވަނީ ވިދާޅުވެފައެވެ.
ކޯވިޑް-19އާއި ގުޅޭގޮތުން އާއްމުންގެ މެދުގައި ނުތަނަވަސްކަން އިތުރުވާނެހެން ހަޤީޤަތާއި ޚިލާފު މަޢުލޫމާތު ނުފެތުރުމަށް ނެޝަނަލް އިމަރޖެންސީ އޮޕަރޭޝަން ސެންޓަރގެ ފަރާތުންވެސް ވަނީ ތަކުރާރުކޮށް އިލްތިމާސްކުރައްވާފައެވެ.