ކޯވިޑް19: އިތުރު ހަރަކާތްތައް ކުރިއަށްގެންދިއުން އެމް.އެން.ޔޫއާއި އައި.ޔޫ.އެމްއިންވެސް މެދުކަނޑާލައިފި
ކޮރޯނާ ވައިރަސް ނުވަތަ ކޯވިޑް-19 އިން ރައްކާތެރިވުމުގެގޮތުން ސަރުކާރުން އަޅުއްވަމުންގެންދަވާ ފިޔަވަޅުތަކަށް އެއްބާރުލުން ދިނުމުގެގޮތުން ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)އާއި ދިވެހިރާއްޖޭގެ އިސްލާމީ ޔުނިވަރސިޓީ (އައި.ޔޫ.އެމް)އިން އިތުރު ހަރަކާތްތައް ކުރިއަށްގެންދިއުން މެދުކަނޑާލައިފިއެވެ.
ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަނުން ވަނީ އެޔޫނިއަންގެ 14 ގޮފީގެ އެންމެހާ ހަރަކާތްތައް މުއްދަތެއް ނެތްގޮތަށް ފަސްކުރުމަށް ނިންމާފައެވެ. އަދި ދިވެހިރާއްޖޭގެ އިސްލާމީ ޔުނިވަރސިޓީގެ ދަރިވަރުންގެ ގުޅުމުންވެސް ވަނީ 9 މާރިޗު 2020 އިން ފެށިގެން އެ ޖަމުޢިއްޔާއިން ކުރިއަށްގެންދިއުމަށް ތާވަލުކޮށްފައިވާ ހުރިހާ ހަރަކާތެއްވެސް ވަކި މުއްދަތެއްނެތްގޮތަށް ވަގުތީގޮތުން މެދުކަނޑާލުމަށް ނިންމާފައެވެ.
އެމް.އެން.ޔޫއާއި އައި.ޔޫ.އެމްއިންވެސް އިތުރު ހަރަކާތްތައް ކުރިއަށްގެންދިއުން މިހާރު މެދުކަނޑާލާފައިވާއިރު، އެޑިއުކޭޝަން މިނިސްޓްރީގެ ފަރާތުންވެސް ވަނީ ރަސްމީ ތަޢުލީމުގެ ބޭރުން ބާއްވާ އިތުރު ހަރަކާތްތައް މިދުވަސްކޮޅު ނުބޭއްވުމަށް ރާއްޖޭގެ ހުރިހާ ސްކޫލްތަކަކަށްވެސް އަންގާފައެވެ.
ދުނިޔޭގެ އެކި ކަންކޮޅުތަކުގައި މިހާރު ހަލުވިކަމާއެކު ފެތުރެމުންދާ ކޮރޯނާ ވައިރަސް ނުވަތަ ކޯވިޑް-19 ދިވެހިރާއްޖެއިންވެސް ފެނިފައިވާއިރު، ސަރުކާރުންވަނީ މުޅި ރާއްޖޭގެ އެލާޓް ލެވެލް ޔެލޯއަށް މަތިކޮށްފައެވެ. މި ބަލިން ރައްކާތެރިވުމުގެ ގޮތުން އަޅާ ފިޔަވަޅުތަކެއްގެ ގޮތުން އާއްމުކޮށް ބާއްވާ ގިނަ ހަރަކާތްތަކެއް މެދުކަނޑާލާ، އާއްމުން މި ބައްޔާމެދު ހޭލުންތެރިކުރުވުމަށް ގިނަ މަސައްކަތްތަކެއްވެސް ދަނީ ކުރަމުންނެވެ.