މިއަހަރުގެ ތެރޭގައި ގޭދޮށު މަސް ޕްލާންޓެއް މ.އަތޮޅުގައި ޤާއިމްކުރާނެކަމަށް ފިޝަރީޒް މިނިސްޓަރ ޒަހާ ވަހީދު ވިދާޅުވެއްޖެއެވެ.
ރައްޔިތުންގެ މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރ ޒަހާ ވިދާޅުވީ ގޭދޮށު މަސް ޕްލާންޓްތައް ރާއްޖޭގެ އެކި ސަރަހައްދުތަކުގައި ތަރައްޤީ ކުރުމުގެ މަސައްކަތް ކުރަމުންދާކަމަށާއި، އައްޑޫގައި ޤައިމްކުރާ މިފަދަ ޕްލާންޓުތަކުގެ އަމަލީ މަސައްކަތް ވަރަށް އަވަހަށް ފަށާނެކަމަށެވެ. އަދި ރާއްޖޭގެ އެކި ސަރަހައްދުތަކުގައި ހަދަން ރާވާފައިވާ ގޭދޮށު މަސްޕްލާންޓުތައް އެޅުމަށް ބޭރުގެ މަލީ އެހީވެސް ހޯދުމަށް މަސައްކަތްކުރަމުންދާކަމަށް މިނިސްޓަރ ވިދާޅުވިއެވެ. އެގޮތުން ވަރަށް އަވަހަށް މ އަތޮޅުގައި ޕްލާންޓެއް ޤާއިމްކުރާނެކަމަށް މިނިސްޓަރ ވިދާޅުވިއެވެ.
"މިފަދަ އިތުރު ޕްލާންޓުތަކަށް ފައިނޭންސް ކުރުމަށް އޭޑީބީގެ ފަރާތުން ވަނީ ޝައުޤުވެރިކަން ފާޅުކޮށްފައި. މިއަހަރުގެ ތެރޭގައި މ އަތޮޅުގައި މިފަދަ ޕްލާންޓެއް ޤާއިމްކުރުމަށް ހުޅުވާލެވޭނެ. އަދި އިތުރު ޕްލާންޓުތަކަށް ފައިނޭންސް ކަށަވަރުކޮށް، އިއުލާން ކުރާނަން." މިނިސްޓަރ ޒަހާ ވިދާޅުވިއެވެ.
މެމްބަރުންގެ ސުވާލުތަކަށް ޖަވާބުދެއްވަމުން މިނިސްޓަރ ވަނީ އައްޑޫގައި ގޭދޮށު މަސްޕްލާންޓު ޤާއިމްކުރުމަށް ކުރާ މަސައްކަތުގެ އެންމެ ފަހުގެ ތަފްސީލްވެސް ދެއްވާފައެވެ. އެގޮތުން އައްޑޫގައި ގޭދޮށު މަސް ޕްލާންޓް ޤާއިމްކުރުމަށް ކުރަންޖެހޭ ގިނަ މަސައްކަތްތަކެއް ކުރެވެމުންދާކަމަށް މިނިސްޓަރ ވިދާޅުވިއެވެ.
"ގޭދޮށު މަސްޕްލާންޓްގެ ކޮންސެޕްޓް ޕޭޕަރެއް މިނިސްޓްރީއިން ތައްޔާރުކޮށް، އޭގެ މައްޗަށް ބިނާކޮށް، ލާމަރުކަޒީ ކުރުމުގެ ވިސްނުމާއި އެއްގޮތަށް ސިޓީ ކައުންސިލްތަކަށް ސީދާ ޓެންޑަރ ހުޅުވާލުމަށް ވަނީ ރޭވިފައި. އިންޑިއާގެ އެހީގައި އައްޑޫ ސިޓީގެ ތިން ރަށެއްގައި ގޭދޮށު މަސްޕްލާންޓް ޤާއިމްކުރުމަށް ޓެންޑަރއަށް ހުޅުވާލުމަށް އައްޑޫ ސިޓީ ކައުންސިލުން މިހާރު ދަނީ ތައްޔާރުވަމުން. މިކަމުގައި އައްޑޫ ސިޓީ ކައުންސިލުން މިނިސްޓްރީގެ ފަރާތުން ދަނީ ފަންނީ އެހީތެރިކަމާ ލާފާ ފޯރުކޮށްދެމުން" މިނިސްޓަރ ވިދާޅުވިއެވެ.
އައްޑޫ ސިޓީއާއި މ.އަތޮޅުގެ އިތުރުން، އެހެން ރަށްރަށުގައިވެސް ގޭދޮށު މަސް ޕްލާންޓްތައް ޤާއިމްކުރުމަށް ބަޖެޓް ހޯދުމުގެ މަސައްކަތް މިހާރު ކުރަމުންދާކަމަށް މިނިސްޓަރ ވިދާޅުވިއެވެ.